كەشە, 12 قازان كۇنى قىزىلوردا قالاسىنىڭ 195 جىلدىعىنا ارنالعان مەرەيتوي بارىسىندا «ارالازوۆاگروماش» بك جشس كاسىپورنىندا قۇراستىرىلىپ شىعارىلعان ءبىرنشى «IMT Baikonur-549» تراكتورىنىڭ تۇساۋى كەسىلدى. بۇل تۋرالى وبلىس اكىمىنىڭ ءباسپاسوز قىزمەتىنەن حابارلادى.
«ۇستىمىزدەگى جىلدان باستاپ سەربيا ەلىنىڭ بەلگراد تراكتور زاۋىتىمەن بىرلەسە تراكتور قۇراستىرۋ جۇمىستارى قولعا الىنعان بولاتىن. ول ءۇشىن قىزىلورداعا 15 دانا تراكتوردىڭ جابدىقتارى جەتكىزىلدى. تۇساۋكەسەرگە سەربيا رەسپۋبليكاسىنان كەلگەن ارنايى دەلەگاتسيا قۇرامىندا سەربيا مەملەكەتىنىڭ قازاقستانداعى ۋاقىتشا وكىلى برانيسلاۆ رادويچيچ جانە بەلگراد «IMT AD» تراكتور زاۋىتىنىڭ باس ديرەكتورى زوران رادوسلاۆليەۆيچ بولدى. شەتەلدىك دەلەگاتسيانى وبلىس باسشىسى قىرىمبەك كوشەرباەۆ, قالا مەرى نۇرلىبەك نالىباەۆ جانە «بايقوڭىر» ااك» ۇك اق ءتورايىمى جانات سامات باستاعان توپ قارسى الدى», - دەلىنگەن حابارلامادا.
جوبانىڭ جەتەكشىسى اسحات سۇلەيمەنوۆ وبلىس اكىمىنە كۇرىشتى دەستەلەپ ورۋ جاتكاسىن جانە ءشوپ تايلاعىش ماشيناسىنىڭ قۇراستىرۋ جوباسىمەن تانىستىردى, العاشقى قۇراستىرىلعان تراكتوردى كورسەتتى.
ءوز رەتىندە, سىر ەلىنىڭ باسشىسى قىزىلوردادا جينالعان ءنومىرى ءبىرىنشى «Baikonur IMT-549» تراكتوردىڭ كىلتىن «اگروحولدينگ بايقوڭىر» جشس ديرەكتورىنا تابىستادى. ال اسحات سۇلەيمەنوۆ وبلىس اكىمى قىرىمبەك كوشەرباەۆقا العاشقى قۇراستىرىلىپ شىعارىلعان تراكتوردىڭ ءنومىرى كورسەتىلگەن ەستەلىك بەلگىنى (شيلديكتى) تاپسىردى. تۇساۋكەسەر سوڭىندا وبلىس اكىمى كاسىپورىن ۇجىمىنىڭ ەڭبەكتەرىنە تابىس تىلەپ, الداعى ۋاقىتتا دامي بەرۋلەرىنە تىلەكتەستىگىن ءبىلدىردى.
سەرىك ق ۇلىمباي.