الەمدە كۇزەن تەرىسىن يمپورتتاۋشى ەڭ ۇلكەن ەل – دانيادا كوروناۆيرۋستىڭ مۋتاتسياعا ۇشىراعان ءتۇرى انىقتالدى. ىندەت كۇزەن فەرمالارىندا تاراي باستاعان. ىندەت جۇقتىرعانداردىڭ تالداۋى ۆيرۋستىڭ وزگەرگەنىن كورسەتىپ وتىر. بۇل جاعداي دۇنيەجۇزىلىك دەنساۋلىق ساقتاۋ ۇيىمىن دا الاڭداتتى. ودان بولەك تاعى التى ەل كۇزەندەردەن ۆيرۋستىڭ انىقتالعانىن مالىمدەگەن.
كوپەنگاگەندە ورنالاسقان جۇقپالى اۋرۋلاردى زەرتتەۋمەن اينالىساتىن Statens Serum ينستيتۋتى ۆيرۋستىڭ انتيدەنەلەرگە توتەپ بەرە الاتىنىن انىقتاعان. ونى ماماندار كۇزەندەردەن تابىلعان بەس جاعدايدا جانە ولاردان ادامعا جۇققان 12 جاعدايدا بايقاعان. ال بۇل ۆاكتسينانىڭ تيىمدىلىگىن جوققا شىعارۋى مۇمكىن ەكەن. سول سەبەپتى دانيا ەلدەگى بارلىق 17 ملن كۇزەندى قىرىپ تاستاۋ تۋرالى شەشىم شىعارعان. زەرتتەۋ جۇمىستارى اياقتالعانىنا قاراماستان, دانيا بيلىگى تۇرعىنداردىڭ قاۋىپسىزدىگىن قاتەرگە قويا المايمىز دەپ وتىر. بۇل جاعداي بويىنشا دانيا ددۇ-مەن بىرلەسىپ زەرتتەۋ جۇمىستارىن جۇرگىزىپ جاتىر. ال ۇلىبريتانيا بولسا دانيالىقتاردى ەلگە كىرگىزبەيتىنىن حابارلادى.