قىرعىزستان وقۋ ورىندارىن كارانتينگە جاپتى

ەلدەگى اقپارات اگەنتتىكتەرىنىڭ حابارلاۋىنشا, سوورونباي جەەنبەكوۆ شاعىن قۇرامدا قاۋىپسىزدىك كەڭەسىنىڭ وتىرىسىن وتكىزدى.

ول الەمنىڭ بارلىق ەلدەرى ەكونوميكالىق شىعىندارعا قاراماستان, دەنساۋلىق ساقتاۋدى ءبىرىنشى ورىنعا قويىپ, شەكارالار مەن جولداردى جابۋعا شەشىم قابىلداعانىن اتاپ ءوتتى.

«قىرعىزستان دا وسى باعىتتا جۇمىس ىستەيدى. وسى جاعدايدىڭ بارلىعى ەكونوميكاعا اسەر ەتەتىندىگىن اشىق ايتۋ كەرەك. ءبىز رەسپۋبليكالىق بيۋدجەتتى ۇنەمدەۋ رەجيمىنە كوشىپ, قاۋىپ-قاتەرلەرگە دايىن بولۋىمىز كەرەك» دەيدى قىرعىزستان پرەزيدەنتى.

سوورونباي جەەنبەكوۆ كەزەكتى رەت ەل حالقىنىڭ دەنساۋلىعى ءبىرىنشى كەزەكتەگى ماسەلە ەكەنىن,   كوروناۆيرۋسقا قاتىستى جاعداي ونىڭ جەكە باقىلاۋىندا ەكەنىن, مەملەكەتتىك ورگانداردان ساعات سايىن ءتۇرلى اقپارات الىناتىنىن اتاپ ءوتتى.

«قوعامدا ءتۇرلى الىپ-قاشپا  اڭگىمەلەر بار. رەسمي تۇردە راستالماعان اقپارات الەۋمەتتىك جەلىلەردە تەز تارالۋدا. ەلدە كوروناۆيرۋستىڭ جوقتىعىنا كۇمانداناتىندار بار.  جاقىن كورشىمىز قازاقستاندا وسى ينفەكتسيانىڭ تىركەلۋىمەن ءبىزدىڭ الاڭداۋشىلىعىمىز كۇشەيە تۇسەدى. بۇل تابيعي پروتسەسس. ءبىز جۇمىسىمىزدى كۇشەيتىپ, جەدەل, حالىققا اشىق اقپارات بەرۋىمىز كەرەك»  دەدى ول.

قاۋىپسىزدىك كەڭەسىنىڭ شاعىن قۇرامداعى وتىرىسىندا ەكى رەسپۋبليكالىق شتابتان كوروناۆيرۋستىڭ جاعدايى تۋرالى اقپارات تىڭدالدى.

سوورونباي جەەنبەكوۆ مۇددەلى مەملەكەتتىك ورگاندار باسشىلارىنىڭ جەكە جاۋاپكەرشىلىگىن تاعى دا اتاپ ءوتتى. قاجەتتى شارالاردى تيىسىنشە ورىنداماعانى ءۇشىن ەڭ قاتاڭ شارالار قابىلدانادى.

قىرعىزستاندا كوروناۆيرۋستى انىقتاۋعا ارنالعان 10 مىڭعا جۋىق تەست جۇيەسى بار. بۇل تۋرالى ۇكىمەتتىڭ ءباسپاسوز قىزمەتىنەن حابارلادى.

ونىڭ ايتۋىنشا, زەرتحانادا 1 مىڭ 545 ادام كوروناۆيرۋسقا تەكسەرىلگەن, ناتيجەلەرى تەرىس.

تاعى 310 ازامات قايتا ساراپتامادان ءوتتى, ناتيجەلەرى دە تەرىس.

ۇكىمەت تەست جۇيەلەرىنىڭ تيىمدىلىگى 95-99 پايىزدى قۇرايتىندىعىن, ۆيرۋس ناقتى ۋاقىت رەجيمىندە پتر تالداۋ ارقىلى ينكۋباتسيا كەزەڭىندە انىقتالعانىن اتاپ ءوتتى. تەستتىڭ ورتاشا ۇزاقتىعى - بەس ساعات. تەست جۇيەلەرىنىڭ وزدەرى ددسۇ-مەن تەكسەرىلىپ, ۇسىنىلادى.

«كوروناۆيرۋستىق سىناقتار اۋرۋدىڭ الدىن الۋ جانە مەملەكەتتىك سانيتارلىق-ەپيدەميولوگيالىق قاداعالاۋ ءبولىمىنىڭ ەكى زەرتحاناسىندا وتكىزىلەدى. زەرتحانانىڭ بارلىق ماماندارى پتر تالداۋ ادىستەرى بويىنشا وقىتىلادى, سونىمەن قاتار جوعارى دالدىكتەگى زاماناۋي جابدىقتارمەن قامتاماسىز ەتىلگەن. ولاردىڭ زەرتحانالىق زەرتتەۋلەرگە دايىندىعىن ددسۇ ساراپشىسى مايا ستانوۆيچ تەكسەردى» دەلىنگەن قىرعىزستاننىڭ   مينيسترلەر كابينەتى تاراتقان ءباسپاسوز مالىمدەمەسىندە.