ونلاين ءىس-شارا فورماتى مەملەكەتتىك ورگاندارمەن ديالوگتى رەتتەۋگە مۇمكىندىك بەرەدى. اتاپ ايتقاندا, ءبىلىم مينيسترلىگىمەن بولاشاق ماماندىقتار, «كاسىپورىن – وقۋ ورنى» بايلانىسى, جۇمىسقا ورنالاسۋ ماسەلەلەرى تالقىلانادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قر اقدم جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ مالىمدەدى.
ول جاستارعا ارنالعان باعدارلامالاردى مىسالعا كەلتىرىپ ءوتتى «العاشقى جۇمىس ورنى», «ۇرپاقتار كەلىسىمشارتى». بۇل جۇمىس بەرۋشىلەردى جوو جانە كوللەدج تۇلەكتەرىن شتاتقا تاجىريبەسىز قابىلداۋعا ىنتالاندىراتىن بيىلعى جىلعى جاڭاشىلدىقتار.
«ەڭبەك نارىعىندا سۇرانىسقا يە 100 ماماندىقتىڭ ءتىزىمى بار. مەملەكەت تاپسىرىستى انىقتايدى. ەڭبەك نارىعىندا قانداي ماماندىقتار قاجەت ەكەندىگىن, قانداي بولماسىن سالاداعى قاجەتتىلىكتەرگە قارايدى. وقۋ ورنى وسى سالالارعا نازار اۋدارادى. بۇل تاندەمنىڭ ناتيجەسى بار, تەك تۇزەتۋلەر ەنگىزۋ كەرەك», - دەپ اتاپ ءوتتى سپيكەر.