سەناتور ءالي بەكتاەۆ تۇركىستان قالاسىنىڭ ينفراقۇرىلىمىن دامىتۋ بويىنشا بىرقاتار ماسەلەلەرگە قاتىستى ۇكىمەت باسشىسى اسقار مامينگە دەپۋتاتتىق ساۋال جولدادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەنات دەپۋتاتى سوڭعى جىلدارى تۇركىستان قالاسى قارقىندى دامىپ كەلە جاتقانىن ەرەكشە اتاپ ءوتتى. دەگەنمەن شەشىمىن كۇتكەن بىرقاتار ماسەلەلەر بار ەكەنىن دە ايتتى.
«تۇركىستان قالاسىندا سالىنىپ جاتقان كوركەم عيماراتتاردىڭ كوپشىلىگىن اۋىز سۋمەن, كارىز جۇيەسىمەن, ەلەكتر جەلىلەرىمەن, جىلۋ جۇيەلەرىمەن قامتاماسىز ەتۋ شەشىلمەگەن. قالا كوشەلەرىنىڭ يرريگاتسيالىق جۇيەلەرى مەن ينجەنەرلىك-ينفراقۇرىلىمدارىنا قارجى جەتكىلىكتى دەڭگەيدە قارالماعان. ينفراقۇرىلىمى شەشىلمەگەن عيماراتتارعا, تۇرعىن ۇيلەرگە تۇرعىنداردى قالاي ورنالاستىرۋعا بولادى, سول عيماراتتاردىڭ جۇمىس ىستەۋى مۇمكىن بە؟ ەرتەڭ ينفراقۇرىلىمداردى قايتا جۇرگىزگەن ۋاقىتتا سالىنعان جولدار مەن كوشەلەر قايتا بۇزىلماي ما؟» - دەپ ساۋال تاستادى دەپۋتات.
ول قالانى اباتتاندىرۋ جۇمىستارىن دا قۇرىلىس جوبالارىمەن ءبىر مەزگىلدە جۇرگىزۋدى ۇسىندى. سوندىقتان 2021-2023 جىلدارعا ارنالعان رەسپۋبليكالىق بيۋدجەتتى قاراۋ بارىسىندا «Turkistan» ارنايى ەكونوميكالىق ايماعىنىڭ ينفراقۇرىلىمىنا; كوپقاباتتى تۇرعىن ۇيلەردى سۋمەن قامتاماسىز ەتۋ مەن كارىز جۇيەلەرىنە; ەلەكتر قۋاتىمەن قامتاماسىز ەتۋ ءۇشىن قوسالقى ستانتسيا سالۋعا; تۇرعىن ۇيلەردى جىلۋمەن قامتاماسىز ەتۋگە; جاڭادان سالىنىپ جاتقان قالا اۋماعىن اباتتاندىرۋعا; قالاداعى جاڭا تۇرعىن ءۇي الابىنا ينجەنەرلىك-ينفراقۇرىلىمداردى جۇرگىزۋگە; «ازىرەت سۇلتان» قورىق-مۇراجايىنىڭ اينالاسىن اباتتاندىرۋعا قاراجات ءبولۋدى سۇرادى.