پالاتا سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسى ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
دەپۋتاتتار قاراۋىنا اكىمشىلىك راسىمدىك-پروتسەستىك كودەكس جوباسى ىلەسپە تۇزەتۋلەرىمەن ءبىرىنشى وقىلىمدا ۇسىنىلدى. كودەكس جوباسى بىرىڭعاي زاڭنامالىق اكتىدە جاريا قۇقىقتىق قاتىناستار سالاسىندا اكىمشىلىك راسىمدەردى جۇزەگە اسىرۋدىڭ جانە سوت ءىسىن جۇرگىزۋدىڭ قۇقىقتىق نەگىزدەرىن, قاعيداتتارىن, ەرەجەلەرىن بەلگىلەيدى.
ءماجىلىس توراعاسى نۇرلان نىعماتۋليننىڭ پىكىرىنشە, اكىمشىلىك سوت تورەلىگىن ەنگىزۋ ازاماتتاردىڭ ۇكىمەتكە دەگەن سەنىمىن ارتتىرىپ, تۇتاستاي العاندا حالىق ۇنىنە قۇلاق اساتىن مەملەكەت قاعيداتتارىن دامىتۋعا ىقپال ەتەدى.
سونىمەن قاتار ءماجىلىس دەپۋتاتتارى مەملەكەتتىك قىزمەت ماسەلەلەرىنە قاتىستى زاڭ جوباسىن ءبىرىنشى وقىلىمدا قاراماق. بۇل زاڭ جوباسى كونكۋرستىق راسىمدەردى جەتىلدىرۋگە, كادرلىق ماسەلەلەردى شەشۋدە مەملەكەتتىك ورگانداردىڭ جەدەلدىگىن ارتتىرۋعا, ىقتيمال كادر تاپشىلىعىنىڭ تاۋەكەلىن تومەندەتۋگە, مەملەكەتتىك قىزمەتشىلەردى الەۋمەتتىك قولداۋ شارالارىن ىسكە اسىرۋعا جانە ت.ب. باعىتتالعان.
بيۋرو وتىرىسىندا دەپۋتاتتار نازارىنا اتوم ەنەرگياسىن پايدالانۋ سالاسىنداعى ازاماتتىق قۇقىقتىق جاۋاپتىلىققا قاتىستى زاڭ جوباسى ۇسىنىلدى. اتالعان زاڭ جوباسىنىڭ باستى مىندەتتەرى اتوم ونەركاسىبىن دامىتۋعا ىقپال ەتۋ جانە قارجىلىق قامتاماسىز ەتۋ ارقىلى يادرولىق زالالدىڭ وتەلۋىن قامتاماسىز ەتۋ بولىپ تابىلادى.
سونداي-اق دەپۋتاتتارعا كوشى-قون پروتسەستەرىن رەتتەۋ ماسەلەلەرىنە قاتىستى زاڭ جوباسىن ەكىنشى وقىلىمدا قاراۋ ۇسىنىلادى.
پالاتانىڭ الداعى جالپى وتىرىسىنىڭ كۇن تارتىبىنە شەتەل ۆاليۋتاسىنداعى يپوتەكالىق قارىزدار جانە كورسەتىلەتىن تولەم قىزمەتتەرى نارىعىنىڭ سۋبەكتىلەرىن رەتتەۋدى جەتىلدىرۋ ماسەلەلەرى تۋرالى زاڭ جوباسى ەنگىزىلەدى.