تاعدىرىما تۋرا كەلگەن ماماندىق

اياگوز قالاسىندا دۇنيەگە كەلىپ, سەمەيدەگى راديوتەحنيكا جانە بايلانىس كول­لەدجىن ويداعىداي تامامداعان سوڭ, 2016 جىلى وسى قالاداعى №10810 اسكەري بولىمىنە قازاقستان قارۋلى كۇشتەرىنىڭ ازاماتتىق قىزمەتشىسى بولىپ جۇمىسقا قابىلداندىم. العاشقى ەڭبەك جولىم وسى­لاي باستالدى. الايدا اسكەري كيىم كيۋ­گە سوندا دا ەكى جىل ۋاقىت قاجەت بول­دى.

اسكەري تارتىپپەن قاتار, سپورتتى دا سەرىك ەتكەن جايىم بار. سول 2016 جىلى شاڭعىمەن سىرعاناۋ ءۇشسايىسىندا 1-ورىن, اراعا ەكى جىل سالىپ 2018 جىلى «شىعىس» وڭىرلىك قولباسشىلىعى وفيتسەرلىك ءۇشسايىسىندا 2-ورىن, سول جىلى «ماكاروۆ» تاپانشاسىنان اتۋ جارىسىندا 1-ورىن يەلەندىم. 2019 جىلى «الەم جاۋىنگەرى» سايىسىندا ىرىكتەۋدەن ءوتىپ, ارمەنيادا وتكەن اسكەري ويىنداردا جۇلدەلى 3-ورىن يەلەنسەم, بيىل «شىعىس» وڭىرلىك قولباسشىلىعى ۇيىمداستىرعان وسى سايىستا 1-ورىندى جەڭىپ الدىم. وسى جەتىستىكتەرىم ەلەۋسىز قالماي, 2019 جىلى قورعانىس ءمينيسترى, گەنەرال-ما­يور نۇرلان ەرمەكباەۆتىڭ قولىنان ءىى دارەجەلى «ەل قورعانى» مەدالىن الدىم.

ايەل باقىتى تەڭىن تاۋىپ, تۇرمىسقا شىعۋ ەمەس پە؟ جولداسىم سەرگەي تولكانوۆ تا اسكەري ادام. ەكەۋمىز دە ۇشارالداعى №40398 اسكەري بولىمدە قىزمەت ەتەمىز. ول سەرجانت شەنىندە. مەن ەفرەيتورمىن. كەيدە مەنى تاعدىر اسكەري ومىرگە ءبىرجولا تاڭىپ قويعانداي كورىنەدى. سولاي بولعانىنا قۋانامىن دا.

 اسكەر قاتارىنداعى ايەل ازاماتتاردىڭ ومىرىنە كوپ ادام تاڭدانىسپەن قارايدى. قيىندىققا, تارتىپكە ءتوزۋ وڭاي ەمەس ارينە. الايدا وسى سالانى تاڭداعانىم ءۇشىن ءبىر ءسات تە بولسىن وكىنگەن ەمەسپىن. وكىنبەيمىن دە. قازاق تاريحىنداعى باتىر قىزداردىڭ ارداقتى ءىزى وشپەۋى ءتيىس. سونىڭ ءبىر بولشەگى بولسام, ودان اسقان ارمان جوق مەندە.

ءمولدىر سافاكوۆا,

«شىعىس» وڭىرلىك قولباسشىلىعى №40398 اسكەري ءبولىمىنىڭ ەفرەيتورى