وڭتۇستىك كورەيا تۇرعىندارى ەرلىك جاساعان قازاق جىگىتىن ماراپاتتاۋدى ۇسىندى

«حابار24» تەلەارناسىنىڭ حابارلاۋىنشا, تۇركىستاندىق ءالي وتباسىمەن بىرگە 2017 جىلى يان يان شيپاجايلى قالاشىعىنا جۇمىس ىزدەپ كەلگەن. وقيعا وتكەن ايدا بولعان. 23 ناۋرىز كۇنى تۇنگى ساعات 11-دە ءتۇتىن ءيىسىن سەزگەن. سويتسە, كورشى پاتەرلەردىڭ بىرىندە ءورت شىققان.

ءورت بولعان بولمە ىشىندە ايەل قالىپ قالعان. ءالي ول بولمەنىڭ ەسىگىن اشا الماي, پاتەرگە گاز قۇبىرىمەن جانە تەلەكابەلمەن ورمەلەپ شىعىپ, ىشىنە كىرگەن. وكىنىشكە قاراي, ءورت شىققان پاتەردە بولعان ايەل كەيىننەن اۋرۋحانادا كوز جۇمعان. وتانداسىمىز وزگە كورشىلەرىن وياتىپ ۇلگەرگەن. سونىڭ ارقاسىندا ولار دەر كەزىندە سىرتقا شىعىپ, امان قالعان.

ءالي جاقىندا ۇيىنە قايتادى. رەيسى 1 مامىرعا جوسپارلانعان. الايدا, كورشىلەرى ونىڭ كەتكەنىن قالامايدى. سوندىقتان, وڭتۇستىك كورەيا پرەزيدەنتىنىڭ اتىنا حات جازىپ, جەرلەسىمىزدى ماراپاتقا ۇسىنۋ تۋرالى ءوتىنىش ءبىلدىرىپتى.

كورشىلەرى ەلدىڭ ادىلەت مينيسترلىگىنە دە ونىڭ ەرلىگى جايلى جازىلعان ماقالالار ۇسىنعان. سونىڭ ارقاسىندا ونىڭ كورەيادا ءجۇرىپ-تۇرۋ ۋاقىتى ۇزارتىلدى.