ءبىزدىڭ ەلدەن قىرعىز رەسپۋبليكاسىنا قاراي جاياۋلاتىپ بەت العان, جاس مولشەرى ەلۋگە جاقىنداعان ەر ادامعا اينالاسىنداعىلار اياۋشىلىقپەن قاراعاندىعى بايقالىپ تۇردى. ونىڭ وڭ اياعىنىڭ ورنىندا پروتەز بولاتىن.
الايدا شەكاراشىلاردىڭ ەسىرتكى ىزدەۋگە ارنايى ۇيرەتىلگەن «رادا» اتانعان ءيتى الگى مۇگەدەك ادامدى «ەسىرتكى تاسىمالداۋشى» رەتىندە مەڭزەدى. ءيتتىڭ قاتەلەسۋى مۇمكىن ەمەس ەدى. شەكاراشىلار كۇدىكتىنى ارنايى بولمەگە الىپ بارىپ, تولىق تەكسەرۋ جۇرگىزدى. كۇدىك راستالدى. ونىڭ پروتەزى جاي عانا پروتەز ەمەس, ارنايى دايىندالعان كونتەينەر ەكەندىگى انىقتالدى. قازىرگى ۋاقىتتا ونىڭ ىشىنەن تابىلعان زات ەسىرتكى بولۋى مۇمكىن دەگەن كۇدىكپەن ساراپتامادان وتكىزىلىپ جاتىر. كولەمى مەن ءتۇرى انىقتالۋ ۇستىندە. ۇستالعان 47 جاستاعى قازاقستاندىق ازامات جامبىل اۋداندىق پوليتسيا بولىمىنە تاپسىرىلدى.