ەل پرەزيدەنتى قاسىم-جومارت توقاەۆ كوروناۆيرۋس ىندەتىنىڭ تارالۋىنا قارسى شارالار قابىلداۋ جونىندەگى كەڭەستە وزدەرىنە جۇكتەلگەن مىندەتتەردى شالا ورىنداعان اكىمدەر مەن ۇكىمەت مۇشەلەرىنىڭ جۇمىسىن سىنعا العان ەدى. مەملەكەت باسشىسى جۇمىسىنا سالعىرت قاراعانى ءۇشىن شىمكەنت قالاسىنىڭ اكىمى م.ايتەنوۆكە دە سوگىس جاريالادى.
مەملەكەت باسشىسىنىڭ سىنىنان دەر كەزىندە ناتيجە شىعارۋدى كوزدەگەن قالا اكىمى ەپيدەميالىق جاعدايدى قالىپقا كەلتىرۋ ءۇشىن بىرقاتار ناقتى جۇمىستارعا كىرىسىپ كەتتى. اتاپ ايتار بولساق, شىمكەنت قالاسىندا رەسپۋبليكا بويىنشا العاش رەت 51 كۇندىزگى ستاتسيونار اشىلدى. سونىڭ ءبىرى قالاداعى جەڭىل اتلەتيكا سپورت كەشەنى ناۋقاستاردى قابىلدايتىن «ۋاقىتشا» ەمدەۋ ورتالىعىنا اينالدى. اتالعان سپورت كەشەنىنەن قوسىمشا 450 ورىندىق كۇندىزگى ستاتسيونار دايىندالدى.
ورتالىقتا جرۆي جانە پنەۆمونيا جۇقتىرعان ناۋقاستار ەم قابىلدايدى. مۇندا 450 كەرەۋەت ورنالاستىرىلدى. ونىڭ 350-ءى وقمپۋ جاتاقحاناسىنان جەتكىزىلسە, 100 كەرەۋەت دەمەۋشىلەر ەسەبىنەن الىندى. بۇگىندە دانەركەرلەۋ جۇمىستارى قىزۋ ءجۇرىپ جاتىر. 1 شىلدەگە دەيىن 450 ورىن تولىعىمەن دايىن بولادى.
سونىمەن قاتار قاجەتتى ءدارى-دارمەكتەردى ساقتاۋعا جەتى توڭازىتقىش جەتكىزىلدى. مامانداردىڭ ايتۋىنشا, كۇندىزگى ستاتسيونارعا 50 دارىگەر, 75 مەيىربيكە, 20 سانيتار قىزمەتكەرى قاجەت بولادى. سپورت كەشەنىندەگى جۇمىستى ۇيلەستىرۋگە قالاداعى №5 ەمحانا ۇجىمى جۇمىلدىرىلادى. ايتا كەتۋ كەرەك, بۇل ستاتسيونار تاڭعى 8-دەن كەشكى 20.00-گە دەيىن جۇمىس ىستەيدى.
شاھارداعى ەپيدەميالىق جاعدايدى قالپىنا كەلتىرۋ بويىنشا جۇمىستار مۇنىمەن عانا شەكتەلىپ قالعان جوق. سامال-3 شاعىن اۋدانىنداعى جاڭا مەكتەپتەن – 400 ورىندىق, پوليتەحنيكالىق كوللەدجىنەن – 400 ورىن, ۇوس ارداگەرلەرى ورتالىعىنان 100 ورىندىق پروۆيزورلى ورىندار اشىلدى. ءبىر سوزبەن ايتقاندا, قالاداعى بوس تۇرعان عيماراتتار توتەنشە جاعداي كەزىندەگى قاجەتتىلىككە قاراي ناۋقاستاردىڭ ءومىرىن ساقتاپ قالۋ ءۇشىن «ۋاقىتشا» اۋرۋحانالارعا اينالا باستادى. ناتيجەسىندە, قالادا ينفەكتسيالىق دەرتكە شالدىققان ناۋقاستارعا مەديتسينالىق كومەك كورسەتۋ ەكى ەسەگە كۇشەيدى. شىمكەنت قالاسىنىڭ اكىمى مۇرات ايتەنوۆ اقپاراتتىق-كوممۋنيكاتسيالىق ورتالىقتا وتكەن بريفينگتە سالا باسشىلارىنا وسى ماسەلە بويىنشا ناقتى مىندەت جۇكتەدى. اتالعان تاپسىرما دەر كەزىندە ورىندالىپ, قالاداعى ەپيدەميالىق جاعداي بىرتە-بىرتە رەتكە كەلە باستادى.
«ماۋسىم ايىنىڭ سوڭىندا شىمكەنت قالاسىندا جۇقپالى اۋرۋمەن اۋىرعان ناۋقاستار سانى كۇرت ءوستى. پنەۆمونيامەن اۋىرعاندار 5,8 ەسەگە, ال جرۆي-مەن اۋىرعان ناۋقاستار سانى 2 ەسەگە ارتتى. وسى جاعدايعا بايلانىستى جەدەل جاردەم قىزمەتىنە قوڭىراۋ شالاتىن تۇرعىندار سانى 5 ەسەگە كوبەيدى. ورتا ەسەپپەن ءبىر كۇندە 2100-دەن اسا شاقىرتۋ تۇسە باستادى. بۇل شاقىرتۋلارعا ءدال ۋاقىتىندا قىزمەت كورسەتۋ ءۇشىن قالا باسشىسىنىڭ تاپسىرماسىمەن جەدەل تۇردە پروۆيزورلى ورىندار اشىلدى. بۇگىندە قالادا بارلىق مەديتسينالىق قۇرال-جابدىقتارمەن قامتىلعان 2870 توسەك-ورىن بار. ونىڭ 650-ءى جۇقپالى اۋرۋحانالارعا, 2220-سى پروۆيزورلى ورىنعا ارنالعان. ياعني ينفەكتسيالىق اۋرۋعا شالدىققان ناۋقاستار ءۇشىن ورىن جەتكىلىكتى. دەگەنمەن, جاعداي قالىپقا كەلسە دە, رەزەرۆتىك پروۆيزورلى ورىندار دايىندالۋدا. جەڭىل اتلەتيكالىق سپورت كەشەنىنەن 150 ورىن دايىندالدى. بۇل ورىندار 1 شىلدە كۇنى 450 ورىنعا جەتپەك», دەيدى قالالىق دەنساۋلىق ساقتاۋ باسقارماسىنىڭ باسشىسى ءرۇستام الباەۆ.
ايتا كەتەرلىگى, شىمكەنت قالاسىندا حالىقتىڭ دەنساۋلىعىن نىعايتۋ ماقساتىندا كۇندىزگى ستاتسيونار سانى ارتىپ, مەديتسينالىق ماماندار دەمالىسسىز قىزمەت كورسەتۋدە. ال بارلىق اۋرۋحانالار مەن ەمحانالارعا ءدارى-دارمەك ءۇزىلىسسىز جەتكىزىلۋدە.
شىمكەنت