جول اپاتىنان قازا تاپقانداردىڭ سانى ءوسىپ بارادى
قازاقستان رەسپۋبليكاسىنىڭ ىشكى ىستەر مينيسترلىگى «وتكەن اپتا ىشىندە (19-25 تامىز ارالىعىندا) ەلىمىزدە 547 جول-كولىك وقيعاسى بولىپ, 108 ادام كوز جۇمدى, 719 ادام ءتۇرلى جاراقات الدى», دەپ حابارلادى.
جول اپاتىنان قازا تاپقانداردىڭ سانى ءوسىپ بارادى
قازاقستان رەسپۋبليكاسىنىڭ ىشكى ىستەر مينيسترلىگى «وتكەن اپتا ىشىندە (19-25 تامىز ارالىعىندا) ەلىمىزدە 547 جول-كولىك وقيعاسى بولىپ, 108 ادام كوز جۇمدى, 719 ادام ءتۇرلى جاراقات الدى», دەپ حابارلادى.
جامبىل وبلىسىنىڭ «الماتى-تاشكەنت» تاس جولىندا 10 ادامنىڭ ءومىرىن قيعان ءىرى جول اپاتى بولدى. ەكى «اۋدي» اۆتوكولىگى سوقتىعىسىپ, جولاۋشىلاردىڭ بارلىعى كوز جۇمعان. تاعى ءبىر جانتۇرشىگەرلىك وقيعا قوستاناي وبلىسىنىڭ امانگەلدى اۋدانىندا ورىن الدى. «ارقالىق-تورعاي» اۆتوجولىنىڭ 54-ءشى شاقىرىمىندا «فولكسۆاگەن» كولىگىنىڭ جۇرگىزۋشىسى جول جيەگىنە شىعىپ كەتىپ, ىشىندە وتىرعان 7 ادام قازا بولدى. اپاتتان تەك 13 جاسار بالا عانا امان قالعان كورىنەدى. ول قازىر ءتۇرلى جاراقاتتارىمەن اۋرۋحانادا جاتىر. ءدال وسى كۇنى باتىس قازاقستان وبلىسى, اقجايىق اۋدانى «چاپاەۆ-جالپاقتال» اۆتوجولىنىڭ 22-ءشى شاقىرىمىندا ۋاز جانە ۆاز ماركالى اۆتوكولىكتەر سوقتىعىسىپ, ناتيجەسىندە 6 ادام قازا تاپقان.
31 تامىز كۇنى ساعات 11.30-دا «الماتى-ۇزىناعاش» اۆتوجولىنىڭ 55-شاقىرىمىندا فابريچنىي كەنتىنىڭ ماڭىندا الماتى وبلىسىنىڭ اكىمى اڭسار مۇساحانوۆ جول اپاتىنا ۇشىرادى. ول كەزدە ايماق باسشىسى كونستيتۋتسيا كۇنىنە وراي ۇلتتىق ات سپورتى تۇرلەرىنەن قازاقستان پرەزيدەنتى كۋبوگى ءۇشىن ءداستۇرلى جارىس وتكەن «كوك باستاۋ» يپپودرومىنان قايتىپ كەلە جاتقان. اپات سالدارىنان وبلىس اكىمى اڭسار مۇساحانوۆ, ونىڭ ورىنباسارى سەرىك مۇقانوۆ, جامبىل اۋدانىنىڭ اكىمى ماحاببات بيگەلديەۆ زارداپ شەكتى. قازىرگى تاڭدا جاپا شەككەندەردىڭ بارلىعى دا №4 قالالىق اۋرۋحاناعا جاتقىزىلعان. الدىن-الا مالىمەتتەرگە قاراعاندا, ولارمەن سوقتىعىسقان «Toyota Camry» اۆتوكولىگى جولدىڭ قارسى باعىتىنا شىعىپ كەتكەن كورىنەدى.
شىنىندا دا, ەلىمىزدە كولىك اپاتى جيىلەي ءتۇستى. بەيبىت زاماندا مۇنشاما ادامنىڭ اجال قۇشۋى الاڭداتپاي قويمايتىن جايت. پوليتسەيلەر مۇنى «ءجۇرگىزۋشىلەردىڭ جول ەرەجەسىن ساقتاماۋىنان» كورسە, ماماندار «ساپاسىز جولدىڭ دا اسەرى بار» دەيدى.
«جۇرگىزۋشىلەردىڭ جول قوزعالىسى ەرەجەسىن ەسكەرمەۋى, جىلدامدىقتى اسىرۋى, قارسى باعىتقا شىعىپ كەتۋى كوبىنە جول اپاتتارىنا نەگىز بولۋدا. سونداي-اق جۇرگىزۋشىلەردىڭ بالالارعا قاۋىپسىزدىك بەلدىگىن تاقپاۋى, ارنايى اۆتوكرەسلوعا وتىرعىزباۋى دا الاڭداتادى», دەيدى ىشكى ىستەر مينيسترلىگى جول پوليتسياسى كوميتەتىنىڭ ءباسپاسوز حاتشىسى يرينا لۋكيانينا.
ايدار ورىسباەۆ,
«ەگەمەن قازاقستان».