دزيۋدودان قازاقستان قۇراماسىنىڭ بەلدى مۇشەلەرىنىڭ ءبىرى يسلام بوزباەۆ تەمىرتاۋدا اياعىنا وق ءتيىپ, اۋرۋحاناعا ءتۇسىپ قالدى. بۇل تۋرالى قازاقستان دزيۋدو فەدەراتسياسى ءباسپاسوز قىزمەتىنىڭ دەرەگىنە سۇيەنگەن Vesti.kz حابارلادى.
مۇنى سپورتشىنىڭ جەكە جاتتىقتىرۋشىسى سەرگەي دميتريەنكو جەتكىزگەن. ونىڭ ايتۋىنا قاراعاندا, قالاداعى تويحانالاردىڭ بىرىندە ۇيلەنۋ تويىندا وتىرعان دزيۋدوشى اتىلعان وقتان اياعىن جاراقاتتاپ العان.
رەستوراندا يسلام بوزباەۆ ءوزارا سوزگە كەلىسىپ, ءبىر-بىرلەرىنە وق اتقان ەكى توپتىڭ ورتاسىندا وتىرىپ قالعان. سونداي كەزدە وق ءتيىپ كەتكەن.
سپورتشى ازيا ويىندارىنىڭ 2010 جىلعى كۇمىس جۇلدەگەرى, ازيا چەمپيوناتىنىڭ ءفيناليسى. 2012 جىلى لوندون وليمپياداسىنا قاتىسسا, 2013 جىلى برازيلياداعى الەم چەمپيوناتىنا باردى. ال قىركۇيەك ايىندا الماتىدا گران-پري جەڭىپ الدى.
دامير قوجامقۇل.