حالىق دانالىعىندا «شەبەردىڭ قولى ورتاق» دەگەن ءتامسىل بار. اتىراۋلىق دانەكەرلەۋشى الەكساندر رەچكين مەتالدان ءتۇرلى ءمۇسىن جاسايدى. ونىڭ بۇيىمدارىنا شەتەلدىكتەر دە تاپسىرىس بەرەدى.
ءوزىنىڭ ايتۋىنشا, كوللەدج بىتىرگەن سوڭ بالىق قورعاۋ ينسپەكتسياسىندا ينسپەكتور بولعان. بىراق شەبەر اتانۋدى ويلاماعان ەكەن. كەيىنگى ءۇش-ءتورت جىلدا وسى كاسىپكە بەت بۇردى. قازىر قولىنان شىققان مۇسىندەر تەك جەرگىلىكتى تۇرعىندار عانا ەمەس, شەتەلدىكتەر اراسىندا دا تانىمال بولا باستادى. ويتكەنى تەمىردەن ءتۇيىن تۇيەتىن شەبەردىڭ مۇسىندەرى ەرەكشەلىگىمەن تامساندىرادى.
«وسىدان 12 جىل بۇرىن جەر تەلىمىن العان ەدىم. سول كەزدە ءۇي اۋماعىن اباتتاندىرۋدى ويلاستىردىم. ءسويتىپ, دانەكەرلەۋ اپپاراتىن ساتىپ الىپ, ءتۇرلى ءمۇسىن جاساۋدى قولعا الدىم. بۇل – مەنىڭ ءحوببيىم. دەگەنمەن, توقسان تاراۋلى تاعدىر نە ۇسىنارىن كىم بىلگەن؟ ءتورت جىل بۇرىن دەنساۋلىعىم سىر بەرىپ, باستاپقىدا جۇرەك تالماسى, كەيىن باۋىر تسيرروزى دەگەن دياگنوز قويىلدى. دارىگەرلەر جۇمىس ىستەۋگە, اۋىر زات كوتەرۋگە تىيىم سالدى», دەيدى ا.رەچكين.
الايدا قول قۋسىرىپ, بوس وتىرۋدى جانى سۇيمەيدى. ءسويتىپ, تەمىردەن ءتۇرلى ءمۇسىن جاساۋدى قايتا قولعا العان. سول كەزدە وعان ءوزىنىڭ وتباسى, دوسى باعدات پەن ونىڭ جارى سالتانات كوپ قولداۋ كورسەتىپتى. دانەكەرلەۋشىنىڭ قولعا العان ءىسىنىڭ اتاۋى ءمۇسىن بولعانىمەن, كۇندەلىكتى ومىردە, ءتىپتى ساۋدا ورىندارىندا ءجيى كەزدەسەتىن بۇيىمدارعا مۇلدەم ۇقسامايدى. ويتكەنى الەكساندر رەچكيننىڭ ءمۇسىنى – پوليگونالدى فيگۋرا.
«تەمىردەن ءتۇرلى ءمۇسىن جاساۋ جەڭىل كورىنۋى مۇمكىن. بىراق بۇل وڭاي ءىس ەمەس. باستاپقىدا ينتەرنەت جەلىسىنەن پوليگونالدى فيگۋرا جاساۋدىڭ قىر-سىرىن ىزدەدىم. كەيبىر شەبەرلەرگە دە حابارلاستىم. الايدا ەشكىم بۇل ءىستىڭ قۇپياسىمەن بولىسكىسى كەلمەدى. سوندىقتان شەبەرلىگىمدى ءوزىم جەتىلدىرۋگە تىرىستىم. قاتەلىكتەن ساباق الدىم», دەيدى ول.
قازىر ونىڭ قولىنان شىققان مۇسىندەرگە تاپسىرىس بەرۋشى كوبەيدى. اسىرەسە جەكە يەلىكتەگى ۇيلەردىڭ اۋلاسىنا قوياتىن ءتۇرلى اڭنىڭ مۇسىنىنە تاپسىرىس كوپ تۇسەدى. تاپسىرىس بەرۋشىلەر ەلىمىزدىڭ ءار وڭىرىندە تۇرادى. ءتىپتى گەرمانيا, رەسەي, بەلارۋس, ليتۆا مەن بەلگيادان تاپسىرىس بەرۋشىلەر بار.
«مەنىڭ تاڭداعان ءستيلىم – كوپ قىرلى فيگۋرا. مۇنداي فيگۋرالاردى جاساۋ ءۇشىن ءتۇرلى ەسەپتەۋ, دالدىك پەن شىدامدىلىق قاجەت. الدىمەن مەتالدان ءبۇيىرلى قيىندىلار دايىندايمىن. ولاردى ءبىر-بىرىنە دانەكەرلەۋ كەزىندە مۇقيات بولعان ءجون. بولماشى قاتەلىك فيگۋرانىڭ ءسانىن بۇزادى», دەيدى دانەكەرلەۋشى.
اتىراۋ وبلىسى