قاراعاندى وبلىستىق دەنساۋلىق ساقتاۋ باسقارماسى بەرگەن رەسمي اقپاراتقا سۇيەنسەك, كەشەگە دەيىن وڭىردە كوروناۆيرۋس ىندەتىن جۇقتىرعان ءبىر دە ءبىر ادام تىركەلمەگەن.
بۇگىندە كارانتيندە 113 ادام تاۋلىك بويى باقىلاۋعا الىنعان. بۇل 1ا ساناتىنداعى ەلدەردەن (يران, يتاليا) ورالعان نەمەسە شارتتى تۇردە جۇقتىرعاندارمەن بايلانىستا بولعان ازاماتتار. ءۇي كارانتينىندە 39 ادام, مەديتسينالىق باقىلاۋمەن ءوزىن-ءوزى وقشاۋلاۋدا 284 ادام, قاشىقتىقتان مونيتورينگتە 273 ادام. ولاردىڭ بارلىعى وزدەرىن جاقسى سەزىنەدى, اۋرۋ بەلگىلەرى جوق.
وبلىستىق دەنساۋلىق ساقتاۋ باسقارماسى مەن وڭىردەگى ەڭ ءىرى ءدارىحانالار جەلىسى بار «بيوسفەرا» كومپانياسى اراسىندا كەلىسىم جاسالىپ, سونىڭ ناتيجەسىندە كاسىپورىن وبلىس تۇرعىندارى ءۇشىن 300 مىڭ مەديتسينالىق ماسكا ساتىپ الىپتى. كومپانيا ەلىمىزدە جاسالعان بۇل ونىمدەردى ۇستىنە ءبىر تيىن دا قوسپاي, ارقايسىن 130-140 تەڭگە ارالىعىنداعى باعاعا ساتاتىن بولدى. سونداي-اق جەرگىلىكتى «مەرەي» كومپانياسى دا ماسكا جاساپ, الەۋمەتتىك ءدارىحانالاردى بەتپەردەمەن قامتاماسىز ەتىپ جاتىر.
ايتا كەتۋ كەرەك, قاراعاندىدا ۆيرۋسولوگيالىق زەرتحانا جۇمىس ىستەيدى. ەگەر دە ءبىز ءسوز قىلىپ وتىرعان ىندەتكە ءتان قانداي دا ءبىر بەلگى انىقتالاتىن بولسا, وندا ونداي ناۋقاس كوروناۆيرۋستىق تەست جۇيەسىنەن وتكىزىلەدى. ياعني كۇدىك تۋدىرعان ادامنىڭ جۇتقىنشاعى مەن مۇرىن قۋىسىنان جۇعىندى الىنىپ, ول زەرتحانادا تەكسەرىلەدى. ال تەكسەرۋ قورىتىندىسى كۇمان تۋدىرارلىق بولسا, وندا اناليز بىردەن نۇر-سۇلتان قالاسىنداعى ساراپتامالىق زەرتحاناعا جىبەرىلەدى.
باسقارما باسشىسى ەرجان نۇرلىباەۆتىڭ ايتۋىنشا, ازىرگە وڭىردەگى ەمحانالار قالىپتى رەجىمدە جۇمىس ىستەپ تۇر. ەگەر وتىنىشتەر كوبەيەتىن جاعداي تۋىنداي قالسا, دارىگەرلەر ادامداردى دەمالىسسىز قابىلداۋعا ساقاداي ساي ەكەن. ستاتسيونارلاردا ناۋقاستارمەن كەزدەسۋگە ۋاقىتشا شەكتەۋلەر قويىلعان. مىسالى, ەگدە ادامدارعا ەمحانالارعا بارۋدىڭ قاجەتى جوق, ولارعا ءتيىستى ءدارى-دارمەكتەردى دارىگەرلەردىڭ وزدەرى تۇرعىلىقتى جەرلەرىنە جەتكىزىپ بەرەدى.
وڭىردە ءدارى-دارمەك جاعىنان دا تاپشىلىق جوق. وبلىستىق دەنساۋلىق ساقتاۋ باسقارماسى الداعى ەكى ايعا جەتەتىن ءدارى-دارمەك ساتىپ العان.
ءىرى كاسىپورىندار قاجەت بولعان جاعدايدا قالا سىرتىندا ورنالاسقان وزدەرىنە تيەسىلى شيپاجايلار مەن ساۋىقتىرۋ ورىندارىن كارانتين ۇيىمداستىرۋعا بەرەتىن بولعان.
قاراعاندى وبلىسى