وبلىس ورتالىعىنداعى قالالىق بالالار كىتاپحاناسى «ادامعا مەيىرىم مەن جىلۋلىق سىيلايىق» جوباسى بويىنشا قىزمەت ەتۋدە. قالاداعى بارلىق مەكتەپتەر, بالاباقشالار, كوللەدج وقۋشىلارى – كىتاپحانا وقىرماندارى. ولار كىتاپحانادا وتەتىن رۋحاني, مادەني, ادەبي شارالارعا ءجيى قاتىسادى.
ال جۋىردا وتكەن مادەني شارانىڭ ءبىرى اباي اندەرى مەن ولەڭدەرىنە ارنالدى.
– ماقسات – اباي اتامىزدىڭ ولەڭدەرىن ويىن ارقىلى ۇيرەتۋ. سوندا وقۋشىلار ءار ولەڭگە ءمان بەرىپ, ماعىناسىن ءتۇسىنىپ جاتتاپ الادى, – دەيدى №19 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى گۇلزيرا وڭعاروۆا.
مۇعالىمدەرى باستاپ كەلگەن 8 «ا» سىنىپ وقۋشىلارى «نۇرلى» جانە «دانالىق» اتتى ەكى توپقا ءبولىندى. ويىن شارتى بويىنشا بالالار ون ايالدامادان ءوتۋ كەرەك. بۇل رەتتە توپ جەتەكشىلەرىنە كارتا جانە ايالدامادان ءوتۋ قۇجاتى بەرىلدى.
وقۋشىلار ءار ايالدامادان وتكەن سايىن كەزەكتەسىپ, ابايدىڭ «قىس», «كۇز», «جاز», «جازعىتۇرىم» ولەڭدەرىن جاتقا ايتىپ بەردى.
ءسويتىپ «ايالداماعا ايالدا» ويىنى ارقىلى ايتىلعان ولەڭدەرى ابايدىڭ «كوزىمنىڭ قاراسى», «ايتتىم سالەم قالامقاس» اندەرىنە جالعاستى.
شاراعا قاتىسۋشى شاراپيدەن اللاجار «كوزىمنىڭ قاراسى» ءانىن ورىندادى, ال ءازىلحان ايىم, ايجان يبراگيموۆا, قالي اليحان, سەرىك ارسلان, ديلناز تەزەكباەۆالار ابايدىڭ ولەڭدەرىن, قارا سوزدەرىن مانەرلەپ وقىپ بەردى.
ەكى كوماندا دا ء«بىز ابايدى بىلەمىز بە؟» اتتى ءسوز جۇمباقتاردى شەشىپ, سۇراق-جاۋاپتار ويىندارىنا بەلسەندى قاتىستى.
شارا سوڭىندا ەڭ كوپ ولەڭ ايتىپ, ءان سالعان, ءسوز جۇمباق شەشكەن «نۇرلى» كومانداسى جەڭىمپاز اتاندى.
وقۋشىلاردى تاڭعالدىرعانى – «جەلسىز تۇندە جارىق اي» ءانىن, ابايدىڭ «قارا سوزدەرىن» يننوۆاتسيالىق قالام ارقىلى تاڭداپ, تىڭدادى.
– وسى كۆەست-ويىندار, ياعني ويناي وتىرىپ, ويلاپ جەتكىزە ءبىلۋ ارقىلى وقۋشىلار وزدەرىنىڭ اباي ولەڭدەرىن, اندەرىن, ءومىربايانىن, شىعارماشىلىعىن جاقسى بىلەتىندىكتەرىن ءوز بىلىمدەرىمەن كورسەتە العاندارىنا قۋاندىق, – دەيدى كىتاپحاناشى ايناگۇل ماعزۇموۆا.
كىتاپحانا قىزمەتكەرلەرى ايتجامال قابىلدەنوۆا, الماگۇل ايتماعامبەتوۆا, جامكەي داۋىتحانقىزى «سامال» ساۋىقتىرۋ ورتالىعى, «الرامي» كلۋب ءۇيى, ارداگەرلەر كلۋبى, مۇگەدەكتەر مەن قارتتارعا ارنالعان ينتەرنات ءۇيى, ەتنومادەني ورتالىقتار, «ساۋران» بالالار ورتالىعىمەن بىرلەسە قىزمەت ەتۋدە.
بالالارعا ارنالعان قۋىرشاق تەاترى, لاتىن ءالىپبيىن ۇيرەتەتىن «انا ءتىلى ورتالىعىنىڭ» بۇرىشى بار.
شارا سوڭىندا «اباي الەمى» كىتاپ كورمەسى ۇيىمداستىرىلدى. ابايدىڭ ءومىرى مەن شىعارماشىلىعىنا ارنالعان بەينەفيلم كورسەتىلدى.
پاۆلودار