«Egemen Qazaqstan» گازەتىنىڭ 24 اقپان كۇنگى سانىندا «جىلۋ قۋاتىنىڭ تاپشىلىعى ءوڭىر دامۋىنا كەدەرگى» دەگەن ماقالا جاريالانعان ەدى. كوتەرىلگەن ماسەلە نازارعا الىندى ما, جوق پا, بىراق ءدال وسى جىلۋ تاپشىلىعى ماسەلەسى وبلىس اكىمى ابىلقايىر سقاقوۆتىڭ توراعالىعىمەن وتكەن جيىندا تالقىلاندى.
وبلىس اكىمىنىڭ ءبىرىنشى ورىنباسارى سۇڭعات ەسىمحانوۆتىڭ مالىمدەۋىنشە, بيىلعى جىلىتۋ ماۋسىمىندا تۇرعىنداردان جىلۋدىڭ جەتكىلىكسىزدىگىنە بايلانىستى 814 شاعىم تۇسكەن. جىلىتۋ ماۋسىمىندا جىلۋمەن قامتيتىن كاسىپورىنداردا كومىر قورىنىڭ ناقتى مولشەرى بەلگىلەنبەۋىنە بايلانىستى جىلۋ تاپشىلىعى ورىن العان. ەكىنشىدەن, وبلىس ورتالىعىنا جىلۋ بەرەتىن كاسىپورىنداردا قازاندىقتارداعى جوندەۋ جۇمىستارىنىڭ ساپاسىز جۇرگىزىلۋىنە وراي, تەحنولوگيالىق شاعىن اپاتتار جيىلەپ كەتكەن.
جيىندا الداعى ۋاقىتتا تەحنولوگيالىق شاعىن اپاتتارعا تالداۋ جاسالاتىنى ايتىلدى. ينفراقۇرىلىمنىڭ تەحنيكالىق جاعدايىنا اۋديت جۇرگىزىلمەك. وڭىردە «نۇرلى جەر» باعدارلاماسى بويىنشا جىلۋ جەلىلەرى جوندەلەدى. شىعىننىڭ 70 پايىزى رەسپۋبليكالىق, 15 پايىزى جەرگىلىكتى بيۋدجەتتەردەن, قالعان 15 پايىزى كاسىپورىننىڭ ينۆەستيتسيالىق باعدارلاماسى ەسەبىنەن وتەلمەك.
مىسالى, ەكىباستۇزدىق ماەس-2 ستانساسىندا كۇردەلى جوندەۋدەن وتكەن ەنەرگيا بلوگى توقتاتىلعان. ويتكەنى قاتتى جەل تۇرىپ, بوران سوقسا, ەلەكتر جەلىلەرى ۇزىلەدى. ستانساداعى جىلۋ جەلىلەرىندە دە اقاۋلار از ەمەس.
جيىندا وبلىس اكىمى ءا.سقاقوۆ جەلىلەردىڭ زاقىمدالۋ كورسەتكىشىنىڭ كوبەيىپ كەتۋ سەبەبىن سۇرادى. «پاۆلودار جىلۋ جەلىلەرى» جشس باسشىسى مارات يماناەۆتىڭ ايتۋىنشا, جىلۋ قۇبىرلارى ابدەن ەسكىرىپ, پايدالانۋ ۋاقىتى وتكەن. ياعني كاسىپورىن جىل سايىن 18 شاقىرىم قۇبىر اۋىستىرۋى ءتيىس.
سونداي-اق وبلىس ورتالىعىنداعى ەكىنشى پاۆلودار اۋماعىندا جەراستى قۇبىرلارىنىڭ جاعدايى ويلانتۋدا. ەندى بۇل قۇبىرلاردى جەردىڭ بەتىنە شىعارۋ جوسپارلانۋدا. ويتكەنى بۇل اۋماقتا جەراستى سۋلارىنىڭ مولشەرى كوپ. جەكە ۇيلەر سۋ استىندا قالۋى مۇمكىن.
– كاسىپورىنداردىڭ ينۆەستيتسيالىق جوبالارى جەرگىلىكتى اكىمدىكتەرمەن ۇيلەستىرىلمەگەنى بايقالدى. جىلۋ تاپشىلىعىن بولدىرماۋ ءۇشىن وسى سالاعا جاۋاپتى باسقارمانىڭ وزىندىك مىندەتتەرى بار, – دەدى وبلىس اكىمى.
جيىندا وبلىس ورتالىعىندا, وڭىردە جىلۋ ماسەلەسى تاپشىلىعىن سارالاۋدا ناقتى اقپاراتتىڭ بولماعانى ءۇشىن تۇرعىن ءۇي-كوممۋنالدىق نىساندار مەن جەرگىلىكتى اكىمدىكتىڭ اراسىندا ۇيلەسىمدى جۇمىس پەن باسقارۋشىلىق شەشىم شىعارا الماعان وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى مۇرات ابىلقالىقوۆقا سوگىس جاريالاندى.
پاۆلودار وبلىسى