فرانتسۋز جازۋشىسى ءارى ۇشقىش انتۋان دە سەنت-ەكزيۋپەريدىڭ «كىشكەنتاي حانزاداسىنداعى» سۋرەتتەر سونداي اسەرلى. بۇل كەلىستى كەسكىندەردى اۆتوردىڭ ءوزى سالعان. بالكىم, سول سويلەپ تۇرعان سۋرەتتەردىڭ اسەرى شىعار, گيننەسس رەكوردتار كىتابى بۇل تۋىندىنى ەڭ كوپ تىلگە اۋدارىلعان رەكورد رەتىندە تىركەگەن.
رەسمي جازبادا كىتاپ 1943 جىلى العاش جارىق كورگەننەن بەرى 382 ءتۇرلى ءتىل مەن ديالەكتكە اۋدارىلعانى ناقتى كورسەتىلگەن. مۇنداعى ء«تىل مەن ديالەكت» دەگەنىمىز – تەك الەمگە كەڭ تاراعان تىلدەر عانا ەمەس, جەرگىلىكتى ايماقتىق ديالەكتى دە ەسەپكە الىناتىنىن بىلدىرەدى. «كىشكەنتاي حانزادا» – ءبىر ەلدىڭ عانا ەمەس, ادامزاتتىڭ ورتاق تىلىندە سويلەيتىن سيرەك شىعارمالاردىڭ ءبىرى.