قيىن تاڭداۋعا قاراماستان «شاحتەردىڭ» فينالعا شىعاتىنىنا سەنەمىز

بۇگىن تۇندە ەۋروپا ليگاسىنىڭ جارتىلاي فينالدىق ويىندارى اياسىندا «ينتەر» (يتاليا) «شاحتەرگە» (ۋكراينا) قارسى الاڭعا شىعادى. اتالعان كەزدەسۋدى «Qazsport» تەلەارناسى (نۇر-سۇلتان ۋاقىتىمەن ساعات 00:50-دە) كورسەتەدى.

قاتارىنان ون ويىندا جەڭىلىس كورمەگەن ميلاننىڭ «ينتەر» كومانداسى بۇل جولى دا جەڭىستى جولىن جالعاستىرعىسى كەلەتىنى انىق. الايدا ميلاندىقتاردىڭ قارسىلاسى «شاحتەر» بيىلعى ەۋروپا ليگاسىنداعى مىقتى ۇجىمداردىڭ ءبىرى. سوندىقتان ميلاندىقتار ءۇشىن بۇل كەزدەسۋ قاي جاعىنان الىپ قاراساق تا قيىنعا سوعادى. ويىن الدىندا «ينتەردىڭ» باس جاتتىقتىرۋشى انتونيو كونتە بىلاي دەپتى: ء«بىز «شاحتەردى» قۇرمەتتەۋىمىز كەرەك. ءبىز بىرنەشە جىل بويى بيىك جەتىستىككە جەتكەن, جاقسى دايىندالعان كوماندامەن وينايمىز. «شاحتەر» – ەۋروپا ليگاسىنداعى ەڭ مىقتى كوماندا. بىراق ءبىز دە جارتىلاي فينالعا كەزدەيسوق جەتكەن جوقپىز, فينالعا وتكىمىز كەلەدى».

كوبىنەسە برازيليالىق ويىنشىلارعا سەنىم ارتاتىن «شاحتەر» (كوماندادا 10 برازيليالىق ويىنشى بار) جارتىلاي فينالعا جەتكەننەن كەيىن كوپ ماماندار دونەتسكىنىڭ كومانداسىن فاۆوريتتەر قاتارىنا قوسا باستادى. ءتىپتى, 2008/2009 جىلعى جەتىستىگىن قايتالاۋى مۇمكىن دەگەندەر دە بار. بىراق بارلىعى ۋكراينالىقتاردىڭ ءوز قولدارىندا. ەگەر دە ولار «ۆولفسبۋرگ» (3:0), «بازەلگە» (4:1) قارسى شىققانداي ويناسا, وندا ولار ءسوزسىز فينالدا. بۇل جايىندا كوماندانىڭ باس باپكەرى دە بىلاي دەيدى: «بۇل ماتچقا ءبىز ادەتتەگىدەي دايىندالىپ جاتىرمىز. وتە كۇشتى كوماندامەن كەزدەسەتىنىمىزدى بىلەمىز. كونتە باپكەر ءارتۇرلى كۇردەلى تاكتيكاعا قۇرا بىلەتىن باپكەر. الايدا, ءبىز وعان دايىنبىز».

ستاتيستيكا

– قارسىلاستار 2005/06 چەمپيوندار ليگاسىنىڭ ىرىكتەۋ كەزەڭىندە ءوزارا وينادى: «ينتەر» قوناقتا 2:0 ەسەبىمەن جەڭىسكە جەتتى, ميلاندا 1:1 ەسەبىمەن تەڭ ءتۇستى;

– «ينتەر» ۋەفا رەيتينگىندە 39-ورىندا, «شاحتەر» – 14-ورىندا;

– «ينتەر» چەمپيوندار ليگاسىندا ءوز توبىندا ءۇشىنشى ورىن الدى, سودان كەيىن «لۋدوگورەتس», «حەتافە» جانە «بايەردى» ەۋروپا ليگاسىنان شىعاردى»;

– «شاحتەر» چەمپيوندار ليگاسىندا ءوز توبىندا ءۇشىنشى ورىنعا يە بولدى, سودان كەيىن ەۋروپا ليگاسىندا «بەنفيكا», «ۆولفسبۋرگ» جانە «بازەلدى» ارتتا قالدىردى;

– «ينتەر» ۋەفا كۋبوگىن ءۇش رەت جەڭىپ الدى;

– «شاحتەر» 2008/09 ماۋسىمدا ۋەفا كۋبوگىن جەڭىپ الدى;

– «ينتەر» ءتۋرنيردىڭ جارتىلاي فينالىندا جەتى رەت ويناپ, ءتورت رەت فينالعا شىقتى;

– «شاحتەر» جارتىلاي فينالعا ەكى رەت جەتىپ, ءبىر رەت فينالعا شىقتى;

Egemen.kz بولجامى

«شاحتەردىڭ» شابۋىلشىلارى وتە ساۋاتتى ويناسا, «ينتەردە» فۋتبول «جۇلدىزدارى» جينالعان. مۇنىڭ ءبارى بىزگە ەكى كوماندا اراسىنداعى ماتچ قىزىقتى وتەتىنىنە ۋادە ەتەدى. بىراق, قيىن تاڭداۋعا قاراماستان «شاحتەردىڭ» فينالعا شىعاتىنىنا سەنەمىز.