«سامۇرىق-قازىنا» ۇاق» اق-دا جەدەل شتاب وتىرىسى ءوتتى. قوردىڭ توپ-مەنەدجمەنتى مەن پورتفەلدىك كومپانيالاردىڭ باسشىلارى كۇردەلى حالىقارالىق جاعدايدى ەسكەرە وتىرىپ, ىسكە اسىرىلعان جانە الەۋەتتى تاۋەكەلدەرگە جاۋاپ قايتارۋ مەحانيزمىن تالقىلادى. بۇل تۋرالى «سامۇرىق-قازىنا» ۇاق» اق ءباسپاسوز قىزمەتى حابارلادى.
«سامۇرىق-قازىنا «ۇاق» اق باسقارما توراعاسى احمەتجان ەسىموۆ قازىرگى جاعداي بارىنشا موبيليزاتسيالاۋدى تالاپ ەتەتىنىن جانە پورتفەلدىك كومپانيالارعا بىرقاتار تاپسىرما بەرگەنىن اتاپ ءوتتى.
قور باسشىسى شيكىزات نارىقتارىندا قالىپتاسقان جاعداي ۇلتتىق ۆاليۋتا باعامىنىڭ الەمدىك رەزەرۆتىك ۆاليۋتالارعا تۇراقتىلىعىنا قىسىم جاساعانىن حابارلادى. سونىمەن قاتار الەمدە كوروناۆيرۋستىڭ تارالۋى جالعاسۋدا, بۇل ەكونوميكانىڭ كەيبىر سالالارىنا اسەر ەتەدى.
ا. ەسىموۆ «قتج «ۇك» اق جۇك ءترانزيتى بويىنشا جوسپارلارىن ورىنداۋعا كوروناۆيرۋستىڭ تيگىزگەن ىقپالىن اتاپ ءوتتى. جولاۋشىلار تاسىمالىنىڭ تومەندەۋى دە بايقالادى. 2020 جىلدىڭ 1 اقپانىنان باستاپ قحر-دان (الماتى-ءۇرىمشى, نۇر-سۇلتان-ءۇرىمشى) تج حابارلاماسى توقتاتىلدى.
اۋەتاسىمالداۋدا "ەير استانا" اق-تىڭ بەيجىڭ, ءۇرىمشى, گونكونگ باعىتىنداعى رەيستەرى توقتاتىلدى, 1 ناۋرىزدان باستاپ وڭتۇستىك كورەيا, باكۋ رەيستەرى قىسقارتىلدى.
«قازپوچتا» اق-دا كوروناۆيرۋستىڭ 3 ايلىق اسەرىن ەسكەرە وتىرىپ, 2020-2024 جىلدارعا ارنالعان بيزنەس-جوسپار تۇزەتىلدى, قىتايمەن پوشتالىق الماسۋ توقتاتىلدى, 24 قاڭتاردان باستاپ "قورعاس" اەا جابىلدى.
بارلىق پورتفەلدىك كومپانيالارعا كومپانيالاردىڭ ۇيىمدىق قۇرىلىمىن تولىعىمەن قايتا قاراۋ تاپسىرىلدى. ەڭ الدىمەن, بۇل وندىرىستىك قىزمەتشىلەر قۇرامى ەمەس, اكىمشىلىك باسقارۋ پەرسونالىنا قاتىستى بولۋى كەرەك.
جەكەشەلەندىرۋدىڭ كەشەندى جوسپارىنىڭ پەريمەترىن, ديۆەستيتسيالاردى ناقتىلاۋ, ستراتەگيالىق ەمەس اكتيۆتەردەن شىعۋ جونىندە ۇسىنىستار ەنگىزۋ, سونداي-اق, اعىمداعى ينۆەستيتسيالىق جوبالاردى ىسكە اسىرۋدى جالعاستىرۋ تاپسىرىلدى.
سونداي-اق قور جانىنداعى ورتالىق شتابقا اپتا سايىن ەسەپ بەرە وتىرىپ, ءاربىر پورتفەلدىك كومپانيادا جەدەل ارەكەت ەتۋ جونىندەگى جۇمىس شتابتارىن قۇرۋ تاپسىرىلدى.