ەلەكتروندى ەڭبەك بيرجاسىنىڭ مالىمەتتەرى بويىنشا, ەلىمىزدە كۇزەتشى, قازاندىق وپەراتورى, پاترۋلدەۋ ينسپەكتورى, مەدبيكەلەر مەن تاربيەشى ماماندارى تاپشى. ەسەسىنە زاڭگەر, جالدامالى مامان, ەكونوميست, مالشى, قارجىگەرلەر ەكى قولعا ءبىر كۇرەك تاپپاي ءجۇر.
دەگەنمەن, Finprom.kz سايتىنىڭ مالىمەتىنە سەنسەك, قازاقستاندا جۇمىسسىزدىق ازايعان. ءبىر جىل ىشىندە جۇمىسسىزدار سانى 0,1 پايىزعا تومەندەسە, 2019 جىلدىڭ ءتورتىنشى توقسانىندا جۇمىسپەن قامتىلعان حالىق سانى 8,8 ملن ادامدى قۇراپ, ءبىر جىلدا 0,7 پايىزعا ارتقان. وتكەن جىلدىڭ سايكەس كەزەڭىندە كورسەتكىش 8,7 ملن ادامدى قۇراپ, بۇل جىل ىشىندە 2%-عا ءوسىپتى.
اسىرەسە, ەلوردادا جۇمىسپەن قامتىلعان ازاماتتاردىڭ سانى ارتىپ وتىر. جىلدىق ءوسىم 9,2%-دى قۇراپ, 553,6 مىڭ ادامعا دەيىن كوبەيگەن. اتىراۋ وبلىسىندا جۇمىسپەن قامتىلعاندار سانى 4,1%-عا, الماتىدا 2,9%-عا وسكەن. دەسەك تە جۇمىسپەن قامتىلعانداردىڭ باسىم بولىگى كوتەرمە جانە بولشەك ساۋدا سەكتورىندا جۇمىس ىستەيدى. ياعني 1,4 ملن ادام كولىك جوندەپ, ناپاقا تابادى. سونداي-اق جەتەكشى سالالاردىڭ ۇشتىگىنە اۋىل, ورمان جانە بالىق شارۋاشىلىعى (1,2 ملن ادام نەمەسە 13,4%) جانە ءبىلىم بەرۋ (1,1 ملن ادام نەمەسە 12,7%) سالالارى كىرىپ وتىر. جۇمىسپەن قامتىلعان حالىقتىڭ ەڭ كوپ سانى بويىنشا توپ-5 سالانى ونەركاسىپ (1,1 ملن ادام) جانە قۇرىلىس (642,2 مىڭ ادام) تۇيىندەيدى.
سونىمەن بىرگە ەلدەگى جۇمىسسىز حالىق سانى 441,4 مىڭ ادامدى قۇراپ, 2018 جىلدىڭ سايكەس كەزەڭىمەن سالىستىرعاندا 0,1%-عا قىسقارعان (441,9 مىڭ ادام). الايدا ەلىمىزدە جۇمىسسىزدىق دەڭگەيىنىڭ ءمانى وزگەرىسسىز قالىپ وتىر – 4,8%. جۇمىسسىزداردىڭ باسىم بولىگى ادەتتەگىدەي حالىق تىعىز قونىستانعان وڭىرلەردە بايقالادى. ماسەلەن, الماتىدا (جىلىنا 49,2 مىڭ ادام), سونداي-اق, الماتى وبلىسىندا (48,2 مىڭ ادام) جانە تۇركىستان (42,1 مىڭ ادام) وبلىسىندا الاقانىن ىسقىلاپ وتىرعاندار از ەمەس. سول سەكىلدى شىعىس قازاقستان مەن قاراعاندى وبلىستارىندا جۇمىسسىزدار سانى تيىسىنشە 34,5 مىڭ جانە 29,7 مىڭ ادامدى قۇرادى. جۇمىسسىزدىقتىڭ جوعارى دەڭگەيى تۇركىستان وبلىسىندا, الماتى مەن شىمكەنت قالالارىندا بايقالىپ وتىر – 5,1%.
جۇمىس دەمەكشى, الداعى ونجىلدىقتا الەمدە تەحنولوگيا سالاسىنداعى ماماندىقتار ۇلكەن سۇرانىسقا يە بولادى دەيدى ماماندار. ولار – بيوينجەنەر, بيوفارماكولوگ, بيوينفورماتيكا, اقىلدى قورشاعان ورتانى جوبالاۋشى, روبوتوتەحنيكا مامانى, كيبەرقاۋىپسىزدىك بويىنشا مامان, بالامالى ەنەرگەتيكا جونىندەگى مامان.
رەكرۋتينگ پورتالىنىڭ مالىمەتىنشە, قازىردىڭ وزىندە اتالعان سالالارداعى ماماندار سۇرانىسقا يە ءارى ولاردىڭ ماڭىزى ارتا تۇسۋدە. سونداي-اق نەيروپسيحولوگ, باعدارلاما جاساۋشى, ديزاينەر, 3D-باسپا ينجەنەرى, ۆيرتۋالدى الەمنىڭ ساۋلەتشىلەرى مەن ديزاينەرلەرىن دە ەرەكشە اتاپ وتكەن ابزال.