بۇگىن پارلامەنت ءماجىلىسىنىڭ دەپۋتاتتارى, «Nur Otan» پارتياسى فراكتسياسىنىڭ مۇشەلەرى سارىاعاش اۋدانىنا ىسساپارمەن كەلدى. بۇل تۋرالى تۇركىستان وبلىسى اكىمدىگىنىڭ ءباسپاسوز قىزمەتى حابارلادى.
پارلامەنت ءماجىلىسىنىڭ دەپۋتاتتارى قۇدايبەرگەن ەرجان, ءۋاليحان قاينازاروۆ جانە مۇحتار ەرمان سارىاعاش اۋدانى, جىبەك جولى اۋىلىنداعى «اگروتۋر» شارۋا قوجالىعىندا بولدى. 2018 جىلى قۇرىلعان شارۋا قوجالىعىندا تۇركيالىق تەحنولوگيا قولدانىلادى. مۇندا ءتۇرلى كوكونىستەردىڭ كوشەتتەرى وسىرىلەدى. ءدان سەبۋ جۇمىسى اۆتوماتتاندىرىلعان. شارۋا قوجالىعىنىڭ باسشىسى تۇرسىن تاسحودجاەۆتىڭ ايتۋىنشا, وڭىردەگى جىلىجايلار وسىندا كوكونىسكە الدىن-الا تاپسىرىس بەرەدى. 10 ادام جۇمىسپەن قامتىلعان بۇل جىلىجايدا قىزاناق تا وسىرىلەدى.
شارۋا قوجالىعىنىڭ جۇمىسىن جوعارى باعالاعان دەپۋتاتتار تۇركىستان وبلىسىندا اۋىل شارۋاشىلىعىن دامىتۋعا مۇمكىندىك مول ەكەنىن ايتتى. وسىندا كاسىپكەرلەرمەن جۇزدەسكەن زاڭ شىعارۋشى ورگان وكىلدەرى جۋىردا قولدانىسقا ەنگىزىلگەن زاڭدار ەلىمىزدىڭ دامۋىنا وڭ سەرپىن بەرەتىنىن جەتكىزدى. ۇستازداردىڭ مارتەبەسىن كوتەرۋ, كوپبالالى وتباسىلارعا جاڭا فورماتتا تۇراقتى جاردەماقى بەرۋ, از قامتىلعان وتباسىلارعا اتاۋلى الەۋمەتتىك كومەك بەرۋ ەرەجەلەرى جاقسارا تۇسكەنىن, پرەزيدەنت قاسىم-جومارت توقاەۆتىڭ سايلاۋالدى باعدارلاماسىنداعى مىندەتتەر ناقتى جۇزەگە اسا باستاعانىن مالىمدەدى. 2020 جىلدىڭ 1 قاڭتارىنان باستاپ مىندەتتى مەديتسينالىق ساقتاندىرۋدى ەنگىزۋ جۇمىسى باستالعانى, پارتيانىڭ «اۋىل – ەل بەسىگى» جوباسىنىڭ ماڭىزدىلىعى دا ايتىلدى.
جۇمىس ورىندارىن اشۋ, كاسىپكەرلىكتى دامىتۋ, اۋىل شارۋاشىلىعىن جانداندىرۋ, قولدانىسقا ەنگىزىلگەن جاڭا زاڭ باپتارى سارىاعاش اۋدانى, داربازا اۋىلىنداعى «فيرما ساكەن» جشس اۋماعىنداعى كەزدەسۋدە دە ءسوز بولدى. وسىندا اۋىل تۇرعىندارىمەن جۇزدەسكەن دەپۋتاتتار ءبايدىلدا جىلقىشيەۆ, ساكەن قانىبەكوۆ جانە مانسۇرحان ماحامبەتوۆ مەملەكەت تاراپىنان قولعا الىنعان باستامالار جونىندە پىكىر الماستى. كاسىپكەرلىكتى, اۋىل شارۋاشىلىعىن جانداندىرۋعا باعىتتالعان جەڭىلدىكتەر مەن سۋبسيديالار جايى دا اڭگىمە ارقاۋىنا اينالدى.
بۇگىندە 600-گە جۋىق ءىرى قارا مال, 2 مىڭنان استام ۋاق مال اسىراپ وتىرعان «فيرما ساكەن» جشس 20 ادامدى جۇمىسپەن قامتىعان. جىلىنا 700 توننادان استام ءونىم وندىرەدى. وبلىس تۇرعىندارىن ءسۇت جانە ءسۇت ونىمدەرىمەن قامتۋعا ۇلەس قوسىپ وتىرعان كاسىپورىننىڭ اۋدان ەكونوميكاسىندا ورنى بار. دەپۋتاتتار سارىاعاش قالاسىنداعى 5 قاباتتى 13 تۇرعىن ءۇيدىڭ قۇرىلىس بارىسىمەن تانىستى. "نۇرلى جەر" باعدارلاماسى اياسىندا قۇرىلىسى 2018 جىلى باستالعان ۇيلەر بيىل پايدالانۋعا بەرىلەدى. سونىمەن بىرگە دەپۋتاتتار "جىبەك جولى" كەدەن بەكەتىنىڭ جۇمىسىمەن تانىستى.
وسىلايشا, پارلامەنت ماجىلىسىندەگى «Nur Otan» پارتياسى فراكتسياسىنىڭ مۇشەلەرى تۇركىستان وبلىسى اۋماعىن تۇگەل ارالاپ, جاڭا زاڭ باپتارىن تۇسىندىرۋمەن قاتار وڭىردەگى وزەكتى پروبلەمالارمەن تانىستى. وسى ءىسساپارلار بارىسىندا انىقتالعان ماسەلەلەر پارلامەنت ماجىلىسىندە تالقىلانادى دەگەن جوسپار بار.