قاراعاندى قالاسىندا «وحوتزووپروم» مەكەمەسىنىڭ ينسپەكتورلارى ەرلان نۇرعاليەۆتى ءولتىردى, پەتر نيتسىكتى ولتىرۋگە وقتالدى جانە توپتاسىپ زاڭسىز اڭ اۋلادى دەگەن ايىپ تاعىلعان قىزىلوردا وبلىسىنىڭ جەتى تۇرعىنىنا قاتىستى سوت ۇكىمى شىعارىلدى. اتاپ ايتقاندا, ايىپتالۋشىلار بەرىك احمەتوۆ, قايرات اقشانوۆ جانە نۇرلان شۇكىلدىكوۆكە ءومىر بويى باس بوستاندىعىنان ايىرۋ جازاسى كەسىلدى. سوتتالعاندار جازانى قىلمىستىق اتقارۋ جۇيەسىنىڭ توتەنشە قاۋىپسىز مەكەمەلەرىندە وتەيتىن بولادى.
سونىمەن قاتار اتالعان قىلمىستىق ىسكە قاتىسى بار بەردەن بازاروۆ, باتىربەك قايىربەكوۆ, جاراسحان مىرزاباەۆ جانە ايدوس اكىموۆ التى جىلعا سوتتالدى. بۇلار جازالارىن ورتاشا قاۋىپسىز كولونيادا وتەيدى. سوتتالعانداردىڭ ءبارى بەس جىلعا دەيىن اڭ اۋلاۋ قۇقىعىنان ايىرىلدى جانە زارداپ شەگۋشىلەر قورىنا 20 جانە 30 اەك كولەمىندە وتەماقى تولەۋگە مىندەتتەلدى.
زارداپ شەككەندەردىڭ مورالدىق جانە ماتەريالدىق زياندى وتەۋ جونىندەگى ازاماتتىق تالابىن سوت ءىشىنارا قاناعاتتاندىردى. سۋديا ماتەريالدىق زيان رەتىندە 1 ملن 850 مىڭ تەڭگە جانە مورالدىق زيان ەسەبىندە 5 ملن تەڭگە ءوندىرىپ الۋ تۋرالى ۇكىم شىعاردى.
بۇدان بولەك, سوت ۇكىمىنە سايكەس, 17 كيىكتى ولتىرگەنى ءۇشىن سوتتالۋشىلار 89 ميلليون تەڭگە وتەماقى تولەيتىن بولادى.
ەسكە سالساق, وتكەن جىلدىڭ قاڭتار ايىندا قىزىلوردا وبلىسىنىڭ جەتى تۇرعىنى قاراعاندى وبلىسىنداعى نۇرا اۋدانىنىڭ اۋماعىندا زاڭسىز كيىك اۋلاپ جۇرگەندەرىندە «وحوتزووپروم» مەكەمەسىنىڭ قورىقشىلارىنا كەز بولعان. قولعا تۇسكىسى كەلمەگەن قىلمىسكەرلەر قورىقشىلاردى جابىلىپ سوققىعا جىعادى. سونىڭ سالدارىنان ينسپەكتور ەرلان نۇرعاليەۆ اۋرۋحانادا قازا بولىپ, پەتر نيتسىك اۋىر جاراقاتتار العان بولاتىن.