قازاقستان, جاپپاي قىرىپ-جويۋ قارۋىن قىسقارتۋ مەن تاراتپاۋ ىسىنە شەشۋشى ۇلەس قوسقان مەملەكەت رەتىندە, سيريادا حيميالىق قارۋ قولداندى دەگەن كۇدىكتى حابارلاماعا بايلانىستى ءوزىنىڭ تەرەڭ الاڭداۋشىلىعىن بىلدىرەدى. وسى اقپارات راستالعان جاعدايدا, بۇل ادامزاتقا قارسى جاسالعان قىلمىس رەتىندە قارالۋى ءتيىس.
ءبىز سيريا ۇكىمەتىن سول ەلدە حيميالىق قارۋدى قولدانعانى تۋرالى حابارلامانى تەكسەرۋ ءۇشىن جۇمىس جاساپ جاتقان بۇۇ ساراپشىلار توبىنا تولىعىمەن قولداۋ كورسەتىپ, ولاردىڭ قاۋىپسىزدىگىن قامتاماسىز ەتۋگە شاقىرامىز. كىنالى تۇلعالاردى انىقتاپ, وسىنداي جاعداي بولاشاقتا قايتالانباۋ ماقساتىندا جانە ادام قازاسىنا جول بەرمەۋ ءۇشىن بارىنشا شارا قابىلداۋ قاجەت دەپ سانايمىز.
قازاقستان حالىقارالىق قاۋىمداستىقتى توزىمدىلىككە, ال بۇل جاعدايدى باعالاۋ بارىسىندا بۇۇ ساراپشىلارىنىڭ سوڭعى قورىتىندىسىن باسشىلىققا الۋعا شاقىرادى.
بۇتىندەي العاندا, سيرياداعى سوزىلمالى جانە قانتوگىستى قاقتىعىستىڭ شەكتەن تىس كەيىپكە ەنگەنىن جانە تەز ارادا شەشۋدى تالاپ ەتەتىنىن اتاپ وتەمىز. ورىن العان جاعداي حالىقارالىق قاۋىمداستىقتىڭ كۇش-جىگەرىن بىرىكتىرۋ جانە سيرياداعى كۇش كورسەتۋلەردى توقتاتۋ ماقساتىندا تەڭدەستىرىلگەن كوزقاراستىڭ قاجەتتىگىن العا تارتادى.