Top Rank پروموۋتەرلىك كومپانياسىنىڭ باسشىسى بوب ارۋم ناۋرىز ايىنىڭ سوڭى مەن ساۋىردە وتەدى دەپ جوسپارلانعان كاسىپقوي بوكس كەشتەرىنىڭ بارلىعى دا كەيىنگە شەگەرىلگەنى جايىندا مالىمدەدى.
سولاردىڭ قاتارىندا قازاقستاندىق جانكۇيەرلەردىڭ دە تاعاتسىزدانا كۇتكەن جەكپە-جەكتەرى بار. ماسەلەن, 28 ناۋرىزدا كانادانىڭ كۆەبەك قالاسىندا قوس قانداسىمىز شارشى الاڭعا شىعۋعا ءتيىس ەدى. اتاپ ايتساق, WBC Continental Americas پەن WBO Global نۇسقالارى بويىنشا ورتا سالماقتاعى التىن بەلبەۋلەردىڭ يەگەرى جانىبەك ءالىمحان ۇلى (8-0, 4 كو) گانا بوكسشىسى يسسا ساميرمەن (18-0, 15 كو), ال ايدوس ەربوسىن ۇلى (13-0, 9 كو) رينگ قوجايىنى تيم كرونينمەن (12-4-2, 3 كو) كۇش سىناسادى دەپ جوسپارلاندى. ەكىنشى ورتا سالماقتاعى ايدوستىڭ دا قارقىنى وتە كۇشتى. قازىرگى كەزدە ول WBC Asia, WBA International جانە WBO Global نۇسقالارى بويىنشا چەمپيوندىق اتاقتىڭ يەگەرى.
سونداي-اق 17 ساۋىردە اقش-تىڭ وكسون-حيلل قالاسىندا جارتىلاي ورتا سالماقتاعى قازاقتىڭ ماقتانىشى دانيار ەلەۋسىنوۆ (9-0, 5 كو) ناميبيانىڭ مىقتىسى, الەمنىڭ ەكس-چەمپيونى دجۋليۋس يندونگومەن (23-2, 12 كو) ايقاسادى دەپ كۇتكەنبىز. بىراق كوروناۆيرۋسقا بايلانىستى بۇل جارىس تا كەيىنگى شەگەرىلدى.