قازاقستان مەن رەسەيدىڭ اسكەري دارىگەرلەرىنىڭ بىرلەسكەن جۇمىسى نۇر-سۇلتان مەن الماتىداعى قورعانىس مينيسترلىگىنىڭ اسكەري گوسپيتالدارىندا جۇرگىزىلۋدە. رەسەيلىك ماماندار COVID-19-دان ەمدەۋدىڭ قازاقستاندىق حاتتاماسىن زەرتتەپ, كوروناۆيرۋستىق ينفەكتسياسى بار ناۋقاستاردى ەمدەۋ پروتسەسىنە قاتىسادى, سونداي-اق جۇقپالى اۋرۋلاردى دياگنوستيكالاۋ جانە ەمدەۋ سالاسىنداعى تاجىريبەلەرىمەن بولىسەدى.
«اسكەري قىزمەتشىلەر مەن ولاردىڭ وتباسى مۇشەلەرىنە كەڭەس بەرىلىپ, جەرگىلىكتى جەرلەردەگى اسكەري قىزمەتشىلەردە كوروناۆيرۋستىق ينفەكتسيانى ەرتە انىقتاۋدىڭ پراكتيكالىق داعدىلارى مەن ادىستەرىن پىسىقتاۋ جالعاسۋدا. كوروناۆيرۋستىق ينفەكتسيامەن سىرقاتتانۋشىلىق بويىنشا جاعدايدى ەپيدەميالىق باقىلاۋ جانە COVID-19-دى ەڭسەرگەن پاتسيەنتتەردى وڭالتۋ جونىندەگى جۇمىستى جالعاستىرۋ جوسپارلانۋدا», دەپ اتاپ ءوتتى باس اسكەري كلينيكالىق گوسپيتالى باستىعىنىڭ عىلىمي-تەراپيالىق جۇمىس جونىندەگى ورىنباسارى, پولكوۆنيك نازگۇل قالكاەۆا.
ءۇش اي ىشىندە قازاقستاننىڭ اسكەري دارىگەرلەرى كوروناۆيرۋستىق ينفەكتسيا كلينيكاسى مەن ونىڭ اسقىنۋلارىن زەرتتەدى. قازاقستاندىق كلينيكالىق ەمدەۋ حاتتاماسى مەن COVID-19 دياگنوستيكاسى ءارتۇرلى كليماتتىق جاعدايلاردا ەمدەۋ ەرەكشەلىكتەرىن قوسپاعاندا, رەسەيلىكتەرمەن بىردەي. رەسەي دارىگەرلەرى قازاقستاندىق اسكەري گوسپيتالداردىڭ ساپالى جابدىقتالۋىن جانە مامانداردى دايارلاۋدىڭ جوعارى دەڭگەيىن اتاپ وتۋدە.
ء«بىزدىڭ كەلۋىمىزدىڭ باعدارلاماسى اياسىندا تاجىريبە الماسۋ جانە كلينيكالىق جاعدايلاردى زەرتتەۋ بويىنشا سەمينارلار, كونفەرەنتسيالار وتكىزۋ قاراستىرىلعان. سونداي-اق وسى جاعدايدا ءبىر-بىرىنە ۇقساس بولاتىن قولدانىستاعى ەمدەۋ حاتتامالارى زەرتتەلەدى جانە سالىستىرۋ جۇرگىزىلەدى. ارىپتەستەرىمىزبەن ءبىر اپتا ىشىندە جۇمىس ىستەي كەلە قازاقستان رەسپۋبليكاسىنىڭ اسكەري-مەديتسينالىق قىزمەتىنىڭ وتە جاقسى دايىندىعىنا كوز جەتكىزدىك. ولار كوروناۆيرۋستىق ينفەكتسيانى ەمدەۋ ماسەلەلەرىندە وزىق حالىقارالىق تاجىريبەنى قولدانادى», دەيدى اكادەميك ن.ن.بۋردەنكو اتىنداعى باس اسكەري كلينيكالىق اۋرۋحانانىڭ №3 فيليالىنىڭ مەديتسينالىق قىزمەت پودپولكوۆنيگى ۆاديم پيۆوۆاروۆ.
ءار پاتسيەنتتى ەمدەۋدە جاسىنا جانە پاتولوگيالارىنا بايلانىستى ارقايسىسىنىڭ جەكە ەرەكشەلىكتەرى بولادى. ماسەلەن, ەندوكريندىك پاتولوگياسى جانە جۇرەك-تامىر جۇيەسى پروبلەمالارى بار 50 جاستان اسقان ادام اۋرۋدى قيىن وتكەرەدى.
بۇگىنگى تاڭدا الماتىداعى اسكەري كلينيكالىق گوسپيتالدا 800-دەن استام ادام ءساتتى ەمدەلدى. ولاردىڭ 300-ءى ورتاشا, اۋىر, وتە اۋىر حالدە بولدى جانە رەانيماتسيا بولىمىندە كومەك الدى. قازىرگى ۋاقىتتا كوروناۆيرۋستىق ينفەكتسياسى بار پاتسيەنتتەردىڭ سانى ازايىپ كەلەدى, ناۋقاستاردى قالپىنا كەلتىرۋدىڭ وڭ قارقىنى بار.
ەستەرىڭىزگە سالا كەتەيىك, ەكى ەلدىڭ قورعانىس ۆەدومستۆولارى باسشىلارىنىڭ اسكەري-مەديتسينالىق ىنتىماقتاستىق تۋرالى كەلىسىمىنە سايكەس, قازاقستانعا COVID-19 كوروناۆيرۋستىق ينفەكتسياسى بار پاتسيەنتتەردى ەمدەۋدە تاجىريبەسى بار رەسەيلىك انەستەزيولوگ-رەانيماتولوگتار, ينفەكتسيونيستەر, تەراپەۆتەر توبى كەلدى.