ورىستىڭ ۇلى اقىنى الەكساندر پۋشكيننىڭ باسپا جۇزىنەن جاڭادان شىققان شىعارمالار جيناعىنىڭ وقىرمان قاۋىمدى تاڭ قالدىرىپ, ءارى-ءسارى ەتىپ قويۋ ابدەن ىقتيمال. بۇل كوپ تومدىقتىڭ وسىنداي جۇمباق تۇستارى دا بار كورىنەدى. بۇل تۋرالى «گازەتا.رۋ» سايتى حابارلادى.
مۇنداعى بار ماسەلە مىنادا, ۇستىمىزدەگى جىلعى 30 قىركۇيەكتەن باستاپ ساۋداعا تۇسكەن جاڭا شىعارمالار جيناعىندا اقىننىڭ بۇرىن ەشقاشان باسپا ءجۇزىن كورمەگەن ادەپسىز ولەڭدەرىنىڭ باسىن قۇرايتىن كىتاپ تا بار كورىنەدى. وسى ارقىلى قالىڭ وقىرمان ەندى ونى مۇلدە باسقاشا قىرىنان كورىپ قالاتىنى انىق.
«سلوۆو/Slovo» باسپاسىنان 11 توم بولىپ شىققان بۇل كىتاپتار پۋشكيننىڭ ولەڭدەرىنىڭ, پروزالارىنىڭ, دراماتۋرگياسىنىڭ باسىن قۇرايدى. سولاردىڭ اراسىندا اقىننىڭ اۆتورلىق تىنىس بەلگىلەرى مەن ورفوگرافياسى سول قالپىندا ساقتالىپ بەرىلگەن 1815-1837 جىلدار ارالىعىندا جازعان حاتتارى دا بار. مىنە, وسى حاتتاردىڭ اراسىندا ونىڭ الگىندەگىدەي ءنورماتيۆتى لەكسيكانىڭ تالاپتارىنا سايكەس كەلمەيتىن ولەڭدەرى كەلتىرىلگەن.
ايتقانداي, بۇل «تسەنزۋرادان وتپەيتىن» پۋشكيندى باسپاعا دايىنداۋدىڭ ءبىرىنشى دەرەگى ەمەس ەكەن. ءبىىرنشى رەت وسىنداي تالاپ 1906-1911 جىلدارى جاسالىپ, ونىڭ «ادەپسىز» حاتتارىن ۇسىنعان العاشقى كىتاپتار شىعىپتى. سول كەزدە يمپەراتور عىلىم اكادەمياسىنىڭ ارنايى وكىمىمەن اقىننىڭ ەكى تومى شىعارىلعان. ولاردىڭ ءبىرى تازا شىعارمالارىن قۇراسا, ەكىنشىسى تۇپنۇسقامەن تولىق سايكەس كەلەتىن ۆارينتتا دايىندالعان. بىراق «تسەنزۋرادان وتپەيتىن» توم بارىنشا شەكتەۋلى تارالىممەن شىققان. ونىڭ سانى 10 دانادان اسپاعان. بۇلاردىڭ سوڭعىسى تەك يمپەراتورلىق عىلىم اكادەمياسىنىڭ مۇشەلەرىنە عانا بەرىلگەن.
رەۆوليۋتسيا جانە ازامات سوعىسى جىلدارىندا ۇل عالىمداردىڭ كىتاپحانالارى تالان-تاراجعا تۇسكەن. سول كەزدە پۋشكيننىڭ حاتتارىنان قۇرالعان سيرەك تومنىڭ بىرەۋى ۆلاديمير لەنيننىڭ قولىنا تيەدى. وسىنىڭ ارقاسىندا بۇل توم وسى كۇندەرگە جەتكەن. جاڭا توم, البەتتە, وسىدان الىنعان.
مۇرات ايتقوجا.