ەلباسى نۇرسۇلتان نازارباەۆتىڭ شىمكەنت - رەسپۋبليكاداعى ءۇشىنشى قالا بولۋى ءتيىس دەگەن تاپسىرماسىن جۇزەگە اسىرۋ بارىسىندا ەكونوميكالىق, وندىرىستىك جانە الەۋمەتتىك سەكتورلاردى قارقىندى دامىتۋدا وڭتۇستىك قازاقستان وبلىستىق دەنساۋلىق ساقتاۋ باسقارماسى مەن انام كورەي ۋنيۆەرسيتەتىنىڭ گوسپيتالى (سەۋل قالاسى, وڭتۇستىك كورەيا) ەكى جاقتى بىرلەسكەن مەموراندۋمعا قول قويدى. مەموراندۋمدا كورسەتىلگەندەي, مەديتسيناداعى ءتۇرلى سالالار بويىنشا, ونىڭ ىشىندە بۇيرەك اۋىستىرۋدا وڭتۇستىك كورەيانىڭ جەتەكشى ماماندارى جەرگىلىكتى كادرلاردى وقىتۋ مەن كەڭەس بەرۋ, تاجىريبە الماسۋ قاراستىرىلعان. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
«قازىر وبلىستا 300 ناۋقاس سوزىلمالى بۇيرەك جەتكىلىكسىزدىگىنىڭ اقىرعى ستادياسى بويىنشا دياليز باعدارلاماسىندا تۇر, ءارى ولاردىڭ سانى جىل سايىن كوبەيىپ, تومەندەيتىن ءتۇرى جوق. وڭتۇستىك قازاقستاندا الىس-جاقىن شەتەلدەردە دونورلىق بۇيرەك اۋىستىرۋ وپەراتسياسى جاسالعان 40 ناۋقاس ەسەپتە تۇرادى. ولار ءومىر بويى قۇنى قىمبات يممۋنوسۋپرەسسيۆتى ءدارى-دارمەكتەردى تەگىن الىپ, وڭالتۋدان وتەدى. دەنساۋلىق ساقتاۋ باسقارماسى بۇل ناۋقاستار ءۇشىن وبلىستىق قان ورتالىعىندا قانداعى يممۋنوسپرەسسيۆتىڭ كونتسەنتراتسياسىن تەگىن انىقتاۋعا جاعداي جاساپ قويعان. بۇرىن ولار وسى زەرتتەۋگە بولا وزبەكستان, الماتى, قىتايعا بارىپ كەلۋگە ءماجبۇر ەدى», - دەلىنگەن حابارلامادا..
دەنساۋلىق ساقتاۋ مينيسترلىگىندە بۇيرەك اۋىستىرۋعا كەزەكتە 21 وڭتۇستىكقازاقستاندىق تۇر. وڭىردە ترانسپلانتاتسيالىق قىزمەتتى قۇرۋدا دەنساۋلىق ساقتاۋ باسقارماسى اۋقىمدى جۇمىستار اتقارىپ, قازىر اعزا مۇشەلەرىن ترانسپلانتاتسيالاۋعا, ياعني, اۋىستىرۋعا قاجەتتى بارلىق جاعدايلار جاسالعان. بيىلعى جىلدىڭ اقپان ايىندا ءبىزدىڭ ماماندار ترانسپلانتولوگيا بويىنشا انام كورەي ۋنيۆەرسيتەتى گوسپيتالىنىڭ ( سەۋل قالاسى, وڭتۇستىك كورەيا) بازاسىندا جانە №9 مينسك قالالىق اۋرۋحاناسى (بەلارۋس رەسپۋبليكاسى) بازاسىندا وقىپ كەلدى. قاجەتتى بارلىق ءدارى-دارمەكتەر مەن مەديتسينالىق قۇرالدار ساتىپ الىندى, دونورلار مەن رەتسيپيەنتتەر دايىندالدى.
انام گوسپيتالىمەن بىرلەسكەن مەموراندۋم اياسىندا بيىلعى جىلدىڭ ناۋرىز ايىندا العاش رەت قازاقستاندا بۇيرەك اۋىستىرۋ وڭىرلىك دەڭگەيدە – شىمكەنت قالالىق جەدەل مەديتسينالىق كومەك كورسەتۋ اۋرۋحاناسىندا كورەيلىك ارىپتەستەردىڭ قاتىسۋىمەن ءتورت پاتسيەنتكە ءساتتى وپەراتسيا جاسالدى. قازىرگى ۋاقىتتا بارلىق ولاردىڭ بارلىعى كۇندەلىكتى ءومىر سالتىن ۇستانۋدا.
مەديتسيناداعى وسى ءبىر اسا قاجەتتى باعىتتى دامىتۋعا وڭتۇستىك قازاقستان وبلىستىق اكىمدىگى مەن ءماسليحاتى, زور ىقپال ەتۋدە, سولاردىڭ قولداۋىمەن 2013 جىلى جەرگىلىكتى بيۋدجەتتەن 18 ملن. تەنگە بۇيرەك اۋىستىرۋ بويىنشا ماستەر-كلاسستاردى ۇيىمداستىرۋعا جانە وتكىزۋگە ءبولىندى.
ال 24-31 تامىز ارالىعىندا اتالمىش جوبانى جۇزەگە اسىرۋدا شىمكەنت قالالىق جەدەل مەديتسينالىق كومەك كورسەتۋ اۋرۋحاناسىندا انام كورەي ۋنيۆەرسيتەتى گوسپيتالىنىڭ (سەۋل قالاسى, وڭتۇستىك كورەيا) ماماندارىمەن بىرلەسكەن بۇيرەك اۋىستىرۋ بويىنشا ماستەر كلاسستار بولۋدا. بۇل ماستەر-كلاسستار ترانسپلانتاتسيالىق قىزمەتكە قاتىستى - نەفرولوگ, ۋرولوگ, حيرۋرگ, انەستەزيولوگ-رەانيماتولوگ, ترانسفۋزيولوگ سياقتى 28 مامانعا ارنايى ۇيىمداستىرىلۋدا. ءىس-شارا باعدارلاماسى بويىنشا تۋىسقان دونوردان 7 بۇيرەك اۋىستىرۋ جانە انام كورەي ۋنيۆەرسيتەتى مەديتسينالىق ورتالىعىنىڭ ترانسپلانتولوگيا جانە قان تامىرلارى حيرۋرگياسى ءبولىمىنىڭ مەڭگەرۋشىسى, پروفەسسور پاك كۆان تە (Park Kwan Tae) لەكتسيالىق كۋرستار وتكىزۋدە.
وڭتۇستىك قازاقستان وبلىسىنىڭ دەنساۋلىق ساقتاۋ سالاسىندا جوعارى تەحنولوگيانىڭ بەلسەندى ترانسفەرتى جەرگىلىكتى كادرلاردىڭ بىلىكتىلىگىن كوتەرۋگە, الەمدىك دەڭگەيگە جاقىنداتۋعا جاعداي جاسايدى. بۇل ءوز كەزەگىندە ءبىزدىڭ وڭىرىمىزدە تۇرعىندارعا مەديتسينالىق كومەكتىڭ جوعارى دەڭگەيدە كورسەتىلۋىنە مۇمكىندىك بەرەدى.
مۇرات ايتقوجا.