الداعى بەيسەنبى كۇنى, ياعني 24 قازاندا الەمدىك تەننيس سپورتىنىڭ جۇلدىزدارى سەربيالىق نوۆاك دجوكوۆيچ پەن يسپانيالىق رافاەل نادال نۇر-سۇلتانداعى «بارىس-ارەنا» سپورت سارايىندا قايىرىمدىلىق كەزدەسۋىن وتكىزەدى.
ەلوردا تورىندەگى عالامات كەزدەسۋ قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆتىڭ مۇرىندىق بولۋىمەن جانە نۇر-سۇلتان قالاسى اكىمدىگىنىڭ قولداۋىمەن ۇيىمداستىرىلىپ جاتىر. اتالعان ءىس-شارانىڭ نەگىزگى ماقساتى – ەلىمىزدە تەننيس سپورتىنىڭ تانىمالدىعىن ارتتىرۋ جانە جاس ورەندەردى وسى سپورتقا باۋلۋ. سونداي-اق بيلەتتەن تۇسكەن قارجى بالالارعا ارنالعان ينكليۋزيۆتى الاڭدار سالۋعا جانە وبلىستارداعى اۋدان ورتالىقتارىندا تەننيس سپورتىن دامىتۋعا جۇمسالادى.
2015 جىلى پايدالانۋعا بەرىلگەن «بارىس ارەنا» مۇزايدىن كەشەنىنە 11 626 كورەرمەن ەركىن سيادى. قازاقستان تەننيس فەدەراتسياسىنىڭ ۆيتسە-پرەزيدەنتى, قازاقستان قۇراما كومانداسىنىڭ كاپيتانى دياس دوسقاراەۆتىڭ سوزىنشە, قازىرگى تاڭدا دجوكوۆيچ پەن نادال ماتچىنا 8 مىڭنان اسا بيلەت ساتىلعان. ايتا كەتۋ كەرەك, كەزدەسۋدىڭ جەڭىلدەتىلگەن تاريفتەگى ارزان بيلەتتەرى ساتىلىمعا شىعارىلعان اپتانىڭ العاشقى كۇندەرىندە-اق ساتىلىپ كەتكەن. ال قىمبات تاريفتەگى بيلەتتەر ءالى ساتىلىمدا.
قازىرگى تاڭدا ەلىمىزدە تەننيس سپورتى ايتارلىقتاي دەڭگەيدە دامىپ كەلەدى. بارلىق وبلىس ورتالىقتارى مەن قالالاردا اتالعان سپورت تۇرىمەن شۇعىلدانۋ ءۇشىن سپورت كەشەندەرى مەن تەننيس كورتتارى سالىنعان. وسىنداي قولداۋدىڭ ارقاسىندا قازىر قازاقستاندىق تەننيسشىلەر حالىقارالىق تۋرنيرلەردە جاقسى ناتيجە كورسەتىپ, جوعارى جەتىستىكتەرگە قول جەتكىزىپ جەتىپ ءجۇر. سونداي-اق قازاقستاننىڭ ەرلەر جانە قىزدار قۇراماسى جىل سايىن تەننيستەن بەيرەسمي الەم چەمپيوناتى سانالاتىن دەۆيس كۋبوگى مەن فەدەراتسيا كۋبوگىندا ءساتتى ونەر كورسەتۋدە. تاعى ءبىر ايتا كەتەرلىگى, جۋىردا عانا قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ حالىقارالىق تەننيس فەدەراتسياسىنىڭ (ITF) ۆيتسە-پرەزيدەنتى بولىپ قايتا سايلاندى. وتەمۇراتوۆتىڭ ۆيتسە-پرەزيدەنتتىككە قايتا سايلانۋى – قازاق تەننيسىنىڭ حالىقارالىق ارەنادا بەدەلى جوعارى ەكەنىن ايقىنداي تۇسەدى.
سونىمەن دجوكوۆيچ پەن نادال ماتچىنا ورالساق. ەكى تەننيسشى دە قازاقستانعا 24 قازان كۇنى تاڭەرتەڭ كەلەدى. قوناقۇيگە جايعاسىپ, ازداپ تىنىعىپ العاننان كەيىن ولار قالانىڭ كورىكتى جەرلەرىن ارالايدى. اتاپ ايتار بولساق, سەربيالىق پەن يسپانيالىق ساڭلاق «ازىرەت سۇلتان» مەشىتىن, تاۋەلسىزدىك سارايىن, Haileybury Astana بريتانيالىق مەكتەبىن, نازارباەۆ ۋنيۆەرسيتەتىن, ۇلتتىق تەننيس ورتالىعىن, «استانا وپەرا» مەملەكەتتىك وپەرا جانە بالەت تەاترى مەن «بايتەرەك» مونۋمەنتىن تاماشالايدى. سونىمەن قاتار جارىس بولاتىن كۇنى ەكى تەننيسشى قازاقستاندىق باق وكىلدەرىنە ارنالعان ارنايى ءباسپاسوز ءماسليحاتىنا قاتىسادى.
قازىرگى تاڭدا دجوكوۆيچ پەن نادال الەمدىك رەيتينگتە العاشقى ەكى ورىندى ءبولىسىپ تۇر. قوس تەننيسشى باسقا تۋرنيرلەردى ايتپاعاننىڭ وزىندە «ۇلكەن دۋلىعا» ساناتىنداعى (اۋستراليا اشىق چەمپيوناتى, فرانتسيا اشىق چەمپيوناتى, اقش اشىق چەمپيوناتى جانە ۋيمبلدون) تۋرنيرلەردە 34 مارتە توپ جارعان. سوندىقتان قازىرگى تەننيس جۇلدىزدارىنىڭ كەزدەسۋىنە تەك قازاقستاندىقتار عانا ەمەس, شەتەلدىك جانكۇيەرلەر دە ەرەكشە قىزىعۋشىلىق تانىتىپ وتىر. سونداي-اق دجوكوۆيچ پەن نادال ەلوردامىزدا جەكە كەزدەسۋ بويىنشا مەرەيتويلى 55-ءشى ماتچىن وتكىزەدى. بۇل دا ستاتيستيكا سۇيەتىن جانكۇيەرلەر ءۇشىن قىزىقتى ءارى تاريحي وقيعا بولماق.
نۇر-سۇلتانداعى قايىرىمدىلىق ماتچىندا نوۆاك دجوكوۆيچ رەسمي تۇردە الەمنىڭ ءبىرىنشى راكەتكاسى رەتىندە كورتقا شىعادى. ال وسى كەزدەسۋدەن كەيىن رافاەل نادال الەمنىڭ ءبىرىنشى راكەتكاسى اتاعىن وزىنە قايتارىپ الادى. سەبەبى وسىدان بىرەر اپتا بۇرىن نوۆاك شانحايدا وتكەن «ماستەرس» ءتۋرنيرىنىڭ تورتتىك فينالىندا گرەك ستەفانوس تسيتسيپاسچۋدان جەڭىلىپ, بىلتىرعى تيتۋلىن قورعاي المادى. وسىلايشا دجوكوۆيچ اتر رەيتينگىندەگى العاشقى ورنىنان ايىرىلىپ قالدى. تەننيسشىلەردىڭ كەلەسى الەمدىك رەيتينگى رەسمي تۇردە 4 قاراشا كۇنى جاڭارادى. سول كۇنى دجوكوۆيچتەن بىلتىر پاريجدەگى «ماستەرس» باسەكەسىنىڭ قورىتىندى تۋرنيرىندە يەلەنگەن 1600 ۇپايىن الىپ تاستايدى. ال بيىلعى «ۇلكەن دۋلىعا» مەن «ماستەرس» ءتۋرنيرىنىڭ ەكى بىردەي جارىسىندا توپ جارعان رافاەل نادال الەمنىڭ ءبىرىنشى راكەتكاسى اتانادى.
جوعارىدا ەكى تەننيسشى نۇر-سۇلتاندا جەكە كەزدەسۋ بويىنشا 55-ءشى ماتچىن وتكىزەدى دەپ ايتىپ قالدىق قوي. سول 55 ماتچتىڭ 28-ىندە نوۆاك دجوكوۆيچ جەڭىسكە جەتسە, 26 كەزدەسۋدە رافاەل ءنادالدىڭ مەرەيى ۇستەم بولعان. تەننيسشىلەردىڭ كورتتاعى العاشقى تەكە-تىرەسى 2006 جىلى باستالعان. ءدال سول جىلى دجوكوۆيچ پەن نادال «رولان گارروس» (فرانتسيا اشىق چەمپيوناتى) ءتۋرنيرىنىڭ فينالىندا جولىعىپ, يسپانيالىق تەننيسشى ەكى سەتتە 4:6, 4:6 ەسەبىمەن جەڭىسكە جەتكەن. ال قوس تەننيسشى ازىرگە سوڭعى رەت يتالياداعى Internazionali BNL d'Italia جارىسىنىڭ فينالىندا كەزدەسكەن. بۇل ماتچ تا ءنادالدىڭ جەڭىسىمەن اياقتالعان.
ەلوردادا وتەتىن ەكى تەننيسشى اراسىنداعى 55-ءشى كەزدەسۋدە كىم جەڭەدى ەكەن؟ بۇل سۇراقتىڭ جاۋابىن 24 قازاندا بىلەتىن بولامىز.