جۋىردا قورداي اۋدانىنداعى سورتوبە اۋىلىنان «يمامدار ءۇيى» ورتالىعى اشىلدى. اتالعان ورتالىق اۋەلى اۋىل جاستارىن يماندىلىققا, يسلام دىنىنە باۋليتىن ورىن بولىپ سانالادى. سونىمەن قاتار, مۇندا وڭىردەگى يمامدارمەن ءتۇرلى جيىندار وتكىزىلىپ, وقۋ كۋرستارى ۇيىمداستىرىلادى. سونداي-اق مۇندا جاستارعا تەك ءدىني ءبىلىم بەرىپ قانا قويماي, وزگە ۇلت وكىلدەرىنە قازاق تىلىنەن ساباقتار دا ۇيرەتىلەدى.
بۇل «يمامدار ءۇيى» نەگىزىنەن ەلىمىزدەگى تاتۋلىق پەن بىرلىكتى نىعايتۋ, وتباسى قۇندىلىقتارىن ناسيحاتتاۋ, اسىل ءدىنىمىزدىڭ شارتتارىن تولىق ءبىلۋ ماقساتىندا سالىنعان. مۇندا وڭالتۋ, بەيبىتشىلىك پەن كەلىسىم بولمەلەرى, وزگە ۇلت وكىلدەرىنە قازاق ءتىلىن ۇيرەتۋ سىنىبى جانە ءدارىسحانا, كىتاپحانا, مەديتسينالىق پۋنكت, ءماجىلىس زالى بار. سونىمەن قاتار, اسحانا مەن جاتاقحانا دا بار. قورداي اۋدانىنىڭ باس يمامى داۋرەن قۇتتىباەۆتىڭ ايتۋىنشا, اتالعان ورتالىق كوپتىڭ كومەگىمەن تۇرعىزىلعان. «ەجەلدەن اتا-بابالارىمىز بىرلىكپەن تىرلىك قىلىپ, ىنتىماقپەن كۇن كەشۋدى وسيەت ەتىپ قالدىردى. مىنە, وسى ماقساتتا كىشىپەيىلدىلىكپەن, تاتۋلىقپەن ءومىر ءسۇرۋدى دارىپتەدى. اتا-بابالارىمىزدىڭ ۇرپاعىنا وسيەتى جاڭعىرىپ تۇرسىن دەگەن نيەتپەن «يمامدار ءۇيى» سالىندى», دەيدى ول.
رەسمي اتاۋى وسىلاي بولعانىمەن, اۋىل جاستارى بۇل ورتالىقتان جان-جاقتى ءبىلىم مەن تاربيە الىپ شىعادى. ەڭسەلى ءارى زامانعا ساي جابدىقتالعان, تەك كوپشىلىككە پايداسى بار ءىس-شارالاردى ۇيىمداستىرۋعا ارنالعان عيمارات بۇگىندە اۋىلدىقتاردىڭ ءجيى باس قوساتىن جەرىنە اينالعان. سونداي-اق ەلدىڭ كەلەلى كەڭەس وتكىزىپ, كۇردەلى ماسەلەلەردى تالقىلايتىن ورتاسىنا اينالماق.
سول سياقتى, مۇندا وتباسىلىق قيىن جاعدايعا تۇسكەندەرمەن دە ءتيىستى جۇمىستار جۇرگىزىلەدى.
جامبىل وبلىسى