پوليتسەيلەردىڭ مارتەبەلى قىزمەتى قاي ۋاقىتتا بولماسىن جاۋاپتى ءارى قاجەتتى ماماندىق سانالعان. تۇركىستان قالالىق پوليتسيا ءبولىمى جەرگىلىكتى پوليتسيا قىزمەتىنىڭ اعا ۋچاسكەلىك پوليتسيا ينسپەكتورى سامات قۇلبايىمبەتوۆ – جاۋاپتى قىزمەتتە ابىرويمەن تانىلىپ جۇرگەن ازاماتتىڭ ءبىرى.
اكىمشىلىك قۇقىق بۇزۋشىلىق پەن قىلمىستىڭ الدىن الۋ, ساقتاندىرۋ جاعدايلارى بويىنشا ناتيجەلى ەڭبەك ەتۋدە. قىزمەت كورسەتەتىن اۋماقتا قوعامدىق ءتارتىپتىڭ ساقتالۋىن قاداعالاپ, جول ەرەجەسىن بۇزعاندار مەن ەسىك الدىنا كۇل قوقىس تاستاعانداردى, قوعامدىق ورىنداردا تەمەكى شەككەندەر مەن ىشىمدىك ىشكەندەردى تارتىپكە كەلتىرەدى. جاستايىنان پوليتسيا بولۋدى ارمانداعان سامات جارقىنبەك ۇلى اعاسىنا قاراپ بوي تۇزەگەن. ىشكى ىستەر سالاسىندا قىزمەت اتقارعان تۋىسىنان ءتالىمىن الىپ, تاعىلىمىنا قۇلاق اسقان.
مەكتەپتى بىتىرگەن سوڭ, تۇركىستان قالاسىنداعى ق.ا.ياساۋي اتىنداعى حقتۋ-دا «زاڭگەر» ماماندىعىن مەڭگەرەدى. ەڭبەك جولىن ۋچاسكەلىك پوليتسيا قىزمەتكەرىنىڭ كومەكشىسى بولىپ باستاعان ول كەيىننەن ۋچاسكەلىك پوليتسيا, اعا ۋچاسكەلىك پوليتسيا ينسپەكتورى لاۋازىمدارىنا جوعارىلاپ, پوليتسيا كاپيتانى شەنىن تاققان.
«قوعامدىق ءتارتىپتى ساقتاۋ مەن قوعامدىق قاۋىپسىزدىكتى قامتاماسىز ەتۋ – باستى ماقساتىم», دەپ بىلەتىن پوليتسيا كاپيتانى قوعامدا نولدىك توزىمدىلىكتىڭ قاتاڭ ساقتالۋىن قاداعالايدى.
– مۇندا قوعامدىق تارتىپسىزدىككە, قوقىستى بەي-بەرەكەت ورىندارعا تاستاۋ ارەكەتتەرىنە مۇلدەم توزبەۋ, ياعني, ازاماتتاردىڭ ىشكى مادەنيەتىن قالىپتاستىرۋ ماسەلەسى كوزدەلەدى. ءاربىر ادام قورشاعان ورتادا قاراپايىم ەرەجەلەردى ساقتاپ, ءتارتىپ پەن مادەني تۇرمىستى بىرلەسە جاقسارتۋعا ۇلكەن جاۋاپكەرشىلىكپەن قاراۋى كەرەك. نولدىك توزىمدىلىك – تازا ءارى قاۋىپسىز قالانىڭ كەپىلدىگى. ءبىز كوپشىلىكتەن قاراپايىم ەرەجەلەردى ساقتاۋدى سۇرانامىز, – دەيدى سامات جارقىنبەك ۇلى.
پوليتسيا كاپيتانى قازىرگى كەزدە تۇركىستاندا پاتەردە تىركەۋسىز تۇرۋشىلاردىڭ كوپتىگىن ايتادى. قۇرىلىس جۇمىستارىنا ەلىمىزدىڭ ءار ايماعىنان كەلگەن جۇمىسشىلار قاراپايىم ەرەجەنى ساقتاۋعا ق ۇلىقسىزدىق تانىتادى ەكەن. زاڭ نەگىزىندە ارنايى تىركەلۋ كەرەكتىگىن تۇسىندىرەتىن پوليتسەي زاڭعا باعىنباعاندارعا ايىپپۇل سالىپ, اكىمشىلىك حاتتاما تولتىرادى. بۇل ءاربىر ءىستى ۇلكەن جاۋاپكەرشىلىكپەن اتقاراتىن س.جارقىنبەك ۇلىنىڭ كۇندەلىكتى جۇمىسى.
وسىلايشا پوليتسيا كاپيتانى بالا كەزىنەن ارمانداعان سۇيىكتى قىزمەتىن ابىرويمەن اتقارىپ كەلەدى.
قايرات زاينيشەۆ