ينتەرنەت – الاياقتىق سحەمالارى دا قازىر جەتىلدىرىلۋدە. وندايدى ءتىپتى تانىستار مەن ارىپتەستەر دە جاسايتىن بولىپ بارادى. جۋىردا بانك سالاسىندا قىزمەت ەتەتىن 23 جاسار پەتروپاۆل تۇرعىنى نەسيەگە جيھاز الماق بولىپ بارسا ءۇش اي بۇرىن ءوزىنىڭ اتىنا 225 مىڭ تەڭگەنىڭ زاەمى «الىنعانىن» ءبىلىپ, شوشىپ كەتەدى. جۇمىستاعى ارىپتەسى كۋالىك جانە بانك كارتوچكاسىنىڭ نومەرىن ءبىلىپ الىپ, ونىڭ اتىنا زاەم راسىمدەگەن ەكەن.
ال كارتا مەن كۋالىكتىڭ ءنومىرىن ءبىلۋ ءۇشىن ول ارىپتەسىن الداپ, ءوزىنىڭ كارتوچكاسى بۇعاتتالعانىن, ال اتىنا 225 مىڭ تەڭگە تۋىستارىنان ءتۇسۋى كەرەكتىگىن ايتىپ, نومىرلەردى سۇراعان. كوپ كەشىكپەي اتىنا تۇسكەن زاەمدى اقكوڭىل جىگىت دەرەۋ ارىپتەسىنىڭ اتىنا اۋدارعان. سويتسە, بۇل اقشا ءوزىنىڭ اتىنا راسىمدەلگەن زاەم بولىپ شىققان...
وسى الاياقتىقتى جاسادى دەگەن كۇدىكپەن قازىر ءۋاليحانوۆ اۋدانىنىڭ 25 جاسار تۇرعىنى ۇستالدى. قازىر ونىڭ باسقا دا ادامداردى دا الداۋ مۇمكىندىگى انىقتالۋدا. قازىردىڭ وزىندە ول تاعى بىرەۋدىڭ اتىنا 190 مىڭ تەڭگە راسىمدەپ, جىمقىرىپ كەتكەنى بەلگىلى بولىپ وتىر.
«ەشقانداي ارتىق كەدەرگىلەرسىز جانە قۇجاتتارسىز جەدەل مامىلە جاسايمىز» دەگەن ميكرونەسيەلىك ۇيىمداردىڭ جارنامالارى اقىرىندا وسىنداي الاياقتىقتارعا دا جول بەرىپ وتىر. بار بولعانى كۋالىك پەن بانك كارتوچكاسىنىڭ ءنومىرىن بەرسە بولدى, الاياقتار زارداپ شەگۋشىنىڭ اتىنا زاەم الا بەرەدى ەكەن.
سقو پد كريمينالدىق پوليتسيا باسقارماسىنىڭ باستىعى, پولكوۆنيك پەتر كليموۆتىڭ ايتۋىنا قاراعاندا جىل باسىنان بەرى 68 الاياق وسىنداي جولمەن وزدەرىنىڭ ارىپتەستەرىن, تانىستارىن, تۋىستارىن الداپ كەتكەن. سونىڭ ىشىندە 24-ءى ونلاين-نەسيەلەندىرۋ جولىمەن جىمقىرىلعان قاراجات. بۇل بىلتىردىڭ سايكەس مەرزىمىمەن سالىستىرعاندا ءۇش ەسە كوپ. «ەشقاشان, ەشقانداي جاعدايدا ەشكىمگە وزدەرىڭىزدىڭ پەرسونالدىق دەرەكتەرىڭىزدى بەرمەڭىزدەر, كۋالىكتەگى فوتولارىڭىزدى ۆاتساپپەن جىبەرمەڭىزدەر, پين-كودتارىڭىز بەن ەسەپشوتتارىڭىزدىڭ نومەرىن بەرە كورمەڭىزدەر», دەيدى ول.
سولتۇستىك قازاقستان وبلىسى