شۆەيتساريالىق سارا ماركيز ەسىمدى ساياحاتشى ەكى كونتينەنتتى جاياۋ كەسىپ وتكەن. ول وسى ساپارىندا التى مەملەكەتتە بولىپ, سەگىز اياق كيىم اۋىستىرعان كورىنەدى. بۇل تۋرالى egemen.kz ءتىلشىسى bigpicture.ru-عا سىلتەمە جاساپ حابارلايدى.
سارا ماركيز شۆەيتساريانىڭ سولتۇستىگىندەگى كىشىگىرىم اۋىلدا تۋعان. ول ۇنەمى تابيعاتپەن ۇندەسۋگە تىرىسقانىن ايتىپتى CNN-گە بەرگەن سۇحباتىندا.
ء«يا, بالا كۇنىمنەن وسىنى قالادىم. كىشكەنتاي كەزىمدە تاڭەرتەڭ ەرتە تۇرىپ الىپ, ورمانعا كەتىپ قالاتىنمىن. ءوزىم ءۇشىن جاڭا ءبىر دۇنيەنى اشاتىنمىن» دەيدى ساياحاتشى.
سارا ماركيز 8 جاسىندا ءيتىن وزىمەن بىرگە ەرتىپ الىپ, ورمانعا بارادى ەكەن. سول جەردەگى ۇڭگىردە ۇيىقتاۋدى ادەت قىلىپتى. وسكەن سايىن ونىڭ باعىتى دا كۇردەلەنە باستاعان. ساياحاتشى جاڭا زەلانديانى, اقش-تى جاياۋ كەسىپ وتكەن. اۆستراليا بويىمەن 14 مىڭ شاقىرىم ءجۇرىپ, اند تاۋىن باعىندىرعان.
سارا 2010 جىلى ەڭ كۇردەلى ساياحاتتارىنىڭ بىرىنە اتتانادى. ول جولعا شىعۋدىڭ الدىندا كارتانى مۇقيات زەرتتەگەن كورىنەدى.
ءۇش جىلدىق ساپارىن سىبىردەن باستاعان ول گوبي ءشول دالاسىن قىتاي, لاوس پەن تايلاند ارقىلى ءجۇرىپ وتكەن.
ساياحاتشى سارا تايلاندتان اۆسترالياعا دەيىن بريسبەنگە باعىت العان جۇك كەمەسىمەن جەتىپ السا, اۆستراليانىڭ بارلىق جەرىن جاياۋ ارالايدى. ءسويتىپ, ساياحاتىن ءشولدى مەكەندەگى اعاشتىڭ ماڭىندا اياقتاعان.
ول ءدال سول جەردى 10 جىل بۇرىن ءوزىنىڭ باستاپقى ساياحاتى كەزىندە بايقاپ قالعان ەكەن.
گوبي ءشولدى مەكەنىن سارا تەك ءۇشىنشى ساياحاتى كەزىندە عانا كەسىپ وتە العان.
گوبيگە ساياحاتى جايلى سارا «كۇن وتە سۋىق ءارى جەلدى بولدى. كەيدە وسىنشالىق تومەن تەمپەراتۋرادا, اسىرەسە, تۇندە امان قالا الامىن با, قالمايمىن با دەپ تە ويلادىم» دەيدى ول.
فوتولار: bigpicture.ru