قازاقستان پرەزيدەنتى نۇرسۇلتان نازارباەۆ شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ اياسىندا يران يسلام رەسپۋبليكاسىنىڭ پرەزيدەنتى حاسان رۋحانيمەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
قازاقستان پرەزيدەنتى نۇرسۇلتان نازارباەۆ شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ اياسىندا يران يسلام رەسپۋبليكاسىنىڭ پرەزيدەنتى حاسان رۋحانيمەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
كەزدەسۋدە نۇرسۇلتان نازارباەۆتىڭ يرانعا ساپارى كەزىندە قول جەتكىزىلگەن ۋاعدالاستىقتاردى ىسكە اسىرۋ بارىسى قارالدى.
تاراپتار ساۋدا-ەكونوميكا, كولىك-كوممۋنيكاتسيا جانە ينۆەستيتسيا سالالارىنداعى ەكىجاقتى ىنتىماقتاستىقتى جانداندىرۋدىڭ كەلەشەگى تۋرالى سويلەستى.
– قازاقستان يراننىڭ يادرولىق باعدارلاماسى اينالاسىنداعى جاعدايدىڭ شەشىلۋىنە بۇدان كەيىن دە بەلسەنە قاتىسۋعا دايىن. سونىمەن قاتار, ءبىز كولىك-كوممۋنيكاتسيا سالاسىنداعى ءوزارا ءىس-قيمىلىمىزدى دامىتۋعا, اتاپ ايتقاندا, تەمىر جول تاسىمالىن جۇزەگە اسىرۋعا مۇددەلىمىز. ءبىزدىڭ ەلدەرىمىزدىڭ ورتاق يگىلىگى – كاسپي تەڭىزى, ول دوستىق پەن ىنتىماقتاستىق تەڭىزى بولۋعا ءتيىس. ونىڭ قۇقىقتىق مارتەبەسىن انىقتاۋ جونىندەگى جۇمىستى جالعاستىرۋ قاجەت, ال ساراپشىلار بۇل باعىتتاعى قىزمەتىن ودان ءارى جۇزەگە اسىرۋى كەرەك, – دەدى نۇرسۇلتان نازارباەۆ.
قازاقستان پرەزيدەنتى وڭىردە بەيبىتشىلىك پەن تىنىشتىقتى قامتاماسىز ەتۋگە بارلىق ەلدەر مۇددەلى ەكەنىن اتاپ ءوتتى.
حاسان رۋحاني نۇرسۇلتان نازارباەۆقا ءوزىنىڭ ۇلىقتاۋ راسىمىنە قاتىسقانى ءۇشىن العىسىن ايتىپ, قازاقستاننىڭ يران ءۇشىن دوستاس ەل, وتە ماڭىزدى سەرىكتەس بولىپ سانالاتىنىنا توقتالدى.
– بىزدە ءوزارا ىنتىماقتاستىقتىڭ وراسان الەۋەتى بار. بىزگە تەك ەكىجاقتى ساۋدا-ەكونوميكالىق بايلانىستى عانا ەمەس, ەلدەرىمىزدىڭ مادەنيەت سالاسىنداعى ءوزارا ءىس-قيمىلىن دا دامىتۋ وتە ماڭىزدى, – دەدى يران پرەزيدەنتى.
نۇرسۇلتان نازارباەۆ پەن حاسان رۋحاني وڭىرلىك قاۋىپسىزدىك پەن حالىقارالىق كۇن تارتىبىندەگى ماسەلەلەردى دە تالقىلادى.
قازاقستان پرەزيدەنتى نۇرسۇلتان نازارباەۆ شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىسۋ اياسىندا تاجىكستان رەسپۋبليكاسىنىڭ پرەزيدەنتى ەمومالي راحمونمەن كەزدەستى.
اڭگىمەلەسۋ بارىسىندا مەملەكەت باسشىلارى ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق ىنتىماقتاستىقتىڭ نەگىزگى باعىتتارىن تالقىلادى.
نۇرسۇلتان نازارباەۆ پەن ەمومالي راحمون ەكى ەلدىڭ وڭىرلىك جانە حالىقارالىق ۇيىمدار اياسىنداعى ءوزارا ءىس-قيمىلى ماسەلەلەرىن قاراستىردى.
سونىمەن قاتار, تاراپتار وڭىرلىك قاۋىپسىزدىك احۋالى جونىندە پىكىر الماستى.