ەڭبەك جانە حالىقتى الەۋمەتتىك قورعاۋ مينيسترلىگىندە ۆيتسە-مينيستر ەرلان اۋكەنوۆتىڭ توراعالىعىمەن قازاقستاننىڭ بارلىق وڭىرلەرىندە الەۋمەتتىك ID-كارتالاردى ەنگىزۋ ماسەلەسى بويىنشا وبلىس جانە رەسپۋبليكالىق ماڭىزى بار قالا اكىمدىكتەرىمەن سەلەكتورلىق كەڭەس ءوتتى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
بۇگىنگى تاڭدا الەۋمەتتىك كارتالار اقتوبە, نۇر-سۇلتان جانە الماتى قالالارىندا ەنگىزىلگەن. ولار جول اقىسىن تولەۋگە, اتاۋلى الەۋمەتتىك كومەك, كەپىلدىك بەرىلگەن الەۋمەتتىك توپتاما جانە باسقا دا الەۋمەتتىك قىزمەت تۇرلەرىن الۋعا مۇمكىندىك بەرەدى.
مىسالى, اقتوبەدە «قازپوشتا» اق بانك كارتاسى نەگىزىندە 40 مىڭنان استام الەۋمەتتىك كارتا شىعارىلدى. 6 اي ىشىندە اقشا اينالىمى 841 ملن تەڭگەنى قۇرادى. كارتالاردىڭ يەلەرى مەكتەپ اسحانالارىندا تاماقتانۋعا, جولاقىسىن تولەپ, تەگىن رەتسەپت بويىنشا ءدارى-دارمەك الا الادى.
نۇر-سۇلتاندا Astra بىرىڭعاي كولىك كارتاسى جۇمىس ىستەيدى. 1,5 ملن كارتانىڭ 120 مىڭى وقۋشىلارعا, 135 مىڭى ازاماتتاردىڭ جەڭىلدىكتى ساناتتارى ءۇشىن شىعارىلدى. ورتاشا ايلىق اقشا اينالىمى 1,5 ملرد تەڭگەنى قۇرايدى. بىرىڭعاي مەكتەپ كارتاسىن پايدالانا وتىرىپ, قالا وقۋشىلارى Bala pay جانە Feeb me ەلەكتروندىق جۇيەلەرى ارقىلى تاماقتانۋدى تولەۋگە مۇمكىندىگى بار.
الماتىدا بۇل جۇيە «وڭاي» كولىك كارتاسىنىڭ بازاسىندا جۇمىس ىستەيدى. 2,9 ملن. شىعارىلعان كارتانىڭ 333 مىڭى – مەكتەپ وقۋشىلارىنا, 422 مىڭى – ستۋدەنتتەرگە ارنالعان جانە 241 مىڭى – جەڭىلدىكتى, ولار بويىنشا ورتاشا ايلىق اينالىم 2 ملرد.تەڭگەنى قۇرايدى. «وڭاي» كارتالارىنىڭ يەلەرى قوعامدىق كولىكتە جول ءجۇرۋ اقىسىن تولەي الادى, مۋزەيلەرگە, كىتاپحانالارعا, كينوعا بيلەتتەر ساتىپ الا الادى, مادەني ءىس-شارالارعا قاتىسا الادى. الماتىدا مەكتەپ اسحانالارىندا تاماقتانۋدى تولەۋ مۇمكىندىگىن ەنگىزۋ جوسپارلانىپ وتىر.
قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ ايتۋىنشا, ID-كارتالاردىڭ مۇمكىندىكتەرى كەڭەيتىلەدى. ارداگەرلەر, زەينەتكەرلەر, مۇگەدەكتىگى بار ادامدار, تابىسى از جانە كوپبالالى وتباسىلار نەگىزگى نىسانالى توپتار بولادى. اكىمدىكتەر ءونىم بەرۋشىلەردى وزدەرى تاڭدايدى. قازىرگى ۋاقىتتا 13 ءوڭىر كىممەن جۇمىس ىستەيتىنىن انىقتادى.
الەمدىك تاجىريبەدە الەۋمەتتىك ID-كارتالار بىرقاتار ەلدەردە پايدالانىلادى. مىسالى, اۆستريادا, ەستونيادا, مالايزيادا, يتاليا مەن رەسەيدە ادامدار الەۋمەتتىك تولەمدەر مەن ارنايى پلاستيكالىق كارتالار ارقىلى جاردەماقى الادى.