جىل باسىنان بەرگى 9 ايدا «قازاقمىس حولدينگ» اق 184,029 مىڭ توننا مىس ءوندىردى. بۇل كورسەتكىش بىلتىرعىمەن سالىستىرعاندا 5,3 پايىز, ياعني 9,3 مىڭ تونناعا جوعارى.
حولدينگتىڭ ءباسپاسوز قىزمەتىنىڭ حابارلاۋىنشا, كەن قۇرامىنداعى مىستىڭ ورتاشا مولشەرى 0,91 پايىزدى قۇرايدى, بۇل دا جوسپارلانعان مەجەدەن 1,8 پايىز جوعارى.
– 2019 جىلدىڭ 9 ايىندا «قازاقمىستىڭ» بايىتۋ فابريكالارى 22,8 ميلليون توننا كەندى وڭدەدى. بىلتىر وسى كەزەڭدە 22,5 ميلليون توننا كەن وڭدەلگەن بولاتىن. ياعني, بيىلعى جۇمىس كولەمى 368 مىڭ تونناعا ارتىق, – دەيدى كومپانيانىڭ ءباسپاسوز قىزمەتى.
حولدينگتىڭ ديرەكتورلار كەڭەسىنىڭ توراعاسى ەدۋارد وگايدىڭ ايتۋىنشا, جىل سوڭىنا دەيىن بيىلعى جوسپاردى اسىرا ورىنداۋ جوسپارلانىپ وتىر.
– بىلتىرعى كورسەتكىشتى دە, بيىلعى جوسپاردى دا باسىپ وزامىز. سەبەبى بىلتىر ەكىنشى رۋدوتەرميالىق پەش ىسكە قوسىلدى. گەولوگيالىق بارلاۋ جۇمىستارىن دا جالعاستىرامىز. مىس پەن ءتۇستى مەتالل كەنىشتەرى اشىلاتىن 5 بولاشاعى زور ۋچاسكەدە جۇمىس ىستەپ جاتىرمىز, – دەيدى ول.
الداعى ۋاقىتتا كومپانيا كەن بايىتۋدىڭ بۇگىنگى تەحنيكالىق تالاپتارعا ساي جاڭا دەڭگەيىنە كوشپەك.
«قازاقمىس» ەلىمىزدەگى تابيعي رەسۋرس ءوندىرۋ جانە قايتا وڭدەۋمەن اينالىساتىن ەڭ ءىرى كومپانيالاردىڭ ءبىرى ەكەنىن ايتا كەتەيىك. 13 كەنىشتەن كەن وندىرەتىن حولدينگ قۇرامىندا 4 كەن بايىتۋ فابريكاسى, 2 مىس بالقىتۋ زاۋىتى مەن 2 كومىر رازرەزى بار. بۇگىندە «قازاقمىستا» 38 مىڭعا تارتا ادام جۇمىس ىستەيدى.