شاعىن جانە ورتا بيزنەستىڭ وركەن جايۋىن قامتاماسىز ەتۋ, ۇقساتۋ كاسىپورىندارىن كوبەيتۋ, شەتكە شيكىزاتتىق ەمەس ءونىم شىعارۋدىڭ كولەمىن ۇلعايتۋ سياقتى وزەكتى ماسەلەلەر ەلىمىز ەكونوميكاسىن دامىتۋدىڭ كەپىلى ەكەنىن ەلباسى ايتىپ كەلەدى. الايدا, كاسىپكەرلىكتى دامىتۋدىڭ ىشكى تەتىكتەرىن جەتىلدىرۋ قاجەت-اق. وزگە دە شەشىمىن كۇتكەن پروبلەمالارى جەتەرلىك.
شاعىن جانە ورتا بيزنەستىڭ وركەن جايۋىن قامتاماسىز ەتۋ, ۇقساتۋ كاسىپورىندارىن كوبەيتۋ, شەتكە شيكىزاتتىق ەمەس ءونىم شىعارۋدىڭ كولەمىن ۇلعايتۋ سياقتى وزەكتى ماسەلەلەر ەلىمىز ەكونوميكاسىن دامىتۋدىڭ كەپىلى ەكەنىن ەلباسى ايتىپ كەلەدى. الايدا, كاسىپكەرلىكتى دامىتۋدىڭ ىشكى تەتىكتەرىن جەتىلدىرۋ قاجەت-اق. وزگە دە شەشىمىن كۇتكەن پروبلەمالارى جەتەرلىك.
سوندىقتان, قىركۇيەك ايىندا قازاقستان كاسىپكەرلەرىنىڭ ۇلتتىق پالاتاسىن قۇرۋ تۋرالى رەسپۋبليكا ۇكىمەتى مەن «اتامەكەن» وداعى» ۇلتتىق ەكونوميكالىق پالاتاسى بىرلەسكەن شەشىم جاساعان ەدى. قوستانايدا وسى ۇيىمنىڭ وڭىرلىك كەڭەسى قۇرىلدى. ونىڭ العاشقى وتىرىسىنا كاسىپكەرلەردىڭ ۇلتتىق پالاتاسىنىڭ باسقارما توراعاسى ابىلاي مىرزاحمەتوۆ قاتىستى. ول وبلىس كاسىپكەرلەرىنە جاڭادان قۇرىلعان قۇرىلىمنىڭ مىندەتىن ءتۇسىندىردى.
– ەلىمىزدە كاسىپكەرلەردىڭ ءتۇرلى قاۋىمداستىعى تولىپ جاتىر. الايدا, ولاردىڭ بارلىعى دا ءوز مۇددەلەرىن قورعاۋدا تاباندىلىق كورسەتە المايدى. وسى ورايدا ءتيىمدى, ىسىنەن ناتيجە كورىنەتىن ارىپتەس كەرەك بولدى. كاسىپكەرلەردىڭ ۇلتتىق پالاتاسى كاسىپكەرلەردىڭ مۇددەسىن قورعايدى, وتاندىق كاسىپورىندارعا قولداۋ جاسايدى, كاسىپتىك ءبىلىم بەرۋدى پىسىقتايدى, سىرتقى ەكونوميكالىق بايلانىستار مەن قىزمەتكە ىقپال ەتەدى, – دەدى ابىلاي مىرزاحمەتوۆ. توراعانىڭ ايتۋىنشا, كاسىپكەرلەر مۇددەسىن توعىستىراتىن بۇل ۇيىم جۇمىسىنىڭ تۇپكىلىكتى ناتيجەسى وڭىرلەردەگى ساپالى ەكونوميكالىق باعدارلامالاردان دا كورىنەتىن بولادى. ءار باعدارلاما ورنىمەن جۇزەگە اسقاندا ەكونوميكا قۋاتتانا, الەۋمەتتىك سالا كوركەيە تۇسەتىنى ايتپاسا دا تۇسىنىكتى.
ۇلتتىق كاسىپكەرلەر پالاتاسى وڭىرلىك كەڭەسىنىڭ توراعاسىنا قوستانايلىق كاسىپكەرلەر ۆاسيلي روزينوۆتى ءبىر اۋىزدان سايلادى. «يۆولگا-حولدينگ» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ۆاسيلي روزينوۆ رەسپۋبليكادا كاسىپكەرلىكتى دامىتۋ ىسىنە بەلسەنە قاتىسىپ ءجۇر. ول وسى سالاداعى كوپتەگەن وزەكتى ماسەلەنىڭ شەشىمىن تابۋىنا, تەتىكتەردى, جەتىلدىرۋگە جاڭا قۇرىلىمنىڭ ىقپالى ۇلكەن بولاتىندىعىنا سەنىمدى ەكەنىن ايتتى.
– اتقارۋشى بيلىكپەن ارىپتەستىككە كاسىپكەرلەردى كوپتەپ تارتۋدىڭ قاجەتتىلىگى تۋدى. مۇنىڭ بارلىعى زاڭمەن, تەتىكتەرمەن رەتتەلسە ەكى جاققا دا ءتيىمدى بولادى, بيزنەستىڭ قادامى اشىلادى. مەن «اتامەكەن» وداعىنىڭ» باستاۋىندا تۇرعانداردىڭ ءبىرىمىن. العاشقى كەزدە اۋىل شارۋاشىلىعى ونىمدەرىن وندىرۋشىلەردىڭ ءوز مۇددەسىن قوزعاعان سۇراۋلارىنا ەشقانداي جاۋاپ الا المايتىنبىز. كەيىننەن ءبىر قايناۋى ىشىندەگى زاڭدار, نورماتيۆتىك اكتىلەر كەلە باستادى. مىسالى, استىق تۋرالى زاڭ سونىڭ ايعاعى. ەلباسى نۇرسۇلتان نازارباەۆ ەسكەرتكەندەي, كاسىپكەرلەردىڭ شوعىرلانۋى, بىرىگۋى بۇل ەكونوميكانىڭ كۇش الۋىنا كەپىل بولادى. سوندىقتان, بۇگىنگى ۇلتتىق كاسىپكەرلىك پالاتاسىنىڭ, ونىڭ وڭىرلىك كەڭەسىنىڭ قۇرىلۋى الداعى ۋاقىتتا ناتيجەلى جۇمىس ىستەۋدىڭ ءتيىمدى قۇرالىنا اينالادى, – دەدى ۆاسيلي يوسيفوۆيچ.
ۇلتتىق كاسىپكەرلەر پالاتاسى وڭىرلىك كەڭەسىنىڭ اشىلۋىن وبلىس اكىمى نۇرالى سادۋاقاسوۆ بيزنەستى دامىتۋ جولىندا جۇمىس ىستەۋدىڭ, پروبلەمالاردى شەشۋدىڭ جاڭا ساتىسىنا كوتەرىلۋى دەپ باعالادى.
ءنازيرا جارىمبەتوۆا,
«ەگەمەن قازاقستان».
قوستاناي.