جاقىندا قىزىلوردا قالاسىندا رەسپۋبليكانىڭ بارلىق ارداگەرلەرى جينالىپ, القالى كەڭەس وتكىزدى. وندا ءبىراز ماسەلە قارالىپ, ءتيىستى شەشىمدەر شىعارىلدى. وسى جيىن تۋراسىندا ءبىز وبلىستىق ارداگەرلەر كەڭەسىنىڭ توراعاسى سەيىلبەك شاۋحامانوۆپەن اڭگىمەلەسكەن ەدىك.
– رەسپۋبليكانىڭ ارداگەرلەرىن ايماققا جيناپ, سەمينار-كەڭەس وتكىزدىڭىزدەر. وسى شارا تۋرالى ايتىپ بەرسەڭىز...
جاقىندا قىزىلوردا قالاسىندا رەسپۋبليكانىڭ بارلىق ارداگەرلەرى جينالىپ, القالى كەڭەس وتكىزدى. وندا ءبىراز ماسەلە قارالىپ, ءتيىستى شەشىمدەر شىعارىلدى. وسى جيىن تۋراسىندا ءبىز وبلىستىق ارداگەرلەر كەڭەسىنىڭ توراعاسى سەيىلبەك شاۋحامانوۆپەن اڭگىمەلەسكەن ەدىك.
– رەسپۋبليكانىڭ ارداگەرلەرىن ايماققا جيناپ, سەمينار-كەڭەس وتكىزدىڭىزدەر. وسى شارا تۋرالى ايتىپ بەرسەڭىز...
– وبلىستا ارداگەرلەردى ارداقتاۋ, قارتتارىن قادىرلەۋ باعىتىندا ايرىقشا ىستەر جاسالدى. قىزىلوردا وبلىستىق ارداگەرلەر كەڭەسىنىڭ ءىس-تاجىريبەسىن ورتالىق كەڭەس ماقۇلداپ, ەلىمىزگە ارنايى تاراتقان بولاتىن. سوندىقتان ارداگەرلەر اكتيۆىنىڭ رەسپۋبليكالىق سەمينار-كەڭەسىنىڭ ءبىزدىڭ وبلىستا ءوتۋى دە زاڭدىلىق بولسا كەرەك. جيىنعا ارداگەرلەر ۇيىمدارى ورتالىق كەڭەسىنىڭ باسشىلارى, استانا, الماتى قالالارىنىڭ جانە وبلىستىق, قالالىق, اۋداندىق ارداگەرلەر كەڭەستەرىنىڭ توراعالارى, بىرقاتار وبلىستىق مەكەمە, ۇيىم باسشىلارى قاتىستى. سەمينار-كەڭەستىڭ العاشقى كۇنى قوناقتار قالانىڭ كورىكتى جەرلەرىن ارالادى. «سىر-انا» مونۋمەنتىندە تەاترلاندىرىلعان كورىنىس كورسەتىلدى. وبلىستىق مادەنيەت سالاسىنىڭ ونەرپازدارى كەلۋشىلەرگە اننەن شاشۋ شاشىپ, بيشىلەر ءوز ونەرلەرىن ۇسىندى. ايتىسكەر اقىن مۇحتار نيازوۆ ارداگەرلەرگە جىر ارنادى. مۇنان كەيىن تۇڭعىش پرەزيدەنت ساياباعىندا بولعان ارداگەرلەر «ارداگەر اللەياسىنا» بىرنەشە ءتۇپ جاسىل اعاش وتىرعىزدى. مۇنان كەيىن «ءجالاڭتوس ءباھادۇر» ەسكەرتكىشىندە, «تاعزىم» الاڭىندا بولىپ, گۇل شوقتارىن قويدى. سىر سۇلەيلەرى اللەياسىن ارالاپ, تاماشالادى. رەسپۋبليكالىق سەميناردىڭ ەكىنشى كۇنى دەلەگاتتار الدىمەن وبلىستىق مەديتسينا ورتالىعىنىڭ جۇمىسىمەن تانىستى. ونان سوڭ مارتەبەلى مەيماندار وبلىستىق مەديتسينا ورتالىعىنداعى باستاۋىش ارداگەرلەر ۇيىمىنىڭ جۇمىسىن كوردى. باستاۋىش ارداگەرلەر ۇيىمىنىڭ تىزىمىندە 89 ارداگەر بار ەكەن. مۇندا سالا ارداگەرلەرى ءۇشىن بارلىق جاعداي جاسالعان. رەسپۋبليكالىق سەمينارعا قاتىسۋشىلاردىڭ ەكىنشى توقتاعان جەرى ارداگەرلەر ءۇيى بولدى. زەينەتكەرلەر مەن مۇگەدەكتەرگە الەۋمەتتىك قىزمەت كورسەتۋ اۋماقتىق ورتالىعى 2010 جىلدىڭ قازان ايىندا قۇرىلعان. 50 ورىنعا ارنالعان ورتالىق نەگىزىنەن زەينەتكەرلەر مەن مۇگەدەكتەرگە, سوعىس جانە ەڭبەك ارداگەرلەرىنە مەديتسينالىق-الەۋمەتتىك قىزمەتتەر كورسەتۋگە جانە ولاردىڭ بوس ۋاقىتتارىن ءتيىمدى وتكىزۋگە ارنالعان. بۇگىنگى تاڭدا ايماقتا 692 باستاۋىش ۇيىم بار, ولاردىڭ سانى ءالى دە ارتا تۇسۋدە. ارداگەرلەر ۇيىندە وبلىستىڭ بارلىق ارداگەرلەرىنىڭ ءتىزىمى, ولار جايىندا بارلىق مالىمەتتەر كومپيۋتەرگە ەنگىزىلگەن, تۇگەلدەي دەرلىك ينتەرنەتكە قوسىلعان, كەز كەلگەن ۋاقىتتا ىزدەگەن ادامىمىز جايىندا ناقتى مالىمەت الا الامىز. ارداگەرلەر ۇيىندە دەمالۋشىلاردان جاساقتالعان انسامبل ءان-جىردان شاشۋ شاشىپ, شارا مازمۇنىن بايىتا ءتۇستى.
رەسپۋبليكادان جينالعان ارداگەرلەر ونان سوڭ سىرداريا اۋدانىنا قاراستى ناعي ءىلياسوۆ اۋىلىنىڭ تىنىس-تىرشىلىگىمەن تانىستى. اۋدان اكىمى عاني قازانتاەۆ وڭىردە اتقارىلىپ جاتقان جۇمىستار جونىندە ايتىپ وتسە, اۋداندىق ارداگەرلەر كەڭەسىنىڭ توراعاسى حايرۋللا ابەنوۆ ارداگەرلەر ۇيىمىنىڭ قىزمەتى, احۋالى تۋرالى اڭگىمەلەدى. سونىمەن بىرگە, اۋىلداعى شارۋاشىلىق يەسى, «ابزال جانە ك» تولىق سەرىكتەستىگىنىڭ توراعاسى ابزال ەراليەۆ سەمينارعا قاتىسۋشىلارعا جىلى لەبىزىن ءبىلدىردى. ءوز كەزەگىندە قوناقتار دا ىستىق ىقىلاستارىن جەتكىزىپ جاتتى. ماسەلەن, رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ومىرزاق وزعانباەۆ اۋىل ازاماتتارىنىڭ ىسكەرلىگىنە, اۋىل تۇرعىندارىنىڭ اۋىزبىرلىگىنە ريزاشىلىعىن جەتكىزدى. بۇدان كەيىن سەمينارعا قاتىسۋشىلار قورقىت اتا اتىنداعى قىزىلوردا مەملەكەتتىك ۋنيۆەرسيتەتى باستاۋىش ارداگەرلەر ۇيىمىنىڭ جۇمىسىن تاماشالادى. ونداعى جاقسى تاجىريبەلەر مەن ۇلگىلى ىستەردى كورىپ, ءوزارا پىكىر الىستى. قىزىلوردا قالاسىنداعى ورتالىق الاڭدا جاستار ورتاسىندا سالاماتتى ءومىر سالتىن ناسيحاتتاۋ اكتسياسىنا دا قاتىستى. سونىمەن قاتار, سەمينارعا قاتىسۋشىلاردى وبلىس اكىمى قىرىمبەك كوشەرباەۆ قابىلداپ, وبلىس ەكونوميكاسى مەن الەۋمەتتىك جاعدايى جايلى كەڭىنەن باياندادى. الدا اتقارىلار جۇمىستار باعدارلاماسىمەن تانىستىردى.
– ارداگەرلەردىڭ جيىنىندا بۇدان باسقا قانداي ماسەلە تالقىلاندى؟
– رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ومىرزاق وزعانباەۆ «پرەزيدەنت ن.نازارباەۆتىڭ قازاقستان حالقىنا جولداۋىنىڭ مىندەتتەرىن جانە ارداگەرلەردىڭ ءVى سەزىنىڭ شەشىمدەرىن ورىنداۋ بارىسىنداعى ارداگەرلەر ۇيىمدارىنىڭ جۇمىسى تۋرالى» بايانداما جاسادى. ول ەلىمىزدىڭ قازىرگى تاڭدا ۇلكەن جەتىستىكتەرگە جەتىپ, دۇنيە جۇزىنە تانىمال, ستراتەگيالىق تۇرعىدان سەنىمدى ارىپتەس, بايسالدى دا سەرگەك مەملەكەت بولۋىنا ارداگەرلەردىڭ سىڭىرگەن ەڭبەگى زور ەكەنىن ايتتى. ارىگە بارماي-اق بۇگىنگى تاۋەلسىز قازاقستان مەملەكەتىنىڭ ىرگەتاسىن قالاۋ جولىندا مىڭداعان ارداگەرلەرىمىز ەلباسىنا كومەكشى بولا بىلگەنىن جەتكىزدى. قوعامنىڭ بارلىق سالاسىندا ەڭبەك ەتكەن ارداگەرلەر وزدەرىنىڭ باي تاجىريبەسىن, ءبىلىمى مەن بىلىگىن تاۋەلسىز ەلىمىزدىڭ اياعىنان تىك تۇرىپ كەتۋىنە جۇمساعانىن باياندادى.
بيىل رەسپۋبليكالىق ارداگەرلەر ۇيىمىنىڭ ورتالىق كەڭەسى قارتتار كۇنىندە قۇرمەتكە بولەنىپ, اتى اتالماعان, سىي كورمەگەن قاريا قالماسىن دەگەن تىلەكپەن «قامتىلماعان قالماسىن!» اتتى ۇندەۋ جاريالادى. ارداگەرلەر بارعا قاناعات ەتىپ ۇيرەنگەن جاندار, ولار باعالى سىيلىق دامەتپەيدى. ولارعا كەرەگى جىلى مەيىرىم مەن ىستىق ىقىلاس قانا. رەسپۋبليكالىق ارداگەرلەر ۇيىمى «نۇر وتان» پارتياسىنىڭ «جاس وتان» جاستار قاناتىمەن ىنتىماقتاستىق جونىندەگى مەموراندۋمعا قول قويعان بولاتىن-دى. وسى ورايدا جاستار بەلسەندىلىگىن ءتيىمدى پايدالانا ءبىلۋ دە كوپ ءىستى ىلگەرى جىلجىتارى انىق. جاستارعا پاتريوتتىق تاربيە بەرۋ, اتا-بابا داستۇرلەرىن ۇرپاققا امانات ەتۋ سەكىلدى ماسەلەلەردى باسشىلىققا العان كوپتەگەن وبلىستا ارنايى باعدارلامالار قابىلداندى. ماسەلەن, الماتى وبلىسىندا «اتادان – ۇلاعات», «اجەلەر – وتباسىنىڭ بەرەكەسى», «ەنەسى جاقسىنىڭ شاڭىراعى شايقالمايدى» اتتى فورۋمدار ۇيىمداستىرىلىپ, جاستار تاربيەسىنە جەتە ءمان بەرىلىپ كەلەدى. سونداي-اق ارداگەرلەر وزدەرىنىڭ ءجۇمىستارىن جالپاق جۇرتقا جەتكىزۋ ءۇشىن ءار جەردە وزدەرىنىڭ باسىلىمدارىن شىعارىپ جاتىر. مىسالى, قوستاناي, جامبىل جانە قىزىلوردا وبلىستارىندا ارداگەرلەردىڭ «ارداگەر», «عۇمىر-داريا», «سىر ارداگەرى» اتتى ءتول گازەتتەرى جارىق كورەدى.
ارينە, ارداگەرلەردىڭ اتقارعان ىستەرى مەن ولارعا جاسالعان قامقورلىق جايىندا ايتا بەرۋگە بولادى. دەگەنمەن, جەرگىلىكتى اكىمدىكتەر, مەكەمە, كاسىپورىن باسشىلارى, بيزنەس قۇرىلىمدارىنىڭ وكىلدەرى تاراپىنان ارداگەرلەرگە جاسالاتىن قامقورلىقتاردى ۇدايى, تۇراقتى تۇردە جاساتۋ ماقساتىندا «ارداگەرلەر تۋرالى» زاڭنىڭ قابىلدانۋى اسا قاجەت-اق. ەلباسى ءوزىنىڭ جولداۋىندا «مەملەكەت زەينەتكەرلەرگە, مۇگەدەكتەرگە, جۇمىس ىستەي المايتىندارعا, اۋرۋ بالالارعا ناقتىلى قولداۋ كورسەتۋگە تولىق جاۋاپتى», دەپ اتاپ كورسەتكەن بولاتىن. ولاي بولسا جوعارىداعى زاڭ قابىلدانىپ, قارتتارعا جاسالاتىن قامقورلىقتى ەسەلەپ ارتتىراتىن كۇن دە الىس ەمەس. تەك سول كۇنگە قارتتارىمىز امان-ساۋ جەتسىن دەيىك.
– اڭگىمەڭىزگە راحمەت.
اڭگىمەلەسكەن
ەرجان بايتىلەس,
«ەگەمەن قازاقستان».
قىزىلوردا.