الماتىدا قالا اۋماعىن قامتىعان اۋقىمدى سەيسموجاتتىعۋ ۇيىمداستىرىلدى. توتەنشە جاعدايلار قىزمەتى 7 باللدىق جەر سىلكىنىسى كەزىندە ارەكەت ەتۋ ءتارتىبىن پىسىقتادى. وقۋ-جاتتىعۋعا 1000-نان استام تجد قىزمەتكەرى مەن بىرقاتار ارنايى تەحنيكا جۇمىلدىرىلدى, دەپ جازادى Egemen.kz.
الدىن الا قالا تۇرعىندارىنا سيرەنا دىبىسى ەستىلەتىنى جانە MassAlert جۇيەسى ارقىلى حابارلاما جىبەرىلەتىنى ەسكەرتىلگەن. دەگەنمەن كەيبىر تۇرعىندار ەسكەرتۋدى ەستىمەگەنىن ايتقان.
الماتىدا جەر سىلكىندى
جاتتىعۋ قالا بويىنشا 20 نۇكتەدە وتكىزىلدى. نەگىزگى پراكتيكالىق ءىس-شارالار سالىنىپ جاتقان تۇرعىن ءۇي كەشەنىنىڭ اۋماعىندا ۇيىمداستىرىلدى. مۇندا قۇتقارۋ قىزمەتتەرى شارتتى جەر سىلكىنىسىنىڭ سالدارىن جويۋ بويىنشا بىرقاتار ارەكەتتەردى پىسىقتادى.
«اۋە بارلاۋ مي-8 تىكۇشاعىنىڭ كومەگىمەن جۇرگىزىلدى, قۇتقارۋشىلار ءپاراشيۋتسىز عيمارات توبەسىنە ءتۇستى, جوعارعى قاباتتاردان ادامداردى قۇتقارۋ, ۇيىندىلەردى ارشۋ جانە زارداپ شەككەندەردى شىعارۋ, سونداي-اق بيىك عيماراتتارداعى ءورتتى ءسوندىرۋ جۇمىستارى ورىندالدى», دەپ حابارلادى تجم.
(فوتو: تجم, سەيسموجاتتىعۋ)
سونىمەن قاتار بارلىق اۋداننان زارداپ شەككەن تۇرعىنداردى قابىلداۋ پۋنكتتەرى ۇيىمداستىرىلدى. الماتى-2 ستانتسياسىنان ازاماتتاردى اۆتوكولىك جانە تەمىرجول ارقىلى ەۆاكۋاتسيالاۋ ءراسىمى دە پىسىقتالدى. قاۋىپتى وندىرىستىك نىسانداردا حيميالىق جانە بيولوگيالىق اپاتتاردى جويۋ ستسەناريلەرى ورىندالدى.
2024 جىلعى 23 قاڭتاردا الماتىدا 5 باللدىق جەر سىلكىنىسى بولىپ, قالا تۇرعىندارى كۇتپەگەن دۇمپۋلەردەن ويانعانى ءمالىم.