قازاقستان انگليانىڭ جوعارعى سوتىندا ۇلتتىق بانك اكتيۆتەرىنە قاتىستى پروتسەستە جەڭىسكە جەتتى. بۇل تۋرالى ادىلەت مينيسترلىگىنىڭ ءباسپاسوز قىزمەتى حابارلادى.
«قازاقستان رەسپۋبليكاسى مەن قازاقستان ۇلتتىق بانكى Bank of New York Mellon (بۇدان ءارى – BNYM) لوندوندىق فيليالىندا ورنالاسقان جارتى ميلليارد دوللاردان استام ۇلتتىق بانكتىڭ اقشالاي قاراجاتىنا تىيىم سالۋ ءۇشىن ارەكەتتەر جاساعان ەكى مولداۆاندىق بيزنەسمەندەردى – اناتول جانە گابريەل ءستاتيدى تاعى دا ءبىر جەڭىلىسكە ۇشىراتتى. ۆەدومستۆودا ەسكە سالعانداي, 2017 جىلدىڭ قازان ايىندا ستاتي تارابى بەلگيالىق سوتتاردان BNYM-گە جولدانعان اتقارۋ بۇيرىعىن الدى. سونىڭ نەگىزىندە BNYM 22 ملرد اقش دوللارىن قۇرايتىن ۇلتتىق بانك شوتتارىنا تىيىم سالدى. ادىلەت مينيسترلىگى مەن ۇلتتىق بانك تىيىم سالىنعان قاراجات سوماسىن 530 ملن اقش دوللارىنا دەيىن تومەندەتتى. 2018 جىلدىڭ 25 مامىرىندا بەلگيالىق سوت داۋدى شەشۋ ءۇشىن انگليانىڭ سوتىنا سىلتەمە جاسادى. اعىلشىن سوتى بۇل ماسەلەنى تورتكۇندىك سوت پروتسەسىندە قاراپ, 2020 جىلعى 22 ساۋىردە شەشىم شىعاردى.
ستاتي زاڭگەرلەرى اعىلشىن سوتىنا 530 ملن اقش دوللارى مولشەرىندەگى اقشا قاراجاتى قازاقستان رەسپۋبليكاسى الدىنداعى BNYM بەرەشەگىن قۇراپ, بەلگيالىق تىيىم سالۋدى قولدانۋدىڭ اياسىنا كىرەدى دەپ حابارلادى.
سۋديا تير ولاردىڭ دالەلدەرىن قابىلداماي تاستاپ, مىناداي شەشىم قابىلدادى: (i) قازاقستان رەسپۋبليكاسى BNYM مەن ۇلتتىق بانك اراسىنداعى جاھاندىق دەپوزيتارلىق كەلىسىمنىڭ تارابى بولىپ تابىلمايدى, (ii) جاھاندىق دەپوزيتارلىق كەلىسىم بويىنشا BNYM مىندەتتەمەلەرى تەك قانا ۇلتتىق بانككە تيەسىلى (قازاقستان رەسپۋبليكاسىنا ەمەس), (iii) جاھاندىق دەپوزيتارلىق كەلىسىمگە سايكەس BNYM-ءنىڭ قازاقستان رەسپۋبليكاسىنا اقشالاي قاراجاتتى تولەۋ بويىنشا مىندەتتەمەلەرى جوق, (iv) قازاقستان رەسپۋبليكاسىنىڭ جاھاندىق دەپوزيتارلىق كەلىسىمگە سايكەس BNYM دەپوزيتتەرىندەگى اقشا قاراجاتىنا قاتىستى BNYM-گە قانداي دا ءبىر تالاپ قويۋ قۇقىعى جوق» دەلىنگەن حابارلامادا.