الماتىدا ەركىن نۇرازحاننىڭ «شاراينا» اتتى جەكە كورمەسى اشىلدى

ەركىن نۇرازحان – قازاق بەينەلەۋ ونەرىندە كاريكاتۋراش, شارج (دوستىق ءازىلدى پورترەت) جانرىنىڭ قالىپتاسىپ, دامۋىنا وزىندىك قولتاڭباسىن قوسقان, بۇگىندە وسى باعىتتىڭ كوشباسشىسى سانالاتىن تانىمال سۋرەتشى.

سۋرەتشى-كاريكاتۋراشى 1982 جىلدان باستاپ ادەبيەت, ونەر جانە قوعام قايراتكەرلەرىنىڭ ءازىل پورترەتتەر گالەرەياسىن جاساپ كەلەدى. ول ەلىمىز تاۋەلسىزدىك العان جىلدار ىشىندەگى الەۋمەتتىك-ەكونوميكالىق, ساياسي ومىرىمىزدەگى كەلەڭسىز قۇبىلىستاردى سىنعا العان ساتيرالىق سۋرەتتەر توپتاماسىن دۇنيەگە اكەلدى. سونداي-اق, وقىرماندارعا وزەكتى ماسەلەلەردى كوتەرگەن ماقالالارى جانە دەرەكتى دۇنيەلەرىمەن تانىلعان قالامگەر.

سۋرەتشىنىڭ تاقىرىپتارى ءار الۋان, بەينەلەگەن كەيىپكەرلەرى سان قىرلى مىنەز-ق ۇلىقتى بولسا, سۋرەت سالۋداعى تەحنيكاسى تىم قاراپايىم. نەگىزىنەن قاعاز, قالامۇش, تۋش, اكۆارەل بوياۋى, گەلدى قالام, ءتۇستى قارىنداشتاردى قولدانادى.

كاريكاتۋراشىنى شىعارماشىلىققا جەتەلەگەن – ءومىردىڭ ءوزى. ول قوعام مەن ادام, ساياسات پەن زامان كەڭىستىگىندە قايشىلاسقان مۇددەلەر مايدانى مەن كەراعار كوزقاراستاردى ءجىتى باقىلاپ, اق-قاراسىن انىقتاپ, ىشكە جيعان-تۇيگەنىن ەل نازارىنا ۇسىندى. كورەرمەنىن بەي-جاي قالدىرماي قوعام مەن زاماننىڭ كىلتيپانىن تابۋعا ۇندەپ, سول پروتسەستەرگە قاتىسۋعا, وي تۇيۋگە, اركىمدى ءوز ۇستانىمىن انىقتاپ الۋعا شاقىرادى. وسىدان كەلە  سۋرەتشىنىڭ ازاماتتىق پوزيتسياسى انىقتالا تۇسەدى. ول ادىلدىك پەن ادالدىق, شىندىق پەن اقيقات جاعىندا بولىپ, حالىقتىڭ مۇڭ-مۇقتاجىن جەتكىزىپ, ومىردەگى وزگەرىستەرگە سولاردىڭ تۇرعىسىنان قاراپ, باعاسىن بەرە السا — ناعىز حالىقشىل سۋرەتشى, ءوز ەلىنىڭ پاتريوتى بولعانى. «شاراينا» كورمەسى سونىڭ دالەلى. كورمەگە كەلۋشىلەر سۋرەتشى-كاريكاتۋراشىنىڭ شىنشىل دا ايقىن سىرلارعا تولى دۇنيەتانىمىمەن تابىسادى. سونىمەن قاتار تاۋەلسىز ەلىمىزدىڭ دامۋىنا كەدەرگى كەلتىرەر كەرىتارتپا كۇشتەردى كەلەكەلەپ كوز الدىمىزعا اكەلەدى. ءوز كورەرمەنىن بەيعام دا نەمقۇرايلى جۇرمەي, ەل مەن جەر ءۇشىن بەلسەندى كۇرەسكەر بولۋعا شاقىرادى.