قوستاناي وبلىسى پوليتسيا دەپارتامەنتىنىڭ قىزمەتكەرلەرى بىرنەشە سپورتتىق باسەكەدە جۇلدەلى بولىپ, الەم چەمپيوناتىنا جولداما الدى. بۇل تۋرالى پد باستىعىنىڭ باق-پەن ءوزارا ءىس-قيمىل جونىندەگى كەڭەسشىسى ەلەنا كاشارينا حابارلادى.
ءبىرىنشى جانە ەڭ ماڭىزدى جەڭىس اقتاۋ قالاسىندا تىركەلدى. جەدەل قيمىلداۋ ارنايى جاساعىنىڭ (جقاج) ينسپەكتورى, پوليتسيا اعا لەيتەنانتى ايبەك مۇقاشەۆ 91 كگ دەيىنگى سالماق دارەجەسىندە ەكىنشى ورىندى يەلەنىپ, بوسنيا جانە گەرتسەگوۆينا ەلىندە وەتەتىن الەم چەمپيوناتىنا قاتىساتىن بولدى.
كەلەسى جەڭىس حالىقارالىق دارەجەدەگى باسەكەدە تىركەلدى. جەكپە-جەك بويىنشا «رەسەي-ماگنيتوگورسك قالاسى قازاقستان-قوستاناي قالاسىنا قارسى» اتاۋىمەن وبلىس ورتالىعىنىڭ 140 جىلدىعىنا ورايلاستىرىلعان تۋرنير ءوتتى. جقاج ينسپەكتورى, پوليتسيا اعا لەيتەنانتى امانبەك جامانقاراەۆ 63 كەلى سالماق دارەجەسىندە ونەر كورسەتىپ, وسى ءتۋرنيردىڭ جەڭىمپازى اتاندى. ول بۇل سپورت تۇرىمەن بالا كەزىنەن اينالىسىپ كەلەدى, بۇگىندەرى حالىقارالىق دارەجەدەگى سپورت شەبەرى. ا. جامانقاراەۆ اقتىق باسەكەدە رەسەي چەمپيونى انتون شايدروۆپەن كەزدەسىپ, بۇل جەكپە-جەكتە سەنىمدى جەڭىسكە جەتتى.
ءۇشىنشى جەڭىس قوستانايدا وتكەن ۋشۋ-ساندا سپورت تۇرىنەن تىركەلدى. 70 كەلى سالماق دارەجەسىندە وتكەن جارىستا قايرات جۇكەنوۆ جەڭىسكە جەتتى.
سپورتشىلاردىڭ جاتتىقتىرۋشىسى, پوليتسيا مايورى قۋانىش باباقاەۆتىڭ ايتۋىنشا, بولىمشەنىڭ سپورتتىق جەڭىستەرى كۇندەلىكتى سپورتتىق جاتتىعۋلار مەن ءتارتىپتىڭ ارقاسىندا.
بولىمشە كومانديرى, پوليتسيا مايورى جانىبەك مۇحامەدجانوۆ بولىمشەنىڭ كەستەسىندە سپورتتىق جاتتىعۋلارعا ەرەكشە كوڭىل بولىنەتىنىن اتاپ ءوتتى.
قوستاناي وبلىسى پد باستىعىنىڭ ورىنباسارى, پولكوۆنيك ارداق ىنتىقباەۆ جارىستاردىڭ جەڭىمپازدارىن جەكە قۇرامنىڭ الدىندا ماراپاتتادى.
____________________________________________________________________