بۇگىن ونلاين رەجيمدە وتكەن جالپى وتىرىستا ءماجىلىس توراعاسى نۇرلان نىعماتۋلين كارانتينگە بايلانىستى ءماجىلىس جۇمىسى جاڭا فورماتقا كوشەتىنىن مالىمدەدى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
«ەلىمىزدە قالىپتاسقان توتەنشە جاعدايعا جانە قالامىزدا كارانتين جاريالاۋعا بايلانىستى ءماجىلىستىڭ دە جۇمىس رەجيمى وزگەرەتىن بولادى. ەرتەڭنەن باستاپ ءماجىلىس جۇمىسىنىڭ باسىم بولىگى باسقا فورماتقا كوشەدى. بۇل - ءاربىر ازاماتتىڭ قاۋىپسىزدىگىن ساقتاۋ ءۇشىن جاسالىپ جاتقان شارالار. وعان ءبارىمىز تۇسىنىستىكپەن جانە جوعارى جاۋاپكەرشىلىكپەن قاراۋىمىز قاجەت, - دەدى ن. نىعماتۋلين.
جالپى وتىرىستار, كوميتەتتەر مەن زاڭ جوبالارى بويىنشا جۇمىس توپتارىنىڭ وتىرىستارى كەزىندە عانا دەپۋتاتتار ءماجىلىس عيماراتىندا بولادى. ءماجىلىس سپيكەرى اتاپ وتكەندەي, باسقا كۇندەرى تەلەكوممۋنيكاتسيانىڭ زاماناۋي تۇرلەرىن پايدالانۋ ارقىلى قاشىقتان جۇمىس ىستەيدى.
زاڭ جوباسىنا قاتىسى بار تاراپتاردىڭ ۇزدىكسىز جۇمىسىن قامتاماسىز ەتۋ ءۇشىن زاماناۋي ينتەرنەت-تەحنولوگيانى پايدالانا وتىرىپ, قاشىقتان جۇمىس ىستەۋ ءادىسى ەنگىزىلەدى. مۇددەلى مەملەكەتتىك ورگانداردىڭ, پارلامەنتتىك ەمەس ساياسي پارتيالاردىڭ, ساراپتامالىق قاۋىمداستىقتىڭ ۇسىنىس-پىكىرلەرىن جيناپ, پوزيتسيالاردى كەلىسۋ بويىنشا جۇمىستار بەينەكونفەرەنتسيا, سكايپ, سەلەكتورلىق جينالىس, باسقا دا كوممۋنيكاتسيا تۇرلەرىن قولدانۋ ارقىلى جۇزەگە اسىرىلادى. زاڭداردى جوبالىق باقىلاۋ بويىنشا جۇمىس توپتارىنىڭ وتىرىستارى ولاردىڭ مۇشەلەرى مەن ازىرلەۋشى ورگان وكىلدەرىنىڭ عانا قاتىسۋىمەن وتەدى.
ءماجىلىس سپيكەرى نەگىزگى جۇمىس توپتارى, جالپى وتىرىستار جانە بەيىندى كوميتەتتەر جيىندارى بۇرىنعىداي ونلاين-رەجيمدە ءماجىلىس سايتى (www.parlam.kz) ارقىلى تاراتىلاتىنىن ايتتى. پارلامەنتتىك تىڭداۋلار مەن ۇكىمەتتىك ساعاتتار كەيىنگە شەگەرىلەدى. ءماجىلىس عيماراتىندا جينالىستار, جۇمىس كەزدەسۋلەرى, ازاماتتاردى قابىلداۋ وتكىزۋگە شەكتەۋ قويىلادى.
دەپۋتاتتار مەن اپپارات قىزمەتكەرلەرى ءۇشىن ءىسساپارلار, باسقا دا قىزمەتتىك جانە جەكە ساپارلارعا تىيىم سالىنادى.
سونىمەن قاتار ءماجىلىس اپپاراتى قىزمەتكەرلەرىنىڭ 70% پايىزى جالاقىسى ساقتالا وتىرىپ, قاشىقتان جۇمىس ىستەۋ فورماتىنا كوشىرىلەدى. قالعان بولىگى قىسقارتىلعان جۇمىس ۋاقىتى بويىنشا قىزمەت اتقارادى. جاڭا جۇمىس ءتارتىبىن العا تارتا وتىرىپ, ءماجىلىس توراعاسى زاڭ شىعارۋ جۇمىسىنىڭ قارقىنى مەن ساپاسىن تومەندەتپەۋگە ايرىقشا نازار اۋداردى.