«شپارگالكا» شالىپ جىعادى, ءبىلىم الىپ شىعادى

تاياۋدا قاراعاندى وبلىستىق سىبايلاس جەمقورلىققا قار­سى قىزمەتتىڭ «Antikor» ورتا­لىعىندا وتكەن بريفينگتە جەرگىلىكتى ءبىلىم بەرۋ باسقار­ماسىنىڭ باسشىسى ەسەنعازى يمانعاليەۆ ۇبت سىناعى كە­زىندە تۇلەكتەر تاراپىنان بول­عان ءتارتىپ بۇزۋشىلىقتار جا­يىندا اڭگىمە ءوربىتتى.

جالپى, قاراعاندى وبلىسىندا ۇبت سىناعى 20 ماۋسىمدا باستاۋ العان, شىلدە ايىنىڭ 5 كۇنى اياقتالۋى ءتيىس. بۇگىندە ءوڭىر بويىنشا 6431 تۇلەك 15 بەكەتتىڭ بازاسىندا ۇيىمداستىرىلعان ەمتيحان الامانىندا باق سىناۋدا. قانشا جەردەن ايتىپ تۇسىندىرسە دە, قورقىتىپ ەسكەرتسە دە, تۇلەكتەر سىناق ءتارتىبىن بۇزۋدى توقتاتار ەمەس. كوبىسى ەمتيحانعا رۇقسات ەتىلمەگەن زاتتاردى وزدەرىمەن بىرگە الا بارادى. قولىنا ۇستاپ ەمەس, ارينە. تىعىپ, جاسىرىپ الىپ وتەدى.

– وكىنىشكە قاراي, ءتارتىپتى بۇزعان 12 تالاپكەردى ەمتيحان زالىنان قۋىپ شىعۋعا تۋرا كەلدى, – دەيدى ەسەنعازى يمانعاليەۆ. تەستىلەۋ سىناعى كەزىندە تى­يىم سالىنعان زات پايدالانىلسا, وندا تۇلەكتىڭ ناتيجەسى جارامسىز دەپ سانالادى دا, ول بالا بيىل ۇبت تاپسىرۋ قۇقىعىنان ايىرىلادى.

مىنە, ءتارتىپ وسىلايشا قا­تاڭ­داتىلعان. مۇنى تۇلەك قانا ەمەس, ءاربىر اتا-انا ءبىلۋى ءتيىس جانە تالاپتى مۇلتىكسىز ورىنداۋى قاجەت. تىعىپ اپارعان ۇيالى تەلەفوندى پايدالانعان نەمەسە «شپارگالكا» قولدانعان تۇلەككە ەندى اياۋشىلىق دەگەن بولمايدى. «وكىنىشتىسى سول, وسىنداي تەرىس ارەكەتكە بارعان جاستار وزدەرىنىڭ بولاشاعىنا ولشەۋسىز زيان كەلتىرۋدە...», دەپ قىنجىلىس ءبىلدىردى ە.يمان­عاليەۆ.

قازىر تەستىلەۋ سىناعى وتەتىن ءدارىسحانالاردىڭ بارىنە بەينەكامەرالار قويىلعان, قۇرامىندا سىبايلاس جەمقورلىققا قارسى قىزمەتتىڭ وكىلدەرى مەن قوعام قايراتكەرلەرى ەنگەن مونيتورينگ توبى دا جاعدايدى ءجىتى باقىلاپ وتىرادى. «بەينەماتەريالدارعا ۇدايى مونيتورينگ جاسالادى. ەڭ ابزالى, مۇنداي جاعدايدا ءاربىر تالاپكەر ءوز كۇشىنە سەنۋى كەرەك!», دەيدى وبلىستىڭ باس مۇعالىمى.

قازىر «جامان تۇماۋدىڭ» ءورشىپ تۇرعانى بەلگىلى. وسىعان بايلانىستى, بارلىق اتا-اناعا ەمتيحان تاپسىرىپ جاتقان بالاسىن ۇبت بەكەتىنىڭ ماڭىندا كۇتىپ وتىرۋعا تىيىم سالىنعان. ەسەسىنە, اركىمنىڭ ۇيىندە وتى­رىپ-اق, ۇبت سىناعىنىڭ بارىسىن ونلاين رەجىمىندە كورۋ­گە مۇمكىندىك جاسالىنعان. مۇ­نىڭ ءوزى سانيتارلىق-ەپيدە­ميالىق جاعدايدى ۋشىق­تىرۋعا جول بەر­مەۋ ءۇشىن ويلاس­تىرىلعان ءىس-شارا ەكەنىن ءاربىر اتا-انا سانا­لى تۇردە سەزىنۋى ءتيىس.

پاندەميا دەمەكشى, ۇبت وتكىزۋ بەكەتتەرىندە كۇشەيتىلگەن مەديتسينالىق-سانيتارلىق شارالار قاراستىرىلعان. دارىسحا­ناعا كىرەر الدىندا تالاپكەر اياق كيىمىن, ودان كەيىن قولىن تازالاپ, دەزينفەكتسيالىق وڭ­دەۋ­دەن وتەدى. سونىمەن قاتار ولار ءۇشىن تەرموباقىلاۋ دا ۇيىمداستىرىلعان. مەديتسي­نالىق-سانيتارلىق تەكسەرۋدەن وتكەننەن كەيىن, تالاپكەرلەرگە رەسپيراتورلىق نەمەسە ءبىر رەت قولدانىلاتىن ماسكالار بەرىلەدى. ايتقانداي, بيىل اتا-انالار مەن تۇلەك­تەردىڭ ءوتىنىشى بويىنشا, ۇبت سى­نا­عىنىڭ ۋاقىتى 10 مينۋت­قا ۇزارتىلىپ, ءتورت سا­عات­قا تەڭ بولدى. البەتتە بيىل­عى ۇبت تالاپتارىنىڭ قا­تاڭ بول­عانىن, ونىڭ ۇستىنە سى­ناق­تىڭ پاندەميا كەزەڭىنە ساي­كەس كەلىپ, سونىڭ سالدارىنان تا­لاپكەرلەردىڭ  بويىندا ىندەت جۇقتىرىپ المايمىز با دا دەگەن شامادان تىس قوبالجۋدىڭ بايقالعانىن ايتىپ,  مۇڭ شاق­قان اتا-انالار دا بولدى. بى­راق زاڭ جانە كارانتين تالابى بارىنە دە ورتاق بولعاننان كەيىن, مۇنداي سىناققا تۇلەكتەر پسيحولوگيالىق تۇرعىدا دايىن بولۋى كەرەك-ءتىن.

ۇبت سىناعى كەزىندە كۇت­پەگەن وقيعالار مەن ءتۇرلى ما­سە­لەلەردىڭ بولۋى ابدەن ىقتي­مال. مىنە, وسىنداي جاعدايعا ساقاداي-ساي بولۋ ءۇشىن تەس­تىلەۋ سىناعى ءوتىپ جاتقان بە­كەت عيماراتىنىڭ ىشىندە جە­دەل جاردەم مەن مەديتسينا قىزمەتكەرلەرىنىڭ جانە جەر­گىلىكتى پوليتسيا وكىلدەرىنىڭ كەزەكشىلىگى ۇيىمداستىرىلعان.

بيىل ۇبت سىناعىنان سۇرىن­گەن تۇلەكتەر ەكىنشى مارتە باق سىناۋ مۇمكىندىگىنە يە بولادى. ەمتيحاننان «قۇلاسا» دا, جوعارى وقۋ ورنىنا تۇسۋ­دەن ءۇمىتىن ۇزبەگەن ورەن الدى­مىزداعى تامىز ايىندا نەمەسە 2021 جىلدىڭ قاڭتارىندا اقىلى نەگىزدە تەستىلەۋدەن وتە الادى. بار بولعانى 2242 تەڭگە تولەسە جەتىپ جاتىر. سونان سوڭ تاعى قايتالاپ ايتامىز, وقىپ ادام بولام دەگەن العاداي جاستىڭ قوينىنا جاسىرعان «شپارگالكاعا» ەمەس, ءبىلىمىنىڭ شاپاعاتىنا جۇگىنگەنى ابزال بولار ەدى.

قاراعاندى وبلىسى