قورعانىس ۆەدومستۆوسىندا پرەزيدەنت قاسىم-جومارت توقاەۆتىڭ 2020 جىلعى 16 ناۋرىزدان باستاپ جاريالاعان توتەنشە جاعداي رەجيمىن قامتاماسىز ەتۋگە بايلانىستى اپپارات كەڭەسى وتكىزىلدى.
اتالعان كەڭەسكە قورعانىس مينيسترلىگى مەن باس شتاب باسشىلىعى, سونداي-اق قارۋلى كۇشتەر تۇرلەرىنىڭ باس قولباسشىلارى, وڭىرلىك قولباسشىلىقتار مەن اسكەر تەكتەرىنىڭ قولباسشىلارى سەلەكتورلىق رەجيمدە قاتىستى.
قورعانىس ءمينيسترى نۇرلان ەرمەكباەۆ باسشىلىق قۇرامنىڭ نازارىن قورعانىس ۆەدومستۆوسىنا قاتىستى توتەنشە جاعداي رەجيمىن قامتاماسىز ەتۋ جونىندەگى ءىس-شارالاردى وتكىزۋگە اۋداردى.
ەڭ الدىمەن, جوعارى جاۋىنگەرلىك ازىرلىكتى ۇستاپ تۇرۋ, قىراعىلىقتى كۇشەيتۋ, ديۆەرسياعا قارسى قورعانىس پەن اسا ماڭىزدى اسكەري وبەكتىلەردى كۇزەتۋگە نۇسقاۋ بەرىلدى.
بۇدان بولەك, مەديتسينالىق مەكەمەلەرگە ازاماتتاردىڭ دەنساۋلىعىن ساقتاۋ جونىندەگى ىس–شارالارعا, ونىڭ ىشىندە گارنيزونداردان تىس جەرلەرگە شىعۋ ارقىلى, سونداي-اق رادياتسيالىق, حيميالىق جانە بيولوگيالىق قورعاۋ بولىمشەلەرىنە اۋماقتار مەن وبەكتىلەرگە ارنايى وڭدەۋ جۇرگىزۋگە دايىن بولۋى قاجەت.
سونىمەن قاتار كولىك جانە ارنايى تەحنيكا قاجەتتى كومەك كورسەتۋگە ءبىرىنشى بەلگى بويىنشا قاتىسۋعا دايىن بولۋ كەرەكتىگى ايتىلدى. كازارمالىق-تۇرعىن ءۇي جانە كوممۋنالدىق-پايدالانۋ قورىن ازاماتتاردىڭ مۇددەسىندە پايدالانۋ مۇمكىندىگى كوزدەلگەن.
قارۋلى كۇشتەردە كوروناۆيرۋستىڭ تارالۋىنا قارسى ءىس-قيمىل بويىنشا سانيتارلىق جانە مەديتسينالىق سيپاتتاعى كۇشەيتىلگەن ءىس-شارالارى قابىلداندى, بۇل رەتتە جاۋىنگەرلىك ازىرلىكتى قولداۋعا نۇقسان كەلتىرمەيدى.
جاپپاي ءىس-شارالار توقتاتىلدى, مەرزىمدى قىزمەتتەگى اسكەري قىزمەتشىلەر مەن كۋرسانتتاردى بوساتۋعا تىيىم سالىپ, تۋىستارىمەن جانە دوستارىمەن بايلانىستارى شەكتەلدى. بۇل رەتتە ولارعا جاقىندارىمەن زاماناۋي گادجەتتەردى قولدانۋ ارقىلى داۋىستىق جانە بەينە بايلانىس ورناتۋ اياسى كەڭەيدى.
قارۋلى كۇشتەردىڭ وسى باعىتتاعى بارلىق كۇشىن توتەنشە جاعداي ەلىندەگى بارلىق ارەكەت ەتۋ كەزەڭى جۇمىس ىستەيتىن جەدەل شتاب ۇيلەستىرەدى.