كەزىندە اۋىلداعى ورتا مەكتەپتى بىتىرگەن تۇلەكتەر قازىر ءار سالادا ەڭبەك ەتىپ, قىزمەت اتقارۋدا. تۋعان اۋىلدارىن, ءبىلىم العان مەكتەپتەرىن ۇمىتپاي, قولداۋ كورسەتۋدە. ماقسات – اۋىل شىرايىن كەلتىرىپ تۇرعان شاعىن مەكتەپتىڭ جابىلماۋىنا ۇلەس قوسۋ.
ءار جىلدارى وقىعان تۇلەكتەر بىرلەسىپ, وقۋشىلارعا قاجەتتى جاڭا زامانعا ساي جابدىقتار, قۇرىلعىلار الىپ بەرۋدە. جۋىردا وزدەرى وقىعان مەكتەپكە جاڭا موديفيكاتسيالىق ۇلگىدەگى «Teacher office» كابينەتىن سىيعا تارتتى.
– قازىر مۇعالىمدەر جاڭا موديفيكاتسيالىق كابينەت جابدىقتارىمەن تانىسىپ, جۇمىس ىستەۋ ادىستەمەسىن مەڭگەرۋدە, ونى ساباق جوسپارلارىنا ساي قۇراپ, زەرتتەۋ جۇمىستارىن وتكىزۋدە. ءاربىر مۇعالىم كوممۋنيكاتسيا مەن اقپاراتتىڭ زاماناۋي جەلىلىك تەحنولوگيالارىن مەڭگەرۋى ءتيىس, – دەيدى مەكتەپ ديرەكتورى انار جەتىباەۆا.
ارينە بۇل شالعايداعى اۋىل مۇعالىمدەرى ءۇشىن قۋانىش. بۇل كۇندەرى مالايسارى باتىر اتىنداعى اۋىل مەكتەبىندە 113 وقۋشى وقيدى. ال اۋىلداعى شاعىن مەكتەپكە ەرەكشە كابينەتتى قارشىعا قاسەنوۆ, تيمۋر جاڭاتاەۆ, جاناربەك تولەۋوۆ, ەركىن ادىلباەۆ, ارداق جاقسىمبەكوۆ, بەرىك ءابدىرامانوۆ, قايىركەلدى شاكارعاليەۆ جانە باسقا دا تۇلەكتەر بىرلەسىپ سىيعا تارتتى.
بۇعان دەيىن دە مەكتەپ تۇلەكتەرى ينفورماتيكا, شاحمات, توعىزقۇمالاق, دومبىرا كابينەتتەرىنىڭ اشىلۋىنا ۇلەس قوسىپتى. وقۋشىلار ساباقتان سوڭعى بوس ۋاقىتتارىن ءتيىمدى پايدالانۋ ماقساتىندا ءتۇرلى ۇيىرمەلەرگە قاتىسادى. مىسالى, اۋىلعا كەلگەن جاس مۋزىكا مامانى گۇلناز بولاتحانقىزى جۇرگىزەتىن «دومبىرا-داستان» ۇيىرمەسى, مىرزابەك جاباعيننىڭ جەتەكشىلىگىمەن وتەتىن «شاحمات», «جاس ينفورماتيك» ۇيىرمەلەرى بار.
– ءبىزدىڭ ءار وقۋشى بەلسەندى. ينتەللەكتۋالدىق ويلارى جاقسى. مۇعالىمنىڭ مىندەتى – مادەنيەتتى, شىعارماشىل, الەۋمەتتىك بەيىمدەلگەن تۇلعا قالىپتاستىرۋ. اۋىل مەكتەبى وقۋشىلارىنىڭ قابىلەتتەرىن جان-جاقتى دامىتىپ, شىعارماشىلىعىن ۇشتاي ءبىلۋ ءۇشىن مۇعالىم ءوزى شىعارماشىل بولۋى ءتيىس, – دەيدى انار جەتىباەۆا.
ال ءبىر كەزدەرى وزدەرى وقىعان مەكتەپتەرىنە دەمەۋشىلىك كومەك كورسەتىپ جۇرگەن اۋىلدارىن ۇمىتپاعان تۇلەكتەرگە تۇرعىندار ريزا. اۋىلدا وقىپ ەرجەتكەن بەكەن جۇمابەكوۆ, سەرىك شاحاجانوۆ, ماناربەك ابدراحمانوۆ, نۇرجان وماروۆ, قۋانىش سارسەكەەۆ سياقتى قازىر كاسىپورىندار باسقارىپ, جوعارى قىزمەت اتقاراتىن تۇلەكتەرىمەن اۋىل حالقى ماقتانادى.
الداعى ۋاقىتتا مەكتەپ تۇلەكتەرى بىرلەسىپ, مالايسارى باتىردىڭ 320 جىلدىعىنا وراي اۋىلدا ەسكەرتكىش-بيۋست ورناتپاق.
پاۆلودار وبلىسى,
ماي اۋدانى,
مالايسارى اۋىلى