ۇلتتىق اكادەميالىق كىتاپحانا «ايتتىم سالەم, قالامقاس» اتتى حاكىم ابايدىڭ اندەرىنەن جاڭا اكتسيا ۇيىمداستىردى. ءىس-شارا بارىسىندا مەكەمە قىزمەتكەرلەرى ەلورداداعى «شاپاعات» كوممۋنالدىق بازارىنا ارنايى بارىپ, اقىننىڭ ەلگە ايگىلى اندەرىن ورىندادى.
– كىتاپحانامىزدىڭ قىزمەتكەرلەرى ابايدىڭ شىعارمالارىن ناسيحاتتاۋ ءۇشىن قاراپايىم ەلدىڭ اراسىنا شىقتى. «شاپاعات» كوممۋنالدىق بازارىندا بىرلىگى جاراسقان حالىقتىڭ دا بىزبەن قوسىلا شىرقاعاندارىن كورىپ, ءبىر مارقايدىق. ولاردىڭ اراسىندا باسقا ۇلت وكىلدەرى دە بار. وسى ءىس-شارا بارىسىندا كورەرمەن قاۋىمعا ادەبي كىتاپتاردى سىيعا تارتتىق. ءبىر ەل, ءبىر جەر, ءبىر مەكەندە تۇرىپ جاتقان حالىقتىڭ ابايدى جانە ونىڭ تۋىندىلارىن ءسۇيىپ وقيتىندارىنا كوزىمىز جەتتى. ءدال وسىنداي جوبا ءبىزدىڭ حالقىمىزدىڭ رۋحاني وسۋىنە وڭ ىقپال ەتەرى ءسوزسىز, – دەدى ۇلتتىق اكادەميالىق كىتاپحانانىڭ باسشىسى ءۇمىتحان مۇڭالباەۆا.
اكتسيا كەزىندە قالا تۇرعىندارى دا كىتاپحانا ۇجىمىمەن بىرگە قوسىلا ءان شىرقادى. اباي قۇنانباي ۇلىنىڭ 175 جىلدىعىنا ارنالعان چەللەندجدە كورەرمەندەرگە ادەبي كىتاپتار سىيعا تارتىلدى.
رۋحانيات ورداسىنىڭ وڭدى ءىسى ورەلەرگە ونەگە بولارى انىق.