استاناداعى «بەيبىتشىلىك جانە كەلىسىم» سارايىندا XVI حالىقارالىق «شابىت» شىعارماشىل جاستار فەستيۆالىنىڭ جابىلۋىنا ارنالعان گالا-كونتسەرت ءوتتى.
استاناداعى «بەيبىتشىلىك جانە كەلىسىم» سارايىندا XVI حالىقارالىق «شابىت» شىعارماشىل جاستار فەستيۆالىنىڭ جابىلۋىنا ارنالعان گالا-كونتسەرت ءوتتى.
اتالمىش فەستيۆالگە بيىل قازاقستان مەن تمد ەلدەرىنەن ۇكىلى ۇمىتتەرىن ارقالاپ, ات تەرلەتىپ كەلگەن 500 قاتىسۋشى 6 اتالىم بويىنشا الامان بايگەگە ءتۇستى. ال, وسى بايقاۋدا تاباندى تارتىسقا ءتۇسىپ, ءوزىنىڭ ەرەكشە تالانتىمەن تاڭعالدىرىپ, تىڭ تۋىندىسىمەن تامساندىرا العان ناعىز دارىندى جاس ونەرپازداردى انىقتاۋعا بيىل يتاليا, يزرايل, ۋكراينا, پولشا, رەسەي, بەلارۋس, قىرعىزستان, لاتۆيا, تۇركيا جانە ءوز ەلىمىزدىڭ ونەر مايتالماندارى, مادەنيەت قايراتكەرلەرى اتسالىستى. ونەردىڭ اسقار شىڭىنا شىققان وسى الىپ تۇلعالارعا ۇزدىكتەردى تاڭداۋ وڭاي بولماعان كورىنەدى.
گالا-كونتسەرت قازاق ۇلتتىق ونەر ۋنيۆەرسيتەتىنىڭ «شابىت» بي ۇجىمىنىڭ ۇلتتىق بيىمەن اشىلدى. ءدال وسى جاس بيشىلەر ۇجىمى «حورەوگرافيا» اتالىمىندا گران-پري يەلەندى. ودان كەيىن ساحنادا «استانا وپەرا» تەاترىنىڭ سوليستەرى, بالەتتىڭ جاس جۇلدىزدارى ءمادينا باسپاەۆا مەن رۇستەم سەيىتبەكوۆ ونەر كورسەتتى. كەزەك «كلاسسيكالىق مۋزىكا» اتالىمىنىڭ جەڭىمپازدارىن ماراپاتتاۋعا بەرىلدى. «ۇرمەلى اعاش اسپاپتارى» اتالىمىندا باق سىناسقان 16 ۇمىتكەر اراسىندا ەلوردالىق روزا لەبەدەۆا ۇزدىك بولسا, «مىس ۇرمەلى اسپاپتار» اتالىمىندا باس جۇلدە ماسكەۋدە ءبىلىم الىپ جاتقان وتانداسىمىز جاسۇلان ابدىقالىقوۆقا بۇيىردى. ال, «سوقپالى اسپاپتار» اتالىمىندا بولات تۇرابەكوۆ, «بايان-اككوردەون» اتالىمى بويىنشا پەتر بابين جەڭىسكە جەتتى. «ەسترادالىق ۆوكال» اتالىمىنداعى ەڭ جاس ونەرپاز 16 جاسار ەمين ەمينزادە ءوز ەلى تۋرالى «ازەربايجان» ءانىن ورىنداپ بەردى, بىراق بۇل اتالىمدا كيەۆ قالاسىنان كەلگەن مارگاريتا مەلەشكو گران-پري جۇلدەسىن الدى. قازاقستاننىڭ ەڭبەك سىڭىرگەن قايراتكەرى, كومپوزيتور سەكەن تۇرىسبەك «كوك تۇرىكتەر» فولكلورلىق-ەتنوگرافيالىق انسامبلىنە «حالىق مۋزىكاسى» اتالىمىنىڭ گران-پري جۇلدەسىن تابىستادى. بارلىق اتالىمنىڭ ۇزدىكتەرى ساحنادا ءان ايتىپ, بي بيلەپ, اسپاپتاردا ويناسا, «ۇزدىك ادەبي شىعارما» اتالىمىنىڭ جەڭىمپازى قۋات كيىكباي ءوز شىعارماسىنان ءۇزىندى وقىپ بەردى. ەڭ سوڭىندا, بارلىق جينالعان قاۋىم تىنىمسىز كۇتكەن باس جۇلدە يەگەرى دە انىقتالدى. «بەينەلەۋ ونەرى» اتالىمىندا سىنعا تۇسكەن الماتىلىق الماس مۇستافاەۆتىڭ «ورتەكە» دالا تەاترى تۋىندىسى گران-پريگە عانا ەمەس, پرەزيدەنت كۋبوگىنا دا لايىقتى دەپ تانىلدى. ماراپاتتاۋ راسىمىندە ءسوز العان جەڭىمپاز ءوز قۋانىشىن بىلاي جەتكىزدى: «باس جۇلدەنى الۋ تۇسىمە دە كىرمەگەن ەدى. بىرىنشىدەن, قازاق ۇلتتىق ونەرىنىڭ دامۋىنا ۇلەس قوسقان تۇردىعۇل جولاۋشى ۇستازىما شەكسىز بورىشتىمىن. وسى ورايدا, قازاقستان سۋرەتشىلەر وداعى مەن شەبەرلەر قاۋىمداستىعىنىڭ ەڭبەگى زور, سەبەبى, حالىقارالىق بايقاۋلارعا جاستاردى قاتىستىرۋعا اتسالىستى. ال, ءبىز بولساق تاجىريبە جيناپ, شىڭدالىپ, ءبىلىم كوكجيەگىمىزدى كەڭەيتتىك. بۇل تەك قانا مەنىڭ جەتىستىگىم ەمەس. سوندىقتان, بۇگىنگى «شابىت» فەستيۆالىنىڭ بارلىق ۇيىمداستىرۋشىلارىنا العىسىمدى بىلدىرەمىن.
«بەينەلەۋ ونەرى» اتالىمىنىڭ قاتىسۋشىسى العاش رەت پرەزيدەنت كۋبوگىن ءوز قانجىعاسىنا بايلادى. بۇل تاريحي وقيعا بيىلعى فەستيۆالدىڭ ەرەكشەلىگى بولىپ تابىلادى. قازىلار القاسىنىڭ قۇرامىندا بولعان شەتەلدىك مەيمان ۋكراينا رەسپۋبليكاسىنىڭ ەڭبەك سىڭىرگەن قايراتكەرى, حالىقارالىق «مولودا گاليچينى» فەستيۆالىنىڭ ديرەكتورى – ناتاليا كوۆال بىلاي دەپ ءوز اسەرىمەن ءبولىستى: «فەستيۆال قىزىقتى ءارى تارتىستى ءوتتى. بايقاعانىم, بۇل ەلدە ۇلتتىق قۇندىلىقتار جاقسى ساقتالعان. سەبەبى, ۇلتتىق مادەنيەتتى ۇلىقتاۋعا اتسالىسىپ, ونى دارىپتەۋدى, دامىتۋدى ماقسات ەتكەن جاستار از ەمەس ەكەن. وعان قوسا, مەن 22 جىل باسقارىپ كەلە جاتقان ۋكرايناداعى فەستيۆالدە كەيدە دەمەۋشىلەر جاعىنان ماسەلەلەر تۋىنداپ جاتادى. ال, بۇل مەملەكەتتە جاستارعا ۇلكەن كوڭىل بولىنەدى ەكەن. كەرەمەت ەمەس پە؟!
وسى بايقاۋ تۋرالى بايانداي وتىرىپ ەسىمە الاشتىڭ ارداقتىسى ماعجان جۇماباەۆتىڭ «قاجۋ بار ما تۇلپارعا, تالۋ بار ما سۇڭقارعا؟! يمان كۇشتى ولاردا, مەن جاستارعا سەنەمىن!..» دەگەن ولەڭ جولدارى ءتۇستى.
نۇرزادا كۇمىسبەك,
ەۋرازيا ۇلتتىق ۋنيۆەرسيتەتىنىڭ ستۋدەنتى.