مەملەكەت باسشىسى قاسىم-جومارت توقاەۆ ۇكىمەت باسشىسى اسقار ءماميننىڭ ەسەبىن تىڭدادى. بۇل تۋرالى اقوردانىڭ ءباسپاسوز قىزمەتى حابارلادى.
قازاقستان پرەزيدەنتىنە بيىلعى 5 ايداعى ەلىمىزدىڭ الەۋمەتتىك-ەكونوميكالىق دامۋى, كوروناۆيرۋس ىندەتىنىڭ تارالۋىنا قارسى كۇرەس جۇمىستارى جانە سانيتارلىق-ەپيدەميولوگيالىق احۋالدى جاقسارتۋ جونىندە ەسەپ بەرىلدى.
مەملەكەت باسشىسىنا داعدارىسقا قارسى شارالاردىڭ جۇزەگە اسىرىلۋى, 2020 جىلدىڭ سوڭىنا دەيىن ەكونوميكالىق ءوسىمدى قالپىنا كەلتىرۋ جونىندەگى كەشەندى جوسپاردىڭ ورىندالۋى جانە 2025 جىلعا دەيىنگى ستراتەگيالىق دامۋ جوسپارىنىڭ ازىرلەنۋ بارىسى تۋرالى باياندالدى.
اسقار مامين قاسىم-جومارت توقاەۆقا كوروناۆيرۋس پاندەمياسىنىڭ سالدارىنان الەمدەگى ىسكەرلىك بەلسەندىلىكتىڭ بىردەن تومەندەۋىنە بايلانىستى بيىلعى قاڭتار مەن مامىر ارالىعىندا ۇلتتىق ەكونوميكانىڭ ءوسۋ قارقىنى, بىلتىرعى وسى كەزەڭمەن سالىستىرعاندا, 1,7% تومەندەگەنىن ايتتى. ۇكىمەت باسشىسىنىڭ مالىمەتى بويىنشا, ەكونوميكانىڭ بىرقاتار سالالارىندا, اتاپ ايتقاندا, تاۋ-كەن ءوندىرىسى, وڭدەۋ, اۋىل شارۋاشىلىعى, قىزمەت كورسەتۋ سالالارىندا, سونداي-اق, نەگىزگى كاپيتالعا ينۆەستيتسيا تارتۋ باعىتىندا ءوسىمنىڭ وڭ قارقىنى بايقالادى.
اسقار مامين بارلىق سالا بويىنشا كوكتەمگى ەگىس جۇمىستارىنىڭ تولىق اياقتالعانى تۋرالى دا مالىمەت بەردى.
بۇدان بولەك پرەمەر-مينيستر پرەزيدەنتكە حالىقتى جۇمىسپەن قامتاماسىز ەتۋدىڭ كەشەندى شارالارى بيىل ەلىمىزدىڭ 1,22 ميلليون ازاماتىن قامتيتىنىن جەتكىزدى.
قازاقستان پرەزيدەنتى ەلىمىزدىڭ ءبىرىنشى جارتىجىلدىقتاعى دامۋ قورىتىندىلارىن تالقىلاپ, داعدارىس سالدارىن ەڭسەرۋ مىندەتىن قويۋ ءۇشىن بيىلعى شىلدە ايىندا ۇكىمەتتىڭ كەڭەيتىلگەن وتىرىسىن وتكىزۋدى جوسپارلاپ وتىر.
كەزدەسۋ قورىتىندىسى بويىنشا قاسىم-جومارت توقاەۆ اسقار مامينگە ەكولوگيالىق ءتۋريزمدى دامىتۋ جونىندە جانە باسقا دا بىرقاتار ناقتى تاپسىرما بەردى.