2019 جىلى رەسپۋبليكا بويىنشا جاڭادان سالىنعان جانە قايتا جاڭعىرتىلعان اۆتوكولىك جولدارىنىڭ 641 شاقىرىمى كولىكتەر ءۇشىن اشىلدى. جول توسەمىنىڭ ساپاسى جاقسارعان سوڭ بارلىق قاتىسۋشىلار ءۇشىن جول قوزعالىسى جايلى ءارى قاۋىپسىز بولۋى ءتيىس ەدى. بىراق, جولدار تەگىستەلگەن سايىن كولىك اپاتتارى, ونىڭ ىشىندە قايعىلى اياقتالاتىن جاعدايلار كوبەيگەن. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
تاۋەلسىزدىك جىلدارى قازاقستاندا 12,5 مىڭنان اسا شاقىرىم اۆتوجول جاڭادان سالىندى جانە قايتا جاڭعىرتىلدى. 2,8 مىڭ شاقىرىم اۆتوماگيسترال ءى تەحنيكالىق سانات ولشەمدەرىنە سايكەستەندىرىلدى. بۇل كولىك جۇرگىزۋشىلەرى 3 مىڭداي شاقىرىم جولدا ساعاتىنا 140 شاقىرىمعا دەيىن جىلدامدىقپەن جۇرە الادى دەگەن ءسوز. جالپى «جول-كولىك اپاتتارىنىڭ سانى ساپالى جولدارعا بايلانىستى كوبەيدى» دەگەن ءسوز قۇلاققا وعاشتاۋ ەستىلەتىنى راس. دەگەنمەن, ستاتيستيكاعا سۇيەنسەك, 2019 جىلى جولداعى اپاتتاردىڭ 33,6% جىلدامدىقتى ارتتىرۋدان, 14,1% جولدىڭ قارسى بەتىنە شىعىپ كەتۋدەن, 9,5% جۇرگىزۋشىنىڭ كولىكتى باسقارا الماي قالۋىنان, 8% اراقاشىقتىقتى ساقتاماۋدان بولعان. سونداي-اق, شارشاۋ, ماس كۇيىندە كولىك ايداۋ جانە ءاۆتوموبيلدىڭ اقاۋى سياقتى جاعدايلار اپاتقا سەبەپ بولىپ جاتادى.
2019 جىلى رەسپۋبليكالىق جانە حالىقارالىق ماڭىزداعى جولداردا بارلىعى 2547 جول-كولىك اپاتى بولعان. بۇل 2018 جىلمەن سالىستىرعاندا 18% كوپ. وسىلايشا, جولداردىڭ ساپاسى ارتقان سايىن جول-كولىك اپاتتارى دا كوبەيگەن. وسى ورايدا وتكەن جىلى ەلىمىزدە رەسپۋبليكالىق ماڭىزداعى اۆتوجولداردىڭ 4,4 شاقىرىمىندا قايتا قۇرىلىمداۋ جانە سالۋ جۇمىستارى جۇرگىزىلىپ, رەكوردتىق كورسەتكىشكە جەتكەنىن ايتۋ كەرەك. نۇر-سۇلتان – پاۆلودار, ششۋچينسك – زەرەندى, بەينەۋ – اقجىگىت, جەتىباي – جاڭاوزەن, تاسكەسكەن – باقتى, تەمىرتاۋ – قاراعاندى ۋچاسكەلەرى تولىق اياقتالدى. بۇگىنگى تاڭدا رەسپۋبليكالىق جولداردىڭ 88% جاقسى جانە قاناعاتتانارلىق جاعدايدا.
جىل وتكەن سايىن وتاندىق اۆتوجول سالاسىندا ينفراقۇرىلىمدى دامىتۋ جانە قاۋىپسىزدىك دەڭگەيىن ارتتىرۋ شارالارى كۇشەيتىلىپ كەلەدى. ايتالىق, «نۇرلى جول» باعدارلاماسى اياسىندا 2025 جىلعا دەيىن 13,5 مىڭ شاقىرىم جول سالىنادى جانە قايتا جاڭعىرتىلادى. ونىڭ ىشىندە 2 مىڭ شاقىرىم جول ءى تەحنيكالىق ساناتتاعى جولعا جاتادى. تيىسىنشە, اقىلى ۋچاسكەلەر سانى ارتادى. قازىرگى ۋاقىتتا جالپى ۇزىندىعى 682 شاقىرىمدى قۇرايتىن 4 اقىلى جول بار: «نۇر-سۇلتان – ششۋچينسك», «نۇر-سۇلتان – تەمىرتاۋ», «الماتى – قورعاس» جانە «الماتى – قاپشاعاي». ورتا ەسەپپەن ەلىمىزدە جەڭىل اۆتوكولىكتەر ءۇشىن ءى ساناتتى جولدارمەن ءجۇرۋ باعاسى 1 شاقىرىمعا 1 تەڭگە, ۇلكەن جۇك كولىكتەرى ءۇشىن 5-تەن 25 تەڭگەگە دەيىنگى ارالىقتا. سالىستىرمالى تۇردە الساق, فرانتسيادا ونىڭ قۇنى 40 ەسە جوعارى, ياعني, جەڭىل كولىكتەر ءۇشىن 43 تەڭگە, جۇك كولىكتەرىنە 228 تەڭگە. بىراق, باتىس ەۋروپادا جول-كولىك اپاتىنان بولاتىن ءولىم-ءجىتىم قازاقستانعا قاراعاندا 15 ەسە از. دۇنيەجۇزىلىك دەنساۋلىق ساقتاۋ ۇيىمىنىڭ ەسەبى بويىنشا ەلىمىزدە اپاتتاردان بولاتىن ءولىم-ءجىتىم كورسەتكىشى 100 مىڭ اۆتوكولىككە 71,8 وقيعادان كەلەدى.
قازاقستاندا اۆتوكولىك قۇرالدارىنىڭ سانى ارتىپ كەلە جاتقانىن ايتۋ كەرەك. قر ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنشە, بۇگىنگى تاڭدا ەلىمىز جولدارىندا 3 ملن.-نان استام اۆتوكولىك ءجۇر. ورتا ەسەپپەن 100 قازاقستاندىققا 21 كولىكتەن كەلەدى, ياعني ءاربىر بەسىنشى وتانداسىمىزدىڭ جەكە كولىگى بار.
ادام ءومىرىنىڭ ماڭىزدىلىعى مەملەكەت ءۇشىن باسىم باعىتتاردىڭ ءبىرى ەكەنى ءسوزسىز. دەگەنمەن, جولدارداعى اپاتتاردى ازايتۋ - مەملەكەتتىك ورگانداردىڭ عانا ەمەس, جول قوزعالىسىنا قاتىسۋشىلاردىڭ ارقايسىنا ورتاق جاۋاپكەرشىلىك. كولىك ايداۋ مادەنيەتىن ارتتىرۋ - بۇگىنگى تاڭداعى نەگىزگى مىندەتتەردىڭ ءبىرى. بارلىق تاراپتىڭ كۇش-جىگەرىن بىرىكتىرۋ ارقىلى عانا قازاقستاندا اپاتتار سانىن ازايتىپ, ەڭ قۇندى قازىنا – ادام ءومىرىن ساقتاۋعا بولادى.