سەنبى, 18 مامىر 2013 2:08
قوستانايدا «نۇر وتان» حدپ جانىنداعى قۇقىقتىق كەڭەستىڭ, پارلامەنت ءماجىلىسىنىڭ زاڭ جانە سوت-قۇقىقتىق رەفورما جونىندەگى كوميتەتى, «زاڭ عىلىمى مەن تاجىريبەسىن يننوۆاتسيالىق دامىتۋ ورتالىعى» ءبىلىم قورىنىڭ ۇيىمداستىرۋىمەن «قازاقستان رەسپۋبليكاسىنداعى قىلمىستىق زاڭنامانى جاڭعىرتۋ» اتتى بەسىنشى حالىقارالىق عىلىمي-پراكتيكالىق كونفەرەنتسيا ءوتتى. ونىڭ ماقساتى – قىلمىستىق قۇقىق باستاۋلارىنىڭ عىلىمي مانىنە ناقتى باعا بەرىپ, قىلمىستىق زاڭنامانى بايىتاتىن تەوريالىق-تاجىريبەلىك ۇسىنىستاردى قالىپتاستىرۋ بولماق.
سەنبى, 18 مامىر 2013 2:08
قوستانايدا «نۇر وتان» حدپ جانىنداعى قۇقىقتىق كەڭەستىڭ, پارلامەنت ءماجىلىسىنىڭ زاڭ جانە سوت-قۇقىقتىق رەفورما جونىندەگى كوميتەتى, «زاڭ عىلىمى مەن تاجىريبەسىن يننوۆاتسيالىق دامىتۋ ورتالىعى» ءبىلىم قورىنىڭ ۇيىمداستىرۋىمەن «قازاقستان رەسپۋبليكاسىنداعى قىلمىستىق زاڭنامانى جاڭعىرتۋ» اتتى بەسىنشى حالىقارالىق عىلىمي-پراكتيكالىق كونفەرەنتسيا ءوتتى. ونىڭ ماقساتى – قىلمىستىق قۇقىق باستاۋلارىنىڭ عىلىمي مانىنە ناقتى باعا بەرىپ, قىلمىستىق زاڭنامانى بايىتاتىن تەوريالىق-تاجىريبەلىك ۇسىنىستاردى قالىپتاستىرۋ بولماق.
بۇل فورۋم قىلمىستىق قۇقىقتىڭ ماڭىزدى جانە وتكىر پروبلەمالارى تالقىلاناتىن عىلىمي فورۋمدار نەگىزىندە 2009 جىلدان بەرى تۇراقتى وتكىزىلىپ كەلەدى. وعان رەسەيدەن, بەلورۋسسيادان جانە گەرمانيادان 15 عالىم مەن ساراپشىلار قاتىستى. باسقوسۋدا ۇلتتىق قىلمىستىق-قۇقىقتىق جۇيەلەردىڭ, اسىرەسە, تاۋەلسىز مەملەكەتتەر دوستاستىعى ەلدەرى اراسىنداعى قارىم-قاتىناس تۋرالى پىكىرتالاس ءوربىدى. سونىمەن قاتار, وندا عىلىمي جۇرتشىلىق پەن مەملەكەتتىك ورگاندار اراسىنداعى پىكىرالماسۋلارعا دا مۇمكىندىك جاسالدى. بيىل تامىز ايىنىڭ سوڭىنا قاراي پارلامەنت ءماجىلىسى قازاقستان رەسپۋبليكاسى قىلمىستىق كودەكسى جالپى ءبولىمىنىڭ جاڭا رەداكتسياسىن قابىلدايتىن بولادى. كونفەرەنتسيادا قىلمىستىق كودەكستىڭ جاڭا رەداكتسياسىنىڭ جوباسى قىزۋ تالقىلاندى.
ەلىمىزدىڭ قۇقىقتىق زاڭناماسىندا تەك جاڭا تۇزەتۋلەر ەنگىزۋ ارقىلى شەشىمىن تاباتىن قوردالانىپ قالعان جۇيەلىك پروبلەمالار جەتەرلىك. سوندىقتان جاڭا كەزەڭدە قۇقىقتىق ساياسات عىلىمي نەگىزدى جانە تۇبەگەيلى ءوزگەرتۋلەردى قاجەتسىنىپ وتىر. ازاماتتاردىڭ قۇقىعى مەن ەركىندىگىن, قوعام مۇددەسى مەن مەملەكەتتى قىلمىستىق جاعدايلاردان قورعاۋ ءۇشىن ۋاقىت سىنىنان وتكەن, بۇگىنگى كۇن تالابىنا جاۋاپ بەرە الاتىن قىلمىستىق-قۇقىقتىق ينستيتۋتتاردى, بازالاردى جاڭعىرتا وتىرىپ, ولاردى ساقتاۋ كەرەك.
وسى ۇلكەن شارانى ۇيىمداستىرۋ باستاماسىن كوتەرۋشىلەردىڭ ءبىرى پارلامەنت ءماجىلىسىنىڭ دەپۋتاتى, «نۇر وتان» حدپ جانىنداعى قۇقىقتىق كەڭەستىڭ توراعاسى, زاڭ عىلىمدارىنىڭ دوكتورى, پروفەسسور نۇرلان ءابدىروۆ كونفەرەنتسيانى اشىپ, قۇتتىقتاۋ ءسوز سويلەدى. وبلىس اكىمى نۇرالى سادۋاقاسوۆ كونفەرەنتسياعا قاتىسۋشىلارعا شارانىڭ تابىستى وتۋىنە تىلەكتەستىگىن ءبىلدىردى.
قازاقستان رەسپۋبليكاسى قىلمىستىق كودەكسىنىڭ جالپى ءبولىمى جاڭا رەداكتسياسىنىڭ جوباسىن قازاقستان رەسپۋبليكاسى قىلمىستىق كودەكسىنىڭ جاڭا رەداكتسياسىنىڭ جوباسىن جاساۋ جونىندەگى ۆەدومستۆوارالىق جۇمىس توبىنىڭ جەتەكشىسى, قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى يوگان مەركەل تانىستىردى.
كونفەرەنتسيا «قىلمىستىق زاڭنامانى جاڭعىرتۋدىڭ حالىقارالىق تاجىريبەسى», «قازاقستان رەسپۋبليكاسى قىلمىستىق كودەكسىنىڭ جالپى ءبولىمى جاڭا رەداكتسياسىنىڭ جوباسىنداعى قىلمىستىق جاۋاپكەرشىلىك ماسەلەلەرى» جانە «قىلمىستىق جازا: قازىرگى زامانعى اعىم» اتتى ءۇش سەسسياعا ءبولىنىپ جۇمىس ىستەدى. ولاردىڭ جۇمىسىنا گەرمانيانىڭ فرايبۋرگ ۋنيۆەرسيتەتىنىڭ پروفەسسورى گەلمۋت كۋري, بەلارۋس رەسپۋبليكاسى باس پروكۋراتۋراسى عىلىمي-پراكتيكالىق ورتالىعىنىڭ ديرەكتورى, زاڭ عىلىمدارىنىڭ دوكتورى ۆلاديمير حوميچ, رەسەي فەدەرالدىق انتيمونوپوليالىق قىزمەتى قۇقىقتىق باسقارماسى باستىعىنىڭ ورىنباسارى سەرگەي ماكسيموۆ, تاعى باسقالار پىكىرلەرىن ورتاعا سالدى.
كونفەرەنتسيا ەلىمىزدىڭ قىلمىستىق زاڭناماسىنىڭ زامان تالابىنا وراي جاڭعىرتىلۋىنا ءوز سەپتىگىن تيگىزەتىن بولادى.
ءنازيرا جارىمبەتوۆا,
«ەگەمەن قازاقستان».
قوستاناي.